Uwushika ama a Kashila̱ kune
16
Aꞌayin a ɗa baci ya wushika ama a Kashila̱ kune,
kotsu i yain tyoku ɗa n tonukoi aꞌuwa a Atoni a ɗa aꞌa̱ri a Galatiya.
2 Kain ka kagita̱ ka aꞌayin a shindere dem u ka̱na̱ ta̱ i foɓo ikebe i roku a ikengi a ili iꞌya i tsa̱ra̱i.
Zuwai iꞌya adama a kune.
I yan baci nala,
ya rongo ubana n i goni tsa̱ra̱ i wushi iꞌya aꞌayin a ɗa baci n rawai wa.
3 Ɗanga̱sai Atoni a roku a bidya ikebe yi ubana a Urishelima.
N rawa baci ma na̱ka̱ le ta̱ ukanikorongi u ɗa wa wenike an i wushuki n ele.
4 U lobono baci n bana dem,
tsa yan ta̱ nwalu mi kaɓolo.
Ili iꞌya Bulus wa ciga u yain
5 Ma kyawunsa baci a Masidaniya,
ma bana ta̱ n kondo ɗa̱.
6 Gaawan ma dusuku ta̱ n a̱ɗa̱ aꞌayin a re,
ko gba̱m hal ubana makorishi ma aꞌayin a kuta̱nu.
Aku i ɓa̱nga̱ mu n ka̱na̱ ure ubana asu u ɗa dem ma bana.
7 N rawa baci ara ɗe gogo,
ma ɓa̱ra̱kpa̱ wa.
Wa̱ri wa laka mu ta̱ n ɓa̱ra̱kpa̱ a ure kahu n rawa ara ɗe,
tsa̱ra̱ n tuwa̱ baci n ɓa̱ra̱kpa̱ n a̱ɗa̱ Asheku a wushuku baci.
8 Shegai ma shamgba ta̱ pini na a Afisu hal Abiki a Kain ka Amangarenkupa a wura.
9 Kpaci a kukpunka̱ mu ta̱ ure u pige u uyan manyan ma shinga,
kpam ama ushani a ka na̱ka̱sa̱ ta̱ kaci,
ko an u wokoi aza roku ushani a ka yan ta̱ tsilala n a̱tsu.
10 Aꞌayin a ɗa baci Timoti rawai,
wusha ni mai.
Wa yan ta̱ manyan ma Asheku tyoku u va̱.
11 Kotsu i a̱sa̱ka̱ uza roku u goro yi wa.
Na̱ka̱ ni una̱ u shinga u ɗe kpam i ɓa̱nga̱ yi u ka̱na̱ ure wa gono baci utuwa̱ ara va̱.
Ma vana yi ta̱ n aza roku a gono.
12 Gogo‑na,
a ukuna u utoku u tsunu Apolo.
N tonuko yi ta̱ u ɓolomgbono n atoku aꞌayin a ɗa baci a ka tuwa̱ ɗa̱ ukondo,
shegai u ciga u yain nala aꞌayin a na wa.
U tsa̱ baci kabala,
wa bana ta̱.
Bulus kotsoi ukanikorongi u ne
13 Rongoi ufoɓusi.
Ka̱na̱i upityanangu u ɗe gbam-gbam.
Kotsu i pana uwonvo wa.
Yanyi ucira.
14 Yanyi manyan ma ɗe gba̱ n uciga.
15 I reve ta̱ Isitifanu n aza a kuwa a ne alya a gita̱i a wokoi Atoni a Akataya,
kpam a neke ta̱ kaci ka le tsa̱ra̱ a gbashika ama a Kashila̱.
Ama a va̱ ma folo ɗa̱,
16 i toni ama a na n aza ɗa aꞌa̱ri tyoku u le i yain manyan n ele i pana̱ka le.
17 N pana ta̱ kayanyan an n wenei Isitifanu,
n Fara̱tunata,
n Akaiku.
A ɓa̱nga̱ mu ta̱ adama a ɗa bawu iꞌa̱ri pini.
18 A gbamatangu mu ta̱ cika,
n reve ta̱ dem nala a yanka ɗa̱.
Kpam u ka̱na̱ ta̱ i na̱ka̱ icun i ama a nala yi tsupige.
19 Aꞌuwa a Atoni a ɗa aꞌa̱ri pini na a uyamba u Asiya a ka sukunku ɗa̱ ta̱ idyani i le.
Akila n Bilikisu kaɓolo n ama a Kashila̱ a ɗa a tsu gawunsusa a kuwa ku le,
a ka sukunku ɗa̱ ta̱ idyani i le a asuvu a kala ka Asheku.
20 Gba̱ Atoni a Asheku a ka sukunku ɗa̱ ta̱ idyani i le.
Dana̱sai atoku a ɗe mai.
21 Mpa Bulus uza ɗa korongi idyani i na yi n kukere ku va̱.
22 N yan ta̱ kavasu Kashila̱ ka yanka uza ɗa baci dem bawu wa ciga Asheku una̱.
Kpam a̱sa̱ka̱ Asheku a tuwa̱ gogo.
23 A̱sa̱ka̱ ukuna u shinga u Asheku Yesu u rongo n a̱ɗa̱.
24 Ma ciga ta̱ gba̱ uza ɗa wa̱ri uza u Yesu Kawauwi.