Kashankala n kadin
17
Katsumate ka zuba ka te asuvu atsumate a shindere a ɗa aꞌa̱ri n abelu a shindere yi ka tuwa̱i ara va̱ aku ka danai,
“Tuwa̱ na n wenike vu tyoku ɗa a ka yanka kashankala ka ya dem u revei vi mavura;
wata,
ilyuci i pige iꞌya a mai asu u ɗa aga̱ta̱ aꞌa̱ri ushani.
2 Ngono n likimba n vakusu ta̱ n eyi,
kpam ire i unamba u uwono u ne tyoku u ma̱ra̱ ma ma makai ya dem a likimba ɗa iꞌa̱ri.”
3 Kpam asuvu a kuwene ka Kulu ku zuwai n wenei vi,
katsumate ka pura̱ mu ubana a mete.
Pini ɗe n cinai uka ndishi a zuba u kadin ka san kpa̱ya̱ya̱.
A korongi inyashi i Kashila̱ a ikyamba i ne gba̱,
kpam wa̱ ta̱ n aꞌaci a shindere n avana kupa.
4 Uka vi u ukai aminya a tsugono a ɗa aꞌa̱ri n ushili u galura n san kpa̱ya̱ya̱.
Kpam dem u ukai ili i ikali i zinariya,
n atali a ikebe icun kau‑kau.
A kukere ku ulyaki ku ne u ɓa̱na̱i mako ma a yain n zinariya ushaɗangi n ili i icaɗi;
wata,
ili i icaɗi n ashinda̱ a tsishankala tsu ne.
5 A korongi kala ka ka̱ri n kalen usokongi a kucen ku ne.
Kala ka danai,
“Mpa Babila Kacirani,
anuku a ashankala,
uza ɗa u gita̱i ili i icaɗi gba̱ a likimba.”
6 Aku n wenei uka vi ugutukpi an u soi mpasa m ama a Kashila̱,
aza ɗa a wunai adama a ɗa a dansai ukuna u Yesu.
An n wene yi n yain majiyan.
7 Aku katsumate ka zuba ki ka wece mu,
“Ndya i zuwai vu yain majiyan?
Ma tonuko vu ta̱ ukuna u usokongi u uka u na vi n kadin ka u yuwa̱i uza u aꞌaci a shindere n avana kupa vi.
8 Kadin ka vu wenei na vi wa̱ri ta̱ n uma caupa,
shegai gogo‑na kakushe ka.
Ciga ɗa wa ciga u wuta̱ asuvu a kaɗa̱ka̱ ka bawu ka̱ri n utyoku aku u bana asu u ɗa a ka wacinsa yi.
Ama ɗa aꞌa̱ri a likimba,
aza ɗa bawu Kashila̱ ka korongi aꞌala a le a Tagara̱da u Aza a Uma kahu uyan u likimba,
a ka yan ta̱ majiyan a weɓele baci kadin ki.
Wa̱ri ta̱ n uma caupa,
gogo‑na kakushe,
shegai wa gono ta̱ kpam.
9 “Va ciga ta̱ katakasuvu n kakiri tsa̱ra̱ vu reve ili i na yi.
Aꞌaci a shindere a nala yi aga̱la̱la̱ a ɗa asu u ɗa uka vi wa̱ri ndishi.
Aꞌaci yi ngono n shindere n ɗa dem.
10 Ngono n tawun n rukpa̱ ɗe,
gogo‑na ma teli ma ma lya tsugono,
kpam ma shindere mi kotsu ma tuwa̱ wa.
Shegai tsugono tsu ne tsa ɓa̱ra̱kpa̱ wa.
11 Kadin ka ka̱ri n uma caupa vi kpam gogo‑na u kuwa̱i vi,
aya magono ma kulla̱.
Wa̱ ta̱ tyoku ngono n shindere mi,
kpam a asu u uwacinsa u ɗa wa bana.
12 “Avana kupa a ɗa vu wenei vi,
ngono kupa n ɗa bawu n gita̱i ulya tsugono n ɗa,
shegai a ka wusha ta̱ ucira u ɗa a ka lya tsugono tyoku u ngono hal ulapa u uwule u te kaɓolo n kadin ki.
13 Gba̱ a ka wushuku ta̱ a na̱ka̱ yi ucira n tsugono tsu le.
14 A ka yan ta̱ kuvon n Maku ma Kondom mi,
shegai Maku ma Kondom mi ma lya ta̱ ucira u le,
kpaci aya Asheku a zuba u isheku gba̱,
kpam Magono ma a zuba u ngono gba̱.
Ama a ne a ɗa u isa̱i kpam u ɗanga̱sai a ka tono yi ta̱ kain dem.”
15 Aku katsumate ka zuba ki ka tonuko mu,
“Aga̱ta̱ a ɗa vu wenishei nala vi;
wata,
a asu u ɗa kashankala ki ka̱ri ndishi,
ama a ɗa n kakuma̱ ka ama n iyamba n aletsu.
16 Kpam avana kupa n kadin ka vu wenei vi a ka kovo ta̱ kashankala ki.
A ka wusa yi ta̱ gba̱ ili iꞌya wa̱ri n iꞌya,
aku a a̱sa̱ka̱ yi kataɓa.
A ka kara̱sa ta̱ ikyamba i ne,
aku akina a koruso a lya yi gba̱.
17 Ngono kupa mi ma yan ta̱ nala kpaci Kashila̱ ka ka zuwai gba̱ afoɓi a ne a shaɗangu.
Adama a nala a ka wushuku ta̱ a na̱ka̱ kadin ki ucira n tsugono tsu le.
A ka na̱ka̱ ta̱ kadin ki karinga̱ hal she Kashila̱ ka zuwa afoɓi a ne a shaɗangu.
18 Uka ɗa vu wenei vi,
ilyuci i pige i ucira iꞌya,
iꞌya magono ma ne ma lya tsugono tsu ngono n likimba gba̱.”