Awenishiki a kaɓan
2
Aꞌayin a ɗa a wurai,
a yan ta̱ ntsumate n kaɓan aza ɗa a yain kadyanshi a asuvu a Isaraꞌila,
nala kpam a asuvu a ɗe ya tsa̱ra̱ awenishiki a kaɓan.
A ka yan ta̱ manyan n ugboji a tuko kaɓan ka ka tuko kunangasu a kaci ka Kashila̱.
A ka ꞌya̱nga̱sa̱ka̱ ta̱ Ashekapige,
uza ɗa u wauwa le.
Ele n kaci ka le dem a ka ɓa̱ra̱kpa̱ n uwusha u ukpa̱ wa.
2 Ama ushani a ka tono ta̱ uwenishike u cingi u le,
aku a toni ukuna u gbani u uwono u le.
Adama a le ama a ka dansa ta̱ kadyanshi ka gbani a kaci ka Kawauwi n uwenishike u mayun u ne.
3 Awenishiki a na yi aꞌa̱ ta̱ n kurura,
kpam a tsu yanka ta̱ ugboji n kaɓan manyan a ryafa ɗa̱.
Shegai Kashila̱ ka bidya ta̱ u wacinsa le tun caupa kpam ukpa̱ u le wa̱ ta̱ a ure.
4 Kashila̱ ka jebige atsumate a zuba mavura aꞌayin a ɗa a yain unyushi u cingi wa.
U tsu varangu le ta̱ a asu upana u ikyamba kpam a asuvu a aꞌele a lyungu-lyungu a karimbi,
nte a ka rongo pini hal aꞌayin a afada.
5 Kashila̱ ka jebige ama mavura a likimba aꞌayin a cau a Nuhu wa.
U wauwa ta̱ Nuhu n ama a shindere aza a kuwa a ne.
Nuhu rono ta̱ ama atsuvu a kaci ka afada a maci a Kashila̱,
pini nala,
Kashila̱ ka cimbusa̱i gba̱ likimba n ama a cingi yi n mini ma pige.
6 U doki u yain ilyuci i Sodom n Gomora mavura u daɓai iꞌya u gonukoi iꞌya kakomo.
U zuwai a wokoi iryoci a ili iꞌya ya gita̱ n aza ɗa a kpa̱ɗa̱i upana̱ka Kashila̱.
7 Shegai gba̱ n nala,
Kashila̱ ka wauwa ta̱ Lutu.
Lutu vuma ɗa rongoi n Kashila̱ mai ɗa,
kpam u pana kayanyan ka ukuna u gbani n u cingi u ɗa a ka yansa a asu u ɗa wa̱ri vi wa.
8 An u wokoi vuma ɗa uza ɗa wa pana Kashila̱ karinga̱,
u dambula ta̱ a asuvu a ne cika an u wenei tsicingi kpam wa pana̱sa ukuna gbani kain dem.
9 Ili i na i wenike ta̱ an Kashila̱ ka fuɗa ka wauwa ama ɗa a ka tono yi mai a asuvu a upana u ikyamba u ɗa a ka pana̱sa.
Ili yi ya wenike ta̱ dem an Kashila̱ ka ka̱na̱ ama ɗa a ꞌyuwan yi una̱ka̱ karinga̱,
kpam wa lya ta̱ kelime n uyan le mavura hal ubana kain ka afada.
10 Kashila̱ ka doku ta̱ upana u ikyamba u ama ɗa a ka tono uciga u ili i ikyamba i le kpam a ꞌyuwan yi una̱ka̱ karinga̱.
Icun i ama a na yi aꞌa̱ ta̱ n ara̱ɗi kpam a bidya kaci ka le evu wa.
Hal gba̱m a tonusukoi tsupige tsu aza a zuba kadyanshi ka gbani,
kpam a tsu wece kain ka a ka yan nala wa.
11 Shegai atsumate a zuba a la ta̱ ama a na yi ucira cika,
kpam gba̱ n nala atsumate a zuba yi a tsu tonusuko tsupige tsu aza a zuba a nala yi kadyanshi ka gbani a kapala ka Kashila̱ wa.
12 Ama a na a aꞌa̱ ta̱ tyoku u nnama n mete n ɗa bawu n tsu yan majiyan.
N ɗa a matsai tsa̱ra̱ a ka̱na̱ a wuna.
A tsu tonuko ta̱ ili iꞌya bawu a revei kadyanshi ka gbani.
Ahali a cingi a le a ɗa a ka wuna le.
13 A ka wusha ta̱ ukpa̱ u woko katsupi ka malen ma manyan ma le adama a ukuna u cingi u ɗa a ka yansa̱ka ama.
A tsu yan ta̱ maza̱nga̱ aꞌayin a ɗa a ka yan ukuna u cingi ko n kaara ka baci.
A tsu tuko ta̱ uwono a kaɓolo ka ɗe,
a gonuko ɗa̱ aza a ashinda̱.
A tsu lya ta̱ kelime n a yanyi ukuna u kaɓan u na vi ko a ka lya baci ilikulya kaɓolo n a̱ɗa̱ a asu u abiki.
14 A tsu yan ta̱ tsishankala n aꞌeshi a le,
kpam a tsu cuwa̱ n uyan unyushi wa.
A tsu kpatala̱sa ta̱ aza ɗa bawu a shamgbai a asu u te a yain unyushi.
A tsu wenishike ta̱ kaci ka le kurura,
ele aza ɗa a yankai una̱ a ɗa.
15 A a̱sa̱ka̱ ɗe ure u maci a tonoi ure u matsumate Balaꞌam maku ma Beyu.
Balaꞌam vuma ɗa uza ɗa u lai uciga ikebe a asu uyan ili iꞌya bawu i gain. a
16 Shegai makparyagi ma ɓarana ta̱ Balaꞌam.
Manama ma bawu ma tsu dansa,
ma dana ta̱ ukuna yavu vuma ma ɓishinkai matsumate mi uyan ijan i ne.
17 Ama a na aꞌa̱ ta̱ yavu aꞌeshi a mini a ɗa a ekpei.
Tyoku u alishi a ɗa a tsu kyawunsa a zuba a uwule ɗa aꞌa̱ri.
A tsu yan ta̱ kazuwamgbani cika shegai ko i te a tsu shaɗangu wa.
Kashila̱ ka zuwa ta̱ icun i ama a na yi a asu u ɗa u lakai karimbi.
18 Ama a na yi a tsu yan ta̱ ara̱ɗi n kadyanshi ka gbani.
Vuma wa yan baci evu n uꞌa̱sa̱ka̱ ure u cingi,
ama na yi a ka yanka ta̱ kurura ku cingi ku le manyan a gonuko yi a ure u cingi.
19 A yanka ta̱ ya dem kazuwamgbani ka utsa̱ra̱ u kaci,
shegai ele dem agbashi a uyansa ukuna u cingi a ɗa,
kpaci ama agbashi a ili iꞌya ya tono n ele a ɗa.
20 Ama a ka tsa̱ra̱ ta̱ iwauwi a ili i likimba iꞌya ya nangasa le,
a tuwa̱ baci a asu u Asheku a tsunu Yesu Kirisiti Kawauwi.
Shegai ili i nala yi i doku baci i ka̱na̱i ama a nala yi pini,
hal i lyai kaci ka ama ki,
upana u ikyamba u le wa la ta̱ upana u ikyamba u cau.
21 Wa̱ri wa laka ta̱ ama a nala tsulobo aꞌa̱ri a kpa̱ɗa̱ baci ureve ili iꞌya ya zuwa Kashila̱ upana u kayanyan.
U lobono wa,
ko kenu,
uza u reve ili iꞌya i gain u yain,
aku u ꞌyuwan kadyanshi ka uwulukpi ka shinga ka Kashila̱ ka na̱ka̱ le a yain.
22 Ili iꞌya iꞌa̱ri i mayun a asuvu a tsizagaɗi tsu na tsi,
i mayun iꞌya dem a asu u ama a na yi,
“Mashe ma tsu gono ta̱ tsa̱ra̱ ma lyai tsishami tsu ne.”
Tsizagaɗi tsu roku kpam tsu dana ta̱,
“A sumba̱ baci maburusunu,
ma gono ta̱ a asu u icaɗi.”