Kashila̱ n aza a Yahuda
9
Ukuna u mayun u ɗa ma tonuko ɗa̱.
Mpa uza u Kawauwi ɗa kpam kaɓan ma yan wa.
Kulu Keri ka ka lya tsugono a katakasuvu ka va̱ kpam u wushuku ta̱ gba̱ ili iꞌya ma dansa mayun ɗa.
2 Katakasuvu ka va̱ ka shaɗangu ta̱ n unamgbukatsuma̱ u pige na̱ mɓa̱la̱ cika,
3 adama a ama a va̱,
aza a Yahuda tyoku u va̱.
Kashila̱ ka yanka mu baci una̱ u pece mu n Kawauwi tsa̱ra̱ ama a va̱ a tsa̱ra̱ iwauwi,
ma wushuku ta̱ gogo Kashila̱ ka yain nala.
4 Alya aza a Isaraꞌila,
aza ɗa Kashila̱ ka ɗanga̱sai a woko mmuku n ne.
U wenike le ta̱ tsupige tsu ne,
u yansa ta̱ kazuwamgbani n ele.
U na̱ka̱ le Mele ma Musa.
U tonuko le tyoku ɗa a ka lyaka yi kayala mayun.
U zuwa le a woko aza ɗa a ka wusha kazuwamgbani ka ne.
5 Isheku i le ama a pige a ɗa a Kashila̱,
Kawauwi n kaci ka ne aya maku ma tsikaya ma le.
Kpam aya Kashila̱,
uza ɗa wa lya tsugono a kaci ka ili gba̱,
u wusha ta̱ icikpali hal ubana bawu utyoku!
Ami.
6 Dana ɗa ma dana Kashila̱ ka kpa̱ɗa̱ ta̱ ushaɗangu ili iꞌya u danai wa yan vi wa.
Shegai mayun ɗa gba̱ aza a Isaraꞌila a ɗa ama a ne wa.
7 Kpam dem gba̱ mmuku n tsikaya ma Ibirahi n ɗa mmuku n ɗa Kashila̱ ka yankai Ibirahi kazuwamgbani wa.
Kashila̱ ka tonukoi Ibirahi,
“Mmuku n tsikaya ma Ishaku n ɗa koshi a ka kece mmuku n tsikaya n vunu.”
8 Nala u wenike ta̱ la vi gba̱ mmuku n tsikaya ma Ibirahi n ɗa mmuku n Kashila̱ n mayun wa.
Mmuku ma Ibirahi n mayun alya aza ɗa a wokoi mmuku n Kashila̱ adama a kazuwamgbani ka Kashila̱ ka yankai Ibirahi. a
9 Kpam kazuwamgbani ka u yain ka na:
“N uma u kayen kahu n gono,
Saratu wa matsa ta̱ maku ma vali.” b
10 Maku ma nala mi aya tata u tsunu Ishaku.
An u gbonguroi,
aku u zuwai Rifikatu,
uza ɗa u matsai mpeshe.
11-12 Shegai kahu u matsa,
Kashila̱ ka tonuko ta̱ Rifikatu vi,
“Uzapige vi wa gbashika ta̱ uza u kenu.”
c Nala vi tun kahu mmuku mi a yain ili i shinga ko i cingi ɗa.
Kashila̱ ka yan ta̱ nala tsa̱ra̱ uza ɗa u ɗanga̱sai vi aya uza ɗa wa ciga,
adama a tyoku ɗa u foɓusoi shegai adama a ili iꞌya maku mi ma yain wa.
13 Tyoku ɗa wa̱ri ukorongi a Tagara̱da u Kashila̱,
“N ciga ta̱ Yakubu,
shegai n ꞌyuwain Isuwa.” d
14 Ndya wa̱ tsa dana a ukuna u na?
Kashila̱ ka tsu kpa̱ɗa̱ uyan dere ɗa?
Nala wa,
ko kenu!
15 Kashila̱ ka tonukoi Musa,
“Ma wenike ta̱ ukuna u shinga a asu u uza ɗa baci dem n ɗanga̱sai,
kpam ma pana ta̱ uza ɗa baci dem n ɗanga̱sai asuvayali.” e
16 Kashila̱ ka wenike ta̱ ukuna u shinga a asu u uza ɗa baci dem u ɗanga̱sai,
adama a ili iꞌya vuma vi wa ciga ko u yain ɗa wa.
17 Tagara̱da u Kashila̱ u dana ta̱ Kashila̱ ka tonuko ta̱ magono ma Masar,
“N zuwa vu ta̱ vu woko magono kpaci ma ciga ta̱ n wenike ucira u va̱ ara vunu,
tsa̱ra̱ a dansa kala ka va̱ a likimba gba̱.”
18 Adama a nala,
Kashila̱ ka wenike ta̱ ukuna u shinga u ne a asu u aza roku kpaci nala wa ciga,
kpam u ɗanga̱sai u zuwa ama roku a woko aryagbaji.
Upan u Kashila̱ n asuvayali
19 Uza roku wa wecike ta̱,
“Niɗa Kashila̱ ka dana tsu nusa.
Ya wa fuɗa wa ronomgbono n uyawunsa u ne?”
20 Kotsu vu dana nala wa!
Kaje ka va̱,
ma wece vu,
“Ya va bidya kaci ka vunu va̱ri ɗa va nanamgbana n Kashila̱?
Magbodo ma tsu wece uza ɗa u ma yi,
‘Niɗa vu ma mu naha?’ ”
21 Kamai ka mgbodo ka tsu ma ta̱ ili iꞌya wa ciga u mai.
Wa fuɗa ta̱ wa bidya cin u mai magbodo ma tsulobo adama a kain ka pige,
u mai kpam ma roku ma uyansa̱ka manyan maco.
22 Kashila̱ ki dem nala wa̱ri,
wa ciga baci u wenike upan u ne kpam u wenike ucira u ne wa fuɗa ta̱.
Shegai u yan ta̱ ahankuri a pige a asu u aza ɗa upan u ne wa̱ri;
wata,
aza ɗa a foɓusukoi ukpa̱.
23 U yan ta̱ nala tsa̱ra̱ u wenike tsupige tsu ne ushani a asu u ama a ɗa u panai iyali;
wata,
aza ɗa u foɓusukoi tsupige tsu ne tun a kagita̱.
24 Kpam a̱tsa ama a nala yi aza ɗa Kashila̱ ka isa̱i.
U ɗanga̱sa tsu a asuvu a aza a Yahuda,
nala ɗa gba̱m koshi wa,
u ɗanga̱sa tsu ta̱ dem a asuvu a Awulawa.
25 Tyoku ɗa Kashila̱ ka danai a tagara̱da u Hosiya matsumate:
“Aza ɗa bawu aꞌa̱ri ama a va̱,
gogo‑na ma isa̱ le ta̱ ama a va̱.
Kpam ma wenike ta̱ uciga u va̱
a asu u aza ɗa bawu ma̱ri ma ciga.” f
26 U doku ta̱ u danai,
“Pini a asu u ɗa Kashila̱ ka tonuko le,
‘Eɗa̱ ama a va̱ a ɗa wa,’
nte ɗa dem pini Kashila̱ Uza u Uma
wa isa̱ le mmuku n ne.” g
27 Ili iꞌya kpam Ishaya matsumate u danai a kaci ka aza a Isaraꞌila iꞌya na:
“Aza a Isaraꞌila aꞌa̱ ta̱ ushani,
tyoku u kayala ka ikengi i kushiva̱,
shegai aza ɗa a ka tsa̱ra̱ iwauwi a asuvu a le aꞌa̱ gan wa.
28 Magono ma Zuba ma yan ta̱ ama a likimba mavura kpam u kotso ma kuten koshi.” h
29 Ishaya doku ta̱ u danai:
“Magono ma Zuba,
Uza u Ucira Gba̱
u a̱sa̱ka̱ ta̱ ama kenu a asuvu a mmuku n tsikaya n tsunu a yain uma.
A da baci nala wa,
an aꞌa̱ri a wacinsa tsu ɗe gba̱ gba̱,
tyoku u ilyuci i Sodom n Gomora.” i
Aza a Isaraꞌila n Kadyanshi ka Shinga
30 Ndya wa̱ tsa dana a kaci ka ili i na?
Iꞌya na:
Awulawa a ma̱tsa̱ a gonuko kaci ka le ama a maci n Kashila̱ wa,
shegai Kashila̱ ka gonuko le ama a maci adama a ɗa a wushuki n eyi.
31 Aza a Isaraꞌila a ma̱tsa̱ ta̱ a toni Mele tsa̱ra̱ a gonuko kaci ka le ama a maci n Kashila̱.
Shegai a kpa̱ɗa̱i.
32 Ndya i zuwai a kpa̱ɗa̱i?
Adama a ɗa a ma̱tsa̱ ta̱ a gonuko kaci ka le ama a maci a asu u ili iꞌya a ka yan,
a una̱ u ɗa a ka pityanangu n Kashila̱ u gonuko le ama a maci.
A ta̱ɗa̱tsa̱ ta̱ a katali ka pige ka ka̱ri le a ure.
33 Tyoku ɗa Kashila̱ ka danai a Tagara̱da u Kashila̱:
“Ɗa na!
Ma zuwa ta̱ katali a Sihiyonaj
ka ka zuwa le uta̱ɗa̱tsa̱,
tyoku u katali ka ka zuwa le urukpa̱.
Shegai uza ɗa baci dem u wushuki n eyi wa yan uwono wa.” k