Bulus ili i te iꞌya n asuki a ɗa a buwai
9
Mpa yaa ɗa ma̱ri.
Mpa kasuki ka.
N wene ta̱ Yesu Asheku a tsunu,
eɗa manyan ma Asheku a yain a akere a va̱.
2 Ko aza roku a bidya mu baci kasuki wa,
eɗa̱ i bidya mu ta̱ kasuki.
Eɗa̱ n kaci ka ɗe iꞌa̱ ta̱ kaɓolo n Asheku,
ili i nala iꞌya i wenikei an mpa kasuki ka.
3 Uwushuku u ɗa n wushunki aza ɗa a ka wecike ucira u va̱ u ɗa na:
4 Tsa̱ ta̱ n ucira u ɗa tsa wusha ilikulya adama a manyan ma tsu yain.
5 Asuki a ɗa a buwai n aꞌangu a Asheku,
n Bituru gba̱ aꞌa̱ ta̱ n aka aza ɗa aꞌa̱ri atoni a Kawauwi aza ɗa a soku le a nwalu n le.
Tsa̱ ta̱ n ucira u ɗa tsa yan dem nala.
6 U ka̱na̱ mpa n Bara̱naba tsu yain manyan aku tsu tsa̱ra̱ ikebe iꞌya tsa tsila ilikulya wa.
7 Kasoje ka bana baci a asu u kuvon,
u tsu tsupa ikebe i ilikulya ɗa?
Uza u tsu ce kashina aku u kpa̱ɗa̱ ulya ili i kashina yi?
Kaliniki ka lina̱ka ushiga bawu u soi mani ma le?
8 N yan kadyanshi ka na ki n ucira u va̱ wa,
shegai Mele ma Kashila̱ ma dana ta̱ dem nala.
9 Tsu yan ta̱ ka̱neshi a Mele ma Musa korongi:
“Kotsu i kimba̱ una̱ u kanaka aꞌayin a ɗa wa lapa ilya wa.”a
An Kashila̱ ka danai nala,
n anaka a ɗa koshi wa yan kadyanshi?
Aꞌa!
10 N a̱tsu ɗa wa dansa.
Uza ɗa u limai n uza ɗa u lapai a yain manyan ma le n uzuwa u uma u ɗa a ka tsa̱ra̱ kaɓon ka ilya yi.
11 An tsu tonuko ɗa̱ akani yi,
u woko ta̱ yavu icun i Kashila̱ iꞌya tsu cei a asuvu a atakasuvu a ɗe.
Adama a nala tsa̱ ta̱ n ucira u ɗa tsa wusha ilikulya n ili iꞌya i buwai tyoku u ili iꞌya tsu kapai ara ɗe.
12 I ɓa̱nga̱ baci aza roku aza ɗa a yanka ɗa̱ kuɓari,
tsa̱ ta̱ n ucira u ɗa u lai u le.
Shegai a̱tsu tsu taɓa ɗa̱ uzuwa i na̱ka̱ tsu tyoku nala wa.
Tsu pelenshike ta̱ ili iꞌya tsa̱ri n iꞌya kotsu tsu ɓishinka Kadyanshi ka Shinga ka Kawauwi utambura wa.
13 I reve ta̱ gai aza ɗa a tsu yan manyan a Kuwa ku Kashila̱ nte a tsu wusha pini ilikulya i le.
Aɗara̱kpi a ɗa a tsu yan uɗara̱kpa nte dem a tsu wusha pini kapashi ka le.
14 Nala dem Asheku a wenishikei aza ɗa a tsu yan kuɓari ku Kadyanshi ka Shinga a wushi ilikulya i le.
15 Shegai n taɓa ɗa̱ uzuwa i na̱ka̱ nala wa.
Kpam koronku ɗa ma koronku ɗa̱ adama a ɗa ma ciga i na̱ka̱ mu ili wa.
N wene ta̱ yavu da wa laka mu ta̱ shana n kuwa̱ n u ɗa ya yan nala.
16 N yan ara̱ɗi adama a ɗa ma yansa kuɓari ku Kadyanshi ka Shinga wa.
Manyan ma nala mi ma Kashila̱ ka danai n yain ma,
kpam u ka̱na̱ ta̱ n yain ma.
Ter va̱ n ꞌyuwan baci ma uyan!
17 N yan baci manyan ma na adama a ɗa mpa n kaci ka va̱ n ɗanga̱sai n yain ma,
u ka̱na̱ ta̱ i tsupa mu.
Shegai n yan ta̱ manyan ma na mayun mayun adama a ɗa Kashila̱ ka ka na̱ka̱ mu ma.
18 Katsupi ka eni ka ma wusha?
Kabala ka uyan kuɓari ku Kadyanshi ka Shinga ka gbani,
kpam n tsu zuwa ama a tsupa mu adama a manyan ma nala mi wa.
19 Mpa kagbashi ka uza ka wa.
Shegai n gonuko ta̱ kaci ka va̱ kagbashi ka ama gba̱ tsa̱ra̱ n lyai kaci ka ama ushani.
20 Aꞌayin a ɗa baci ma̱ri n aza a Yahuda,
n tsu rongo ta̱ tyoku u uza u Yahuda tsa̱ra̱ n lyai kaci ka le.
Mele ma Musa ma ma tsu lya tsugono tsu le,
ko an u wokoi ma ma lya tsugono tsu va̱ wa.
Shegai n tono ta̱ Mele mi derere tsa̱ra̱ n lyai kaci ka le.
21 Nala dem an ma̱ri kaɓolo n Awulawa,
n rongo ta̱ tyoku u le,
aza ɗa bawu a ka tono Mele,
tsa̱ra̱ n lyai kaci ka le.
Nala u wenike an n kpa̱ɗa̱i utono Mele ma Kashila̱ wa,
shegai n tono ta̱ mele ma Kawauwi.
22 Nala dem,
an ma̱ri kaɓolo n aza ɗa bawu aꞌa̱ri n ucira a asuvu a upityanangu,
n woko ta̱ dem yavu ma̱ n ucira wa,
tsa̱ra̱ n lyai kaci ka le.
N woko ta̱ gba̱ ili iꞌya ma woko a asu u ama tsa̱ra̱ gai n lyai kaci ka le.
23 N yan ta̱ ili i nala yi tsa̱ra̱ Kadyanshi ka Shinga ka tambura,
kpam n pana kayanyan adama a una̱ u shinga u Kashila̱.
24 Ciɓai,
a ka yan baci kalambale,
ya dem u tsu suma ta̱,
shegai vuma u te u ɗa koshi u tsu tsa̱ra̱ kune.
Eɗa̱ dem u ka̱na̱ ta̱ i suma tsa̱ra̱ i lyai kalambale ki.
25 Uza ɗa baci dem u yain kalambale ka nala ki u tsu foɓuso ta̱ kaci ka ne tsa̱ra̱ u tsa̱ra̱ kune ku funi u ɗa wa namgba gogo.b
Shegai a̱tsu tsu tsu foɓuso ta̱ kaci ka tsunu tsa̱ra̱ tsu tsa̱ra̱ kune ku funi ɗa wa rongo pini hal ubana.
26 Ɗa gai i zuwai n sumai she a kabaru ka kulya ki.
Ɗa kpam i zuwai n zuwai ucira u va̱ gba̱ tyoku u uza ɗa u tsu shila̱ka̱na̱ n adimbi a ne tsa̱ra̱ u lyai kaci,
tyoku u uza ɗa u tsu ra̱ɗa̱gbusa̱ akere a ne gbani gbani wa.
27 N ka̱na̱ ta̱ ikyamba i va̱ n gonukoi iꞌya kagbashi ka va̱,
adama a ɗa aꞌayin a ɗa baci n kotsoi uyanka aza roku kuɓari,
Kashila̱ ka ɓishinka mu kune ki wa.