Bulus n asuki a kaɓan
11
Ma ciga ta̱ i yanka mu ahankuri aꞌayin a ɗa baci n yain maku ma utengeshi.
Mayun n folo ɗa̱ ta̱ i yanka mu ahankuri.
2 Ma kirana ta̱ n a̱ɗa̱ cika tyoku ɗa Kashila̱ ka kirana n a̱ɗa̱.
Iꞌa̱ ta̱ tyoku u maku ma uka ma bawu ma revei vali,
uza ɗa a yankai kazuwamgbani ka iyolo i vali u te koshi;
wata,
Kawauwi ka la vi n kaci ka ne.
3 Shegai gogo‑na ma pana ta̱ uwonvo u ɗa a ka puwunsa̱ atakasuvu a ɗe tsa̱ra̱ i a̱sa̱ka̱ utono Kawauwi mayun mayun n uwulukpi,
tyoku ɗa kali ka yinsa̱i Hawa n ugboji u cingi u ne.
4 Tsu tonuko ɗa̱ ta̱ ukuna u Yesu,
kpam i wushai Kulu Keri,
i wushuki kpam n akani a tsunu.
Shegai i a̱sa̱ka̱i aza roku a tonuko ɗa̱ ukuna u roku kau n u Yesu.
Gogo‑na ufoɓusi u ɗa iꞌa̱ri i wushi kulu ku roku ɗe kau,
i wushi kpam akani a roku.
5 N wene aza ɗa a ka isa̱ kaci ka le “asuki a pige” a la mu wa.
6 Gaawan n tsu dansa karkar tyoku u le wa,
shegai n reve ta̱ ili iꞌya ma dansa.
Tsu yan ta̱ gba̱ iꞌya tsa yan tsu wenike ɗa̱ ili i na yi mai.
7 N zuwa ɗa̱ i tsupa mu adama a Kadyanshi ka Shinga ka n yanka ɗa̱ kuɓari wa.
N gonuko ta̱ kaci ka va̱ kenu,
aku n na̱ka̱ ɗa̱ tsupige.
An n yain nala vi,
n nusa?
8 An aꞌuwa a Atoni a roku a ka na̱ka̱sa̱ mu ikebe,
u woko ta̱ yavu bokuso ɗa ma bokuso ikebe yi tsa̱ra̱ n gbashika ɗa̱.
9 N namba baci ili aꞌayin a ɗa ma̱ri n a̱ɗa̱,
n tsu tonuko ɗa̱ i ɓa̱nga̱ mu wa.
Atoku a ɗa a wuta̱i a Masidaniya a tuwa̱i pini na,
a na̱ka̱ mu ta̱ gba̱ ili iꞌya ma ciga.
N taɓa ɗa̱ ufolo i ɓa̱nga̱ mu wa,
kpam ma folo ɗa̱ wa.
10 Ko uza wa̱ la a asuvu a uyamba u Akataya uza ɗa wa ɓishinka mu uyansa kadyanshi a kaci ka ili i nala wa.
N dana ta̱ kpam nala adama a ukuna u mayun u Kawauwi u ɗa wa̱ri a asuvu a va̱.
11 N dana baci ma ciga n zuwuka ɗa̱ ara̱ji wa,
u woko yavu ma ciga ɗa̱ wa?
Nala wa.
Ko Kashila̱ ka reve ta̱ ma ciga ɗa̱.
12 Kpam ma lya ta̱ kelime n uyan ili iꞌya ma yan gogo‑na vi,
kpaci ma ciga ta̱ n ɓishinka ama a nala utsa̱ra̱ u ili iꞌya a ka yanka ara̱ɗi.
A ciga ta̱ a dana manyan ma a ka yanka ara̱ɗi yi ma̱ ta̱ una̱ u te n ma tsunu.
13 Ama a na yi asuki a kaɓan a ɗa.
Manyan ma le ma a tsu yanka kaɓan,
aku a gonukoi kaci ka le tsa̱ra̱ a rotso asuki a mayun a Kawauwi.
14 Shegai mpa n yan majiyan ma ili i nala wa!
Ko Kanangasia ka gonuko ta̱ kaci ka ne tsa̱ra̱ u rotso katsumate ka zuba ka katyashi.
15 Adama a nala,
tsu yan majiyan an agbashi a Kanangasi a gonukoi kaci ka le a rotso agbashi a ɗa a ka yan manyan ma ukuna u shinga wa.
Shegai a makorishi a ka tsa̱ra̱ ta̱ mavura dere n ili iꞌya a yain.
Upana u ikyamba u Bulus
16 A̱sa̱ka̱ n doku n tonuko ɗa̱:
Ko uza kotsu u wundi yavu mpa katengeshi ka wa.
Shegai nala baci ya wundya,
she i pana̱ka mu tyoku ɗa ya pana̱ka katengeshi,
mpa dem aku n yain ara̱ɗi kenu.
17 Aꞌayin a ɗa baci ma cikpala kaci ka va̱ nala,
tyoku u Asheku u ɗa n tsu dansa wa,
shegai tyoku u katengeshi.
18 Ama ushani a ka yan ta̱ ara̱ɗi a kaci ka ili iꞌya a yain a likimba.
Adama a nala mpa dem ma yan ta̱ ara̱ɗi.
19 Eɗa̱ aza ɗa ya wundya yavu iꞌa̱ n ugboji,
i tsu pana ta̱ kayanyan ka upana kadyanshi ka atengeshi.
20 I tsu yan ta̱ gba̱m ahankuri n aza ɗa a tsu gonuko ɗa̱ agbashi a le,
ko a ryafusa ɗa̱,
n aza ɗa a tsu yinsa̱sa̱ ɗa̱.
I tsu yan ta̱ dem ahankuri n aza ɗa a tsu wundya yavu a la ɗa̱,
ko aza ɗa a tsu ɓasa̱sa ɗa̱.
21 N tsu pana ta̱ uwono n dana tsa̱ n ucira u ɗa tsa yan nala wa.
A ka yan baci ara̱ɗi,
mpa dem ma yan ta̱,
shegai utengeshi u ɗa uyan nala vi.
22 A dana baci ele kagali ka Ibirahi ka,
mpa dem uza u kagali ka Ibirahi ka.
Ele aza a Isaraꞌila a ɗa baci,
mpa dem nala.
Ele mmuku n tsikaya m Ibirahi n ɗa baci,
mpa dem nala.
23 Ele agbashi a Kawauwi a ɗa baci,
wa woko mu ta̱ utengeshi n dansa baci nala.
Shegai tyoku ɗa ma gbashika yi u la ta̱ tyoku ɗa ele a ka gbashika yi.
N yan ta̱ manyan cika ma ma lai ma le.
A zuwusa mu ta̱ a kuwa ku aꞌali hal u lai tyoku ɗa a zuwusa le.
Malapa ma a lapusa mu ma la ta̱ ma a lapusai ele.
N yansa ta̱ evu n ukpa̱ aꞌayin ushani.
24 Aza a Yahuda a bawan mu ta̱ n kajaɓu hal kamankupa n kuci.b
Kutawun ka gba̱m a bawan mu nala.
25 Aza a Roma a lapusa mu ta̱ n alangu,
kutatsu ka gba̱m a yanka mu nala.
A taɓa mu ta̱ uvara̱sa n atali tsa̱ra̱ a wuna.
N so ta̱ nwalu a kpatsu,
kpatsu ku ta̱sa̱ ta̱ na̱ mpa hal kutatsu.
N taɓa ta̱ urukpa̱ a mini n kuvuli hal ubana kuvuli ku roku.
26 Nwalu n kakuma̱ mi,
n tsu zuwa mu ta̱ n yain evu n ukpa̱ adama a uwaya u mini n adama a aza a maga̱la̱ka̱.
N yan ta̱ evu n ukpa̱ adama a ama a va̱,
aza a Yahuda,
kpam hal n Awulawa.
N tsu yan ta̱ evu n ukpa̱ a ilyuci ilyuci,
n a kakamba,
hal n mala dem.
N yan ta̱ dem evu n ukpa̱ adama a aza ɗa a danai ele Atoni a ɗa,
shegai Atoni a ɗa wa.
27 N yan ta̱ manyan cika hal n togbolukoi,
aꞌayin ushani n tsu lavuta gba̱m wa.
N tsu ronguso ta̱ n kambulu n kakuli,
kpam aꞌayin ushani n tsu tsa̱ra̱ ilikulya wa.
N soso ta̱ kuta̱nu kpaci ma̱ n aminya a uꞌuka cika wa.
28 Hal n ara gai,
kain dem u tsu woko ta̱ yavu va da n canga ta̱ ucanga u ara̱ji kpaci n tsu ɓa̱la̱ ta̱ asuvu adama a aꞌuwa a Atoni.
29 Aꞌayin a ɗa baci bawu aza roku aꞌa̱ri n ucira,
n tsu woko ta̱ dem bawu ucira.
Asuvu a tsu suɗugba mu ta̱ aꞌayin a ɗa baci n wenei a yinsa̱i uza roku tsa̱ra̱ u yain unyushi.
30 U ka̱na̱ baci n cikpala kaci ka va̱,
ma yan ta̱ nala adama a ili iꞌya i zuwa mu n woko bawu ucira.
31 Kashila̱ ka reve ta̱ kaɓan ka ma yan wa.
Aya Kashila̱ n Tata u Yesu Kawauwi Asheku,
uza ɗa a ka cikpala hal ubana bawu utyoku.
32 An ma̱ri a Damasuka,
uza ɗa wa̱ri gomuna aꞌayin a ɗa Arita wa lya tsugono,
wa̱ri u ciga ta̱ u ka̱na̱ mu,
adama a nala,
u zuwa ta̱ aza a uwundya ukyawan a ilyuci yi.
33 Shegai aje a va̱ a zurala̱kpa mu a asuvu a mabana a ilinuku i kasaga ka ilyuci ki.
Tyoku ɗa n lai a akere a gomuna yi ɗa la vi.