5
Ama a va̱,
ili iꞌa̱ la ya zuwa mu n koronku ɗa̱ ko niɗa ko nwere ɗa ikuna i na yi ya gita̱ wa,
2 kpaci i reve ta̱ mai kain ka Asheku a ka tuwa̱ wa woko ta̱ tyoku ɗa kaboki ka tsu tuwa̱ n kayin.
3 Aꞌayin yi,
ama a ka dana ta̱,
“Tsa̱ ta̱ na̱ ndishi n shinga kpam tsa̱ n ukuna wa,”
kute‑kute aku upana u ikyamba u rukpa̱ le,
tyoku ɗa uka u katsuma̱ u tsu pana mɓa̱la̱ ilimaci ya rawa yi baci.
Asu wa̱ la u ɗa ama a ka la a upana u ikyamba u nala vi wa.
4 Ama a va̱,
iꞌa̱ri a asuvu a karimbi a ikuna i na yi wa,
kpam kotsu i yain majiyan ma kain ka baci kain ka Asheku ka tuwa̱ ɗa̱ tyoku u kaboki wa.
5 Kpaci eɗa̱ mmuku n katyashi n ɗa kpam aza kaara.
A̱tsu aza a karimbi n kayin a ɗa wa.
6 Adama a nala she i wundi mai,
kotsu i lavuta tyoku u aza ɗa a buwai wa.
Shegai i rongo n uma kpam n uka̱na̱ u kaci.
7 N kayin ka a tsu lavuta,
aza ɗa kpam a tsu so n kayin ka a tsu so hal a tamgbala̱ka.
8 Shegai a̱tsu aza ɗa tsa̱ri a asuvu a katyashi u gan ta̱ tsu ka̱na̱ kaci ka tsunu.
Aꞌayin a ɗa baci Kala̱pa̱nsi ka shila̱ka̱na̱ n a̱tsu,
tsu lyai kapala n upityanangu n Yesu n uciga u ama,
tyoku ɗa kasoje ka tsu uka mara̱ga̱ a makamba.
Tsu zuwa uma u ɗa Yesu wa wauwa tsu,
tyoku ɗa kasoje ka tsu uka makun ma kuvon.
9 Tsu yain ili i nala yi kpaci Kashila̱ ka bidya ta̱ ka wauwa tsu a akere a Yesu Kawauwi Asheku.
U bidiga kaci ka ne u tsungu upan u ne ara tsunu wa.
10 Ko a̱tsu n uma ko a asuvu a ukpa̱ aꞌayin a ɗa baci u gonoi tsa rongo ta̱ n eyi bawu utyoku,
kpaci Yesu Asheku u kuwa̱ ta̱ adama a tsunu.
11 Adama a nala,
kotsu i gbamatangu atakasuvu a atoku a ɗe,
i rongo a una̱ka̱sa̱ atoku a ɗe adooki,
dere tyoku ɗa iꞌa̱ri uyansa.
Uwenishike u makorishi
12 Ama a va̱,
na̱ka̱i azapige a ɗe tsupige aza ɗa aꞌa̱ri a asuvu a manyan ma Asheku.
A yan ta̱ manyan cika a asuvu a ɗe,
kpam a tonuko ɗa̱ ta̱ ili iꞌya bawu i gain i yain.
13 Na̱ka̱i ama a na yi karinga̱ cika kpam i cigi le cika adama a manyan ma le.
I rongo kpam na̱ ndishi mai n atoku.
14 Ama a va̱,
u ka̱na̱ ta̱ i roni atsuvu a awonvoli.
Gbamatangi aza a uwonvo.
I ɓa̱nga̱ aza ɗa bawu aꞌa̱ri n ucira,
ya dem yanyi ahankuri n eyi.
15 I kirana kotsu a tsupa ukuna u cingi n ukuna u cingi wa,
shegai aꞌayin dem i ma̱tsa̱ i yain ili i shinga a asu u atoku a ɗe n ama gba̱.
16 Kain dem i yain maza̱nga̱.
17 Rongoi uyan kavasu bawu ubula̱.
18 Ko ndya baci i gita̱i i cikpa Kashila̱,
kpaci tyoku ɗa Kashila̱ ka ciga u ɗa la vi,
kpam eɗa̱ ama a Yesu Kawauwi a ɗa.
19 Kotsu i ka̱ngu Kulu Keri wa.
20 Kotsu i goro kadyanshi ka Kashila̱ ka ka wutusa̱ a una̱ u Atoni wa,
21 shegai i kondo ili iꞌya a danai gba̱.
Shamkpai ili iꞌya iꞌa̱ri i shinga.
22 Sumai gba̱ ili iꞌya iꞌa̱ri i cingi.
23 Tsu reve ta̱ Kashila̱ aya uza ɗa u tsu na̱ka̱ ndishi n shinga.
Kavasu ka va̱ ka u wulukpe ɗa̱ a ili dem.
A̱sa̱ka̱ u ɓishinka kulu ku ɗe,
n uma u ɗe,
n ikyamba i ɗe uyan u unyushi u cingi ko a ure u eni u ɗa baci,
hal Yesu Kawauwi Asheku u gono.
24 Uza ɗa u ɗanga̱sa ɗa̱ u rawa ta̱ i wushuku n eyi,
kpam wa yan ta̱ nala.
25 Ama a va̱,
yanka tsu kavasu.
26 Dana̱sai Atoni n uwambatsa u uwulukpi.
27 N tonuko ɗa̱ ta̱ a asuvu a ucira u Asheku i yanka gba̱ Atoni ka̱neshi u ukanikorongi u na vi.
28 Ma ciga ta̱ Asheku a wenike ukuna u shinga u ne a asu u ɗe gba̱.