Katsumate ka zuba n maku ma tagara̱da
10
Aku n wenei kpam kuwene,
katsumate ka zuba ka ucira ka̱ri ucipa̱ a iyamba.
U wambanai kalishi yavu kunya,
n kasomini zuba n kaci ka ne.
Upetiwaꞌeshi u ne wa laɗa yavu kaara,
aꞌene a ne kpam yavu adawatsu a akina.
2 Wa ɓa̱na̱ maku ma tagara̱da ma ma̱ri uba̱ra̱kpi.
U shamgbai n kune ku ulyaki ku ne a kushiva̱,
ka ugula̱ kpam a kagiɗa.
3 U wura̱ngi yavu gabako.
An u wura̱ngi,
aku mkpankashila̱ n shindere n wushuki.
4 An mkpankashila̱ mi n wushuki,
mpa na̱ n cigi n gita̱ ikorongi,
aku n panai kala̱ga̱tsu a zuba ka danai,
“Sokongu ili iꞌya mkpankashila̱ n shindere mi n danai vi,
kotsu vu korongu iꞌya wa.”
5 Katsumate ka zuba ki ka ra̱ɗa̱gba̱i kukere ku ulyaki ku ne ubana a zuba.
6 Aku u tsinai n kala ka Kashila̱,
ka ka̱ri n uma hal ubana bawu utyoku,
uza ɗa u yain zuba n ili iꞌya iꞌa̱ri a asuvu a le,
n iyamba n ili iꞌya iꞌa̱ri a asuvu a le,
n kushiva̱ n ili iꞌya iꞌa̱ri a asuvu a le gba̱,
ukuna u maci u ɗa wa tono.
U da,
“Kashila̱ ka ɓa̱ra̱kpa̱ wa,
aku u yain ili iꞌya u foɓusoi.
7 Shegai katsumate ka zuba ka shindere ki ka fula̱ baci kavana ka ne,
Kashila̱ ka yan ta̱ ili iꞌya wa̱ri u sokongi hal utuwa̱ gogo‑na vi,
tyoku ɗa u tonukoi agbashi a ne,
ntsumate.”
8 Kala̱ga̱tsu ka doki ka isa̱ mu:
“Wala vu ba vu wushi tagara̱da u ɗa wa̱ri uba̱ra̱kpi vi,
u ɗa katsumate ka zuba ka ɓa̱na̱ vi.”
9 Aku n banai a asu u katsumate ka zuba ki,
n tonuko yi u na̱ka̱ mu maku ma tagara̱da mi.
Aku u tonuko mu,
“Wusha tagara̱da vi vu takuma u ɗa.
Wa yankpa ta̱ a una̱ u vunu yavu ishigi,
shegai wa vura̱ vu ta̱ katsuma̱.”
10 N wushai tagara̱da u ɗa wa ɓa̱na̱ vi n takumai.
U yankpa ta̱ cika yavu ishigi a una̱ u va̱,
shegai an n soɗugi u ɗa,
aku u vura̱ mu katsuma̱.
11 A tonuko mu kpam,
“U ka̱na̱ ta̱ vu doku vu tonuko ama ili iꞌya Kashila̱ ka foɓusoi u yanka ama n iyamba n aletsu kau‑kau,
na̱ ngono gba̱.”