3 An tsa̱ri n upityanangu,

ɗa i zuwa tsu tsu reve an a asu u kadyanshi ɗa Kashila̱ ka yain likimba n ili iꞌya iꞌa̱ri pini gba̱.

An u yain nala,

u yain manyan n ili iꞌya bawu uza wa wene,

tsa̱ra̱ u yain iꞌya tsa wene.

4 An Habila wa̱ri n upityanangu,

ɗa i zuwai u yain uɗara̱kpa a ure u ɗa u lai u Kayinu tsulobo ubana a asu u Kashila̱.

Kashila̱ ka danai u pana ta̱ kayanyan ka kune ku ne,

aku u isa̱ yi vuma u maci.

Ko an u wokoi Habila kuwa̱i caupa,

aya pini wa dansa ara tsunu adama upityanangu u ne.

5 An Anuhu wa̱ri n upityanangu,

ɗa i zuwai Kashila̱ ka canga yi ubana a zuba bawu u kuwa̱i.

A wene ikyamba i ne wa,

an Kashila̱ ka canga yi ka laza̱ga yi vi.

Tagara̱da u Kashila̱ u danai,

kahu Kashila̱ ka canga yi ubana a zuba,

u zuwa ta̱ Kashila̱ ka panai kayanyan ka ne.

6 Upityanangu wa̱ baci la wa,

uza wa̱ la wa zuwa Kashila̱ ka pana kayanyan wa.

Uza ɗa baci dem wa tuwa̱ a asu u Kashila̱,

u ka̱na̱ ta̱ u yain n upityanangu an Kashila̱ ka̱ri n uma,

kpam u wushuku an Kashila̱ ka wenike kaci ka ne tyoku u katsupi a asu u uza ɗa baci dem wa bolo yi mayun.

7 An Nuhu wa̱ri n upityanangu,

ɗa i zuwai u panai an Kashila̱ ka rono yi atsuvu a ili iꞌya bawu kotsu u wenei.

U pana̱kai Kashila̱ kpam u shei kpatsu ku pige tsa̱ra̱ u wauwa aza a kuwa a ne.

Asu u upityanangu u ne u ɗa,

u wenikei likimba an a nusai,

kpam asu u upityanangu u ne u ɗa u wokoi asuvu a aza ɗa a gonukoi ama a maci a asu u Kashila̱.

8 An Ibirahi wa̱ri n upityanangu,

ɗa i zuwai u pana̱kai an Kashila̱ ka isa̱ yi u bana a asu u roku u ɗa Kashila̱ ka yain kazuwamgbani wa na̱ka̱ yi.

U a̱sa̱ka̱i uyamba u ne,

kpam u reve asu u ɗa wa bana wa.

9 An Ibirahi wa̱ri n upityanangu,

ɗa i zuwai u rongoi a iyamba i kazuwamgbani tyoku u kamoci a uyamba u tsumoci.

U rongoi pini a katani,

nala dem Ishaku n Yakubu aza ɗa a lyai agadu a ne,

Kashila̱ ka na̱ka̱ le ucun u kazuwamgbani ka te.

10 Ibirahi yain nala an wa vana u uwa ilyuci i pige iꞌya Kashila̱ ka foɓusoi kpam u mai iꞌya ya rongo ubana.

11 An Saratu kaɓolo n Ibirahi aꞌa̱ri n upityanangu,

ɗa i zuwai a tsa̱ra̱i maku ko an u wokoi a kutsai cika kpam Saratu madari ma.

Ibirahi pityanangu ta̱ Kashila̱ ka yan ili iꞌya u yain kazuwamgbani.

12 Vuma u na u kutsa wa wa,

eyi n kakushe una̱ u te u ɗa aꞌa̱ri,

shegai gba̱ n nala u wokoi makoshi ma cau ma ama ushani.

Mayun,

aꞌa̱ ta̱ n kakuma̱ ushani tyoku u atala a zuba ko tani kayala ka ikengi i kushiva̱,

kpam aꞌa̱ri ukece wa.

13 Gba̱ ama a na a ɗa aꞌa̱ri n upityanangu vi a kuwa̱i bawu a wushai ili iꞌya Kashila̱ ka yanka le kazuwamgbani.

A yan ta̱ ipeli an a wenei ili i na yi ya tuwa̱,

ko iꞌa̱ri mɓa̱ri.

A da ele amoci a ɗa a likimba u na.

14 Ama a dana baci ili icun i nala,

wenike ɗa a wenikei a ka bolo uyamba u roku u ɗa wa woko u le.

15 Aꞌa̱ri a ka yawunsa baci a kaci ka uyamba u ɗa a a̱sa̱ka̱i vi,

ko i te iꞌa̱ri ya ɓishinka le ugono pini wa.

16 Shegai asu u ɗa u lai tsulobo u ɗa a ka bolo.

U ɗa pini a zuba.

Ili iꞌya i zuwai bawu Kashila̱ ka tsu pana uwono a isa̱ yi baci Kashila̱ ka le,

kpaci u foɓusuko le ta̱ ilyuci i pige.

17 An Ibirahi wa̱ri n upityanangu,

ɗa i zuwai wa̱ri ufoɓusi u yain uɗara̱kpa n Ishaku an Kashila̱ ka kondo yi.

Ibirahi ɗa Kashila̱ ka yankai kazuwamgbani ki,

shegai u foɓuso ta̱ u na̱ka̱ maku ma te ma ne koshi tyoku u uɗara̱kpa.

18 Caupa,

Kashila̱ ka tonuko yi ta̱,

“Mmuku n tsikaya n ɗa n yanka vu kazuwamgbani ki a asu u Ishaku u ɗa a ka wuta̱.” ^a

19 Ibirahi bidya ta̱ Ishaku kuwa̱ baci,

Kashila̱ ka fuɗa ta̱ ka ꞌya̱nga̱sa̱ yi u woko kpam n uma.

U woko ta̱ yavu a asuvu a akushe a ɗa u gonoi u tsa̱ra̱i Ishaku vi.

20 An Ishaku wa̱ri n upityanangu,

ɗa u zuwukai mmuku n ne n re,

Yakubu n Isuwa una̱ u shinga.

U reve ta̱ Kashila̱ ka yanka le ili i shinga a kapala.

21 An Yakubu wa̱ri n upityanangu,

ɗa i zuwai an u yain evu n ukpa̱ u pityanangi n kalangu ka ne u lyakai Kashila̱ kayala,

kpam dem u zuwukai mmuku n re n Isuhu una̱ u shinga.

22 An Isuhu wa̱ri n upityanangu,

ɗa i zuwai an u yain evu n ukpa̱ u yain kadyanshi ka aꞌayin a ɗa aza a Isaraꞌila a ka a̱sa̱ka̱ Masar.

Aku u tonuko le a pura̱ atele a ne a ka laza baci.

23 An isheku i Musa iꞌa̱ri n upityanangu,

ɗa a sokongu yi uwoto u tatsu an a matsa yi.

A wenei Musa lobono wa wa,

kpam a pana uwonvo u ɗa a ka ꞌyuwan utono udani u magono wa.

24 An Musa wa̱ri n upityanangu,

ɗa i zuwai an u gbonguroi u ꞌyuwain a isa̱ yi maku ma makere ma magono ma Masar.

25 U ɗanga̱sai u soi mavura n ama a Kashila̱,

n u ɗa wa pana kayanyan ka unyushi u cingi ka aꞌayin kenu.

26 U yawunsai,

u la ta̱ tsulobo u soi mavura adama a Kawauwi,

n u ɗa wa tsa̱ra̱ kuzuwate ku Masar gba̱,

kpaci katsupi ka Kashila̱ ka ka tuwa̱ ka wa vana.

27 Adama a upityanangu u ne,

u a̱sa̱ka̱i Masar,

kpam u pana uwonvo u upan u magono wa.

Musa lyai kapala n akawunki yavu wa wene Kashila̱ ka bawu uza wa wene.

28 Adama a upityanangu u ne,

u foɓusoi Abiki a Upasamgbana u vishana̱sai mpasa a apashi a re gba̱ n a zuba u utsutsu u kuwa,

tsa̱ra̱ kawuni ka ka tuko ukpa̱ u wuna mmuku n kagita̱ ma Isaraꞌila wa.

29 An aza a Isaraꞌila aꞌa̱ri n upityanangu,

ɗa a pasai Mala ma Shili a iyamba i ekpi.

Shegai an aza a Masar a tonoi,

gba̱ le a kuwa̱i asuvu a mini.

30 An ama a Kashila̱ aꞌa̱ri n upityanangu,

ɗa a kyawunsai ilyuci i Jeriko aꞌayin a shindere,

aku kasaga ki ka wa̱sa̱i.

31 An Raha kashankala wa̱ri n upityanangu,

ɗa i zuwai u wushai aza a ukyawunsa iyamba aza a Isaraꞌila.

Ili iꞌya gai i zuwai bawu a wuna yi an a wunai aza ɗa a ꞌyuwain upana̱ka Kashila̱ ɗa la vi.

32 Ndya wa̱ kpam ma doku n dana?

Ma̱ n aꞌayin a ɗa ma yan kadyanshi a kaci ka Gidiyo,

n Baraku,

n Somso,

n Jafita,

n Dawuda,

n Samaꞌila na̱ ntsumate wa.

33 Aza ɗa upityanangu u le u zuwai a lyasai iyamba ushani n kuvon.

A yain ili iꞌya iꞌa̱ri dere aku a wushai ili iꞌya Kashila̱ ka yain kazuwamgbani.

A kimba̱i ana̱na̱ a igabako. ^b

34 A cimbusa̱i akina a kasuɗugbate.

A lai a akere a aza ɗa a ka ciga a wuna le n iburundu.

Ko an u wokoi aꞌa̱ n ucira wa,

a wokoi aza a ucira.

Acirani a ɗa a asu u kuvon kpam a wacinsai asoje a amoci.

35 A gonunko ta̱ aka a roku akushe a le n uma a ɗa aꞌa̱ri a kuwa̱i.

Ama roku a so ta̱ mavura cika,

shegai gba̱ n nala a ꞌyuwan ta̱ uwusha utsa̱ra̱ u kaci u ɗa a ka na̱ka̱ le,

tsa̱ra̱ a tsa̱ra̱ uꞌya̱nga̱sa̱ u ɗa u lai tsulobo.

36 A yankai aza ɗa a wushuki n Kashila̱ majari a caɗa le,

a sira̱sai ama a roku n ikani kpam a ukusa le a kuwa ku aꞌali.

37 Aza roku a kuwa̱i an vara̱sa le n atali.

Aza roku a kuwa̱i an a kiɗamgbana le mere-mere.

A wunai aza roku n iburundu.

Aza roku aꞌa̱ n ili i uka wa,

she abaci a ikpan i nlala.

A rongoi n unambi,

n a sukuta̱si le,

n magori.

38 Ama a na a rongo ta̱ mai,

hal gba̱m likimba u ra̱tsa a rongo pini wa.

A gengei a kakamba na̱ nsasa,

a kpawunsai a aꞌaɓuru n aꞌele a iyamba.

39 Ama a na yi gba̱ a zuwai Kashila̱ ka panai kayanyan adama upityanangu u le!

Shegai ko n nala a kuwa̱i bawu a wushai ili iꞌya Kashila̱ ka yain kazuwamgbani.

40 Kashila̱ ka foɓusuko tsu ta̱ ili iꞌya i lai i le tsulobo,

tsa̱ra̱ a zuwa a woko uwulukpi kaɓolo n a̱tsu tyoku ɗa u gain tsu woko,

shegai ele koshi wa.