Ama ɗa aꞌa̱ri a zuba a cikpalai Kashila̱
19
An katsumate ka zuba ka ucira ka nala ka kotsoi kadyanshi,
aku n panai mawura̱ ma kakuma̱ ka ama a zuba,
a ka sala̱sa:
“Cikpalai Kashila̱!
Iwauwi,
n tsupige,
n ucira i Kashila̱ ka tsunu iꞌya!
2 Mayun ɗa kpam dere ɗa tyoku ɗa u tsu yan ama a cingi afada.
U yawunsa ɗe tyoku ɗa wa yanka kashankala ka pige ka nala ki mavura,
uza ɗa u zuwai ama a likimba a yain tsicingi a asu u ɗa a yain tsishankala n eyi.
Kashila̱ ka tsupa yi ta̱ kpaci u wuna ta̱ agbashi a ne.”
3 Aku a doki a salai:
“Cikpalai Kashila̱!
Ka̱nga̱ ka uka̱na̱ u akina ka ilyuci i pige yi ka ꞌya̱nga̱ ta̱ a zuba hal ubana bawu utyoku!”
4 Nkoshi kamanga n ama a nishi mi n ili i uma i nishi yi a kuɗa̱ngi a lyakai Kashila̱ kayala,
uza ɗa wa̱ri ndishi a karatsu ka tsugono.
A danai,
“Ami!
Cikpalai Kashila̱!”
Abiki a iyolo a Maku ma Kondom
5 Aku n panai uza roku wa isa̱ pini a karatsu ka tsugono ki,
u danai,
“Gba̱ ama,
azapige n aza ɗa bawu aꞌa̱ri azapige.
Aza ɗa ya lyaka Kashila̱ kayala,
danai,
‘Tsu na̱ka̱ vu ta̱ tsupige.’ ”
6 Aku n panai mawura̱ ma kakuma̱ ka ama a zuba a ka sala̱sa yavu mawura̱ ma mini ma pige ma ma rukpusa̱ kpam yavu mawura̱ ma makpankashila̱ ma pige.
N pana̱ka le a ka dansa:
“Cikpalai Kashila̱!
Kpaci Magono ma Zuba Kashila̱
Uza u Ucira Gba̱ aya Magono!
7 Tsu yanyi ipeli n maza̱nga̱.
Tsu cikpalai tsupige tsu ne.
Kpaci aꞌayin a ɗa a ka yan iyolo i
Maku ma Kondom mi a rawa ɗe.
Ukasavu vi u foɓuso ɗe
kaci ka ne adama a iyolo yi.
8 Kashila̱ ka na̱ka̱ yi ta̱ aminya a pun,
a ɗa a lai aminya a tsugbere,
a ɗa aꞌa̱ri sarara kpam a ka laɗa.”
(Aminya yi a ɗa ili i shinga iꞌya ama a Kashila̱ a ka yansa.)
9 Aku katsumate ka zuba ki ka tonuko mu,
“Korongu na:
Kashila̱ ka zuwuka ta̱ gba̱ uza ɗa baci dem a libanai a asu u abiki a iyolo i Maku ma Kondom mi una̱ u shinga.”
Katsumate ka zuba ki ka danai kpam,
“Ili iꞌya Kashila̱ ka dansai na vi mayun ɗa.”
10 Aku n kuɗa̱ngi a aꞌene a katsumate ka zuba ki tsa̱ra̱ n lyaka yi kayala,
shegai u tonuko mu,
“Aꞌa!
Kotsu vu lyaka mu kayala wa!
Mpa dem kagbashi ka tyoku u vunu n tyoku u Atoni a ɗa a buwai,
n gba̱ aza ɗa a ka̱na̱i ukuna u mayun u ɗa Yesu toɗugboi.
Cikpalai Kashila̱!”
Ukuna u mayun u ɗa Yesu toɗugboi vi u ɗa u tsu zuwa ama a dansa akani a Kashila̱.
Uza ɗa u yuwa̱i kadoki ka eri
11 Aku n wenei zuba kukpa̱i,
n wenei kadoki ka eri ka̱ri kushani pini.
Uza ɗa u yuwa̱i ka vi kala ka yi Uza u Maci n Uza u Mayun.
U tsu yan ta̱ afada a ne dere,
kuvon kpam dere.
12 Aꞌeshi a ne a ka laɗa yavu akina,
aku u ukai ifuni ushani a kaci ka ne.
A korongu ta̱ kala ka ne a ikyamba i ne,
shegai aya koshi u revei ka.
13 U ukai matogo ma a rumbugi a asuvu a mpasa.
Kala ka ne ka,
“Udani u Kashila̱.”
14 Asoje a zuba a yuwusa̱i adoki a eri a ka tono yi.
A ukusai aminya a pun a ɗa a lai aminya a tsugbere,
a ɗa aꞌa̱ri sarara.
15 Burundu u kulya u wuta̱i a una̱ u ne,
kpam n u ɗa wa yan manyan u yain kuvon n uyamba.
Wa lya ta̱ tsugono tsu le n kalangu ka urim.
Wa wenike ta̱ upan u pige u Kashila̱ Uza u Ucira Gba̱ a asu u upisha cinwi a kaɗa̱ka̱ ka upishisa mini ma cinwi.
16 A kapashi ka matogo ma ne ma ma palai maguta̱ ma ne a yain ikorongi i na:
MAGONO MA NGONO N ASHEKU A ISHEKU.
17 Aku n wenei katsumate ka zuba ka shamgbai a kaara.
U sala̱kai gba̱ asakali a ɗa a ka imkpusa a zuba n kala̱ga̱tsu ka ucira,
u danai:
“Tuwa̱i!
Ɓolomgbonoi i lyai ilikulya i abiki ushani iꞌya Kashila̱ ka tuwa̱ ka foɓusuko ɗa̱!
18 Tuwa̱i!
Takumai ikyamba i ngono,
n atigi,
n asoje,
kaɓolo n ikyamba i adoki n ikyamba i ayuwi a le.
Tuwa̱i!
Takumai ikyamba i ama gba̱:
agbashi n aza ɗa bawu aꞌa̱ri agbashi,
azapige n aza ɗa bawu aꞌa̱ri azapige!”
19 Aku n wenei kadin na̱ ngono n likimba gba̱,
kaɓolo n asoje a le,
a ɓolomgbonoi tsa̱ra̱ a yain kuvon n uza ɗa u yuwa̱i a zuba u kadoki ki n asoje a ne dem.
20 Aku a ka̱na̱i kadin ki kaɓolo n matsumate ma kaɓan uza ɗa u yanka yi ikunesavu yi.
(U yansa ta̱ ikunesavu i nala yi tsa̱ra̱ u yinsa̱ aza ɗa aꞌa̱ri n kugyan ku kadin ki,
aza ɗa kpam a lyakai kameli ka ne kayala.)
Kadin ki n matsumate ma kaɓan mi a vuta̱la̱ le ta̱ n uma u le pini a kushiva̱ ku akina ka ka̱ri ura̱na n akina a eri.
21 Uza ɗa u yuwa̱i kadoki ki u wunusai asoje a le gba̱ n burundu ɗa wa̱ri a uwutusa̱ a una̱ u ne.
Aku gba̱ asakali yi a takumai ikyamba i le a cuwusa̱i hal ucuwi u leje le.