Kotsu i yanka ama afada wa
14
Wushai gba̱ Atoni a Asheku,
hal dem n aza ɗa upityanangu u le bawu u gbamai.
Kotsu i nanamgbana n ele a kaci ka ili iꞌya a ka wundya ko iꞌa̱ i shinga ko i cingi wa.
2 Tyoku u na,
a uwushuku u uza roku,
wa lya ta̱ ko icun i ilikulya i eni iꞌya baci.
Shegai uza ɗa bawu wa̱ri n upityanangu u ugbami u tsu takuma inyama wa,
she ili iꞌya a cimbai koshi.
3 Uza ɗa u tsu takuma inyama kotsu u goro uza ɗa bawu u tsu takuma wa.
Kpam uza ɗa bawu u tsu takuma kotsu u wundi yavu uza ɗa u tsu takuma u nusa ta̱ wa,
kpaci Kashila̱ ka wusha ɗe vuma u nala vi.
4 Va yanka kagbashi ka uza roku afada wa.
Uzakuwa u ne u ɗa wa reve ko manyan ma shinga ma wa yan ko ma shinga ma wa.
Ucira u Asheku u ɗa wa ɓa̱nga̱ agbashi a ne a yain ili iꞌya i gain a yain.
5 Atoni a Asheku a roku a tsu yawunsa ta̱ a dana kain ka roku ka pini ka ka lai a ɗa a buwai uwulukpi,
aza roku kpam a tsu yawunsa ta̱ a dana gba̱ aꞌayin dere ɗa aꞌa̱ri.
Ya dem u ɗanga̱sa̱ka kaci ka ne.
6 Aza ɗa a tsu dana an kain ka roku ka lai a ɗa a buwai uwulukpi vi,
yan ɗa a tsu yan nala tsa̱ra̱ a na̱ka̱ Asheku tsupige.
Aza ɗa a tsu lya ko ndya wa,
yan ɗa a tsu yan nala tsa̱ra̱ a na̱ka̱ Asheku tsupige,
kpaci a tsu cikpa ta̱ Kashila̱ kahu a lyai.
Aza ɗa kpam bawu a ka lya ili dem,
a ka ciga ta̱ dem a zuwa Asheku a pana kayanyan kpam a cikpa Kashila̱.
7 Adama a kaci ka tsunu a ɗa tsa̱ri n uma koshi wa,
kpam adama a kaci ka tsunu a ɗa tsu kuwa̱i koshi wa.
8 Tsu yan baci uma,
adama a Asheku a ɗa tsu yain uma,
kpam tsu kuwa̱ baci,
adama a Asheku a ɗa tsu kuwa̱i.
Adama a nala,
ko tsu yain n uma ko tsu kuwa̱,
a̱tsu aza a Asheku a ɗa.
9 Ili iꞌya i zuwai Kawauwi ka kuwa̱i kpam u ꞌya̱nga̱i u wokoi n uma iꞌya tsa̱ra̱ u woko Asheku a kaci ka akushe n aza a uma gba̱.
10 Adama a nala,
ndya i zuwai ya yansa̱ka Atoni a Asheku afada?
Ndya i zuwai vu goroi utoku u vunu?
Kain ka tuwa̱ ta̱ ka Kashila̱ ka yanka gba̱ tsunu afada.
11 Kashila̱ ka dana ta̱ a Tagara̱da u ne:
“N yanka ɗa̱ ta̱ kazuwamgbani mpa n kaci ka va̱
n da ya dem wa kuɗa̱ngu ta̱ a kapala ka va̱.
Ya dem wa dana ta̱ a kateshe mpa Kashila̱.” a
12 Ya dem wa tonuko ta̱ Kashila̱ ili iꞌya u yain n ili iꞌya i zuwai u yain nala.
Kotsu i zuwa ama a ta̱ɗa̱tsa̱ wa
13 U ka̱na̱ ta̱ tsu a̱sa̱ka̱ ukiɗa̱ga atoku ugana.
A una̱ u nala,
i gono i yawunsa i doku i yain ili iꞌya ya zuwa uza roku u ta̱ɗa̱tsa̱ ko u rukpa̱ a unyushi u cingi wa.
14 Mpa n ɓolomgbono ta̱ n Yesu Asheku,
kpam adama a nala n reve ta̱ ilikulya iꞌa̱ la iꞌya i kpa̱ɗa̱i u gan ulya wa.
Shegai uza u wushuku baci ili yi i gan wa,
ili i nala yi i gan yi wa.
15 Kpam Katoni ka roku ka namgba baci asuvu adama a ili iꞌya va lya,
vu lya baci iꞌya vu wenike uciga wa.
Kotsu vu a̱sa̱ka̱ ilikulya iꞌya va lya i nangasa uza ɗa Kawauwi ka kuwa̱i adama a ne wa!
16 Kotsu vu a̱sa̱ka̱ ili iꞌya vu wenei i shinga iꞌya,
i woko i cingi a asu u aza roku wa.
17 Uza u yan baci kadyanshi a kaci ka tsugono tsu Kashila̱,
a kaci ka mele ma ulya ko uso u ɗa u yain kadyanshi wa,
shegai a kaci ka ukuna u maci u ɗa,
na̱ ndishi n shinga,
n maza̱nga̱ ma Kulu Keri ku na̱ka̱ ɗa̱.
18 Vu gbashika baci Kawauwi tyoku u nala va zuwa ta̱ Kashila̱ ka pana kayanyan,
ama kpam a ka wushunku vu ta̱ n u ɗa.
19 Adama a nala,
u ka̱na̱ ta̱ tsu ma̱tsa̱ tsu yain ili iꞌya ya tuko ndishi n shinga kpam iꞌya ya gbamatangu atoku.
20 Kotsu vu nangasa manyan ma Kashila̱ adama a ili iꞌya va lya wa.
Gba̱ ilikulya i lobono ta̱ ulya,
shegai u gan wa vu zuwa baci uza roku u yain unyushi u cingi adama a ili iꞌya vu lyai.
21 Kotsu vu takuma inyama ko vu soi ili i roku,
ko kpam vu yain ili i roku wa,
ya zuwa baci Katoni ka roku uta̱ɗa̱tsa̱.
22 Gba̱ ili iꞌya baci vu wushuki n iꞌya a ukuna u na vi aɗa n Kashila̱.
Ama a ka za̱nga̱na̱ ta̱ a yawunsa baci ili iꞌya a ka yansa i shinga iꞌya kpam bawu aꞌa̱ri n mala̱la̱,
ko kenu.
23 Shegai aꞌa̱ baci n mala̱la̱ a kaci ka ili iꞌya a ka lya,
aku a lyai iꞌya Kashila̱ ka wene le ta̱ aza a unyushi,
adama a ɗa bawu a wushuki an iꞌa̱ri mai.
Vu yan baci ili i roku iꞌya bawu vu wushuki iꞌa̱ri mai,
unyushi u cingi u ɗa.