Ukanikorongi Ubana a Asu u
Aza a Roma
Ukukpa̱ u kadyanshi
1
Mpa Bulus uza ɗa u korongi ukanikorongi u na vi.
Mpa kagbashi ka Yesu Kirisiti Kawauwi ka.
Kashila̱ ka ɗanga̱sa mu ta̱ n woko kasuki,
kpam u suku mu n ba n yain kuɓari ku Kadyanshi ka Shinga ka ne.
2 Caupa,
Kashila̱ ka yan ta̱ kazuwamgbani ka Kadyanshi ka Shinga ka na a asu u ntsumate n ne,
tyoku ɗa a korongi a Tagara̱da u Kashila̱ u Uwulukpi.
3-4 Kadyanshi ka Shinga ki ukuna u Maku ma ne u ɗa u dansai;
wata,
Yesu Kawauwi Asheku a tsunu.
A matsa yi ta̱ tyoku u vuma,
eyi kumaci ku Dawuda Magono ka wa̱ri.
Shegai Kulu ku uwulukpi ku wenike ta̱ n ucira,
Yesu Maku ma Kashila̱ ma,
kpaci u ꞌya̱nga̱sa̱ yi ta̱ a ukpa̱.
5 A asu u Kawauwi,
Kashila̱ ka na̱ka̱ mu ta̱ manyan ma shinga ma kasuki.
Manyan ma na mi ma ma tono n ama a iyamba gba̱ a wushuku kpam a pana̱ka yi.
Aya ma yanka manyan ma na mi.
6 Iꞌa̱ ta̱ a asuvu a ama a nala yi a ɗa Yesu Kawauwi u ɗanga̱sai.
7 N korongu ta̱ ukanikorongi u na vi ubana ara ɗe gba̱ aza ɗa aꞌa̱ri a ilyuci i Roma.
Kashila̱ ka ciga ɗa̱ ta̱ kpam u isa̱ ɗa̱ i woko ama a uwulukpi a ne.
A̱sa̱ka̱ Kashila̱ Tata u tsunu n Asheku Yesu Kawauwi u na̱ka̱ ɗa̱ ukuna u shinga na̱ ndishi n shinga.
Bulus yain kavasu n ucikpa
8 A̱sa̱ka̱ n gita̱ n cikpa Kashila̱ a asuvu a kala ka Yesu Kawauwi adama a ɗe gba̱.
N yan ta̱ nala adama a ɗa gba̱ ama a asuvu a likimba a ka dansa ta̱ ukuna u upityanangu u ɗe.
9 Kashila̱ ka reve ta̱ n a̱sa̱ka̱ uyansa kavasu adama a ɗe wa,
na̱ n gbashiki yi n katakasuvu ka va̱,
na̱ n dansi Kadyanshi ka Shinga ka Maku ma ne.
10 Aꞌayin a ɗa baci ma yan kavasu,
n tsu folo ta̱ Kashila̱ ka a̱sa̱ka̱ mu n kondo ɗa̱,
kpam nala wa woko Kashila̱ ka wushuku baci.
11 Ma ciga ta̱ n wene ɗa̱ tsa̱ra̱ n na̱ka̱ ɗa̱ ucun u una̱ u shinga u ɗa Kulu ku Kashila̱ ku na̱ka̱ mu.
Ka ka ɓa̱nga̱ ɗa̱ i gbonguro a asuvu a Asheku.
12 Dana ɗa ma dana ma ciga ta̱ tsu ɓa̱nga̱mgba̱na̱i n upityanangu u ɗa tsu tsa̱ra̱i.
Upityanangu u ɗe wa ɓa̱nga̱ mu ta̱,
kpam upityanangu u va̱ wa ɓa̱nga̱ ɗa̱ ta̱.
13 Aje a va̱,
ma ciga ta̱ i reve an n tsu foɓuso ta̱ n tuwa̱ n kondo ɗa̱.
Shegai ili i roku i tsu ka̱ngu mu ta̱ uyan nala.
Ma ciga ta̱ n zuwa ama a toni Kawauwi a asuvu a Roma,
tyoku ɗa n yain a asu u atoku a ɗe Awulawa.
14 U ka̱na̱ ta̱ n gbashika ama gba̱:
Nheline n aza ɗa bawu aꞌa̱ri Nheline;
aza ɗa aꞌa̱ri arevi n aza ɗa bawu a revei ili.
15 Ili iꞌya i zuwai n ma̱tsa̱i cika ma ciga n yanka ɗa̱ kuɓari ku Kadyanshi ka Shinga a Roma iꞌya gai la vi.
Ucira u uyan Kadyanshi ka Shinga
16 N pana uwono adama a Kadyanshi ka Shinga ka Kawauwi ka na ki wa,
kpaci ucira u ɗa Kashila̱ ka yankai manyan u wauwai uza ɗa baci dem u pityanangi u ɗa la vi,
ili iꞌya i bidyai aza a Yahuda ubana aza ɗa bawu aꞌa̱ri aza a Yahuda.
17 Kadyanshi ka Shinga ki ka wenike ta̱ tyoku ɗa Kashila̱ ka gonukoi ama,
a woko ama a maci n eyi:
a asu u upityanangu u ɗa tun a kagita̱ hal ubana a makorishi.
Tyoku ɗa Tagara̱da u Kashila̱ u danai,
“Uza ɗa Kashila̱ ka gonukoi uza u maci n eyi wa tsa̱ra̱ ta̱ uma adama a ɗa u wushuki n Kashila̱.” a
Ama gba̱ a nusa ta̱
18 Kashila̱ uza ɗa wa̱ri a zuba wa wenike ta̱ tyoku ɗa wa pana upan,
a asu u ukiɗa̱ga ama ugana a unyushi u cingi n ikuna i cingi iꞌya a yansai.
A ka̱ngu ta̱ ukuna u mayun n tsicingi tsu le.
19 Kashila̱ ka yan le ta̱ mavura,
adama a ɗa a reve ta̱ ili iꞌya i gain ama a reve a ukuna u Kashila̱ mai,
kpaci Kashila̱ ka wenike le ta̱ iꞌya gba̱.
20 Ama a ka wene ucira u Kashila̱ u ɗa bawu wa̱ri n utyoku n aꞌeshi a le wa,
kpam n ure u uyawunsa u ne u uwulukpi.
Tun an Kashila̱ ka yain likimba,
gba̱ ili iꞌya u yain i wenike ta̱ tyoku ɗa wa̱ri.
Adama a nala,
ama a ka tsa̱ra̱ ure u kunyani wa.
21 Ko an a revei Kashila̱,
a ꞌyuwan yi ta̱ una̱ka̱ tsupige tyoku u Kashila̱ ka mayun,
a ꞌyuwan yi kpam ucikpa.
A una̱ u nala,
aku uyawunsa u le u wokoi u gbani.
Atakasuvu a utengeshi a le a shaɗangi n karimbi.
22 A da aꞌa̱ ta̱ n ugboji,
shegai a wokoi atengeshi.
23 A lyaka Kashila̱ ka tsupige uza ɗa wa̱ri n uma bawu utyoku kayala wa.
Aku a gonoi a lyakai ameli a ɗa a rotsoi ama aza ɗa bawu aꞌa̱ri n uma u ɗa bawu wa̱ri n utyoku,
na̱ nnu,
na̱ nnama,
n aꞌali kayala.
24 Adama a ɗa a yansai ili i nala yi,
Kashila̱ ka a̱sa̱ka̱i ama a nala yi a karai ure u le.
A yain gba̱ ili iꞌya a ka ciga a yain,
kpam maluwa ma cingi ma le ma zuwa le a yamgbanai tsishankala tsu uwono n ikyamba i le.
25 A ꞌyuwain ukuna u mayun u Kashila̱ aku a wushuki n kaɓan.
A lyakai ili iꞌya Kashila̱ ka yain kayala a una̱ u ɗa a ka lyaka uza ɗa u yain iꞌya kayala.
Aya uza ɗa wa wusha icikpali hal ubana bawu utyoku.
Ami.
26 An u wokoi a yain nala,
aku Kashila̱ ka a̱sa̱ka̱ le a tonoi maluwa ma uwono ma le.
Aka a ka vakusu n atoku a le aka,
kpam nala u gain u woko wa.
27 Nala dem aꞌali a yain.
A a̱sa̱ka̱i uciga uvakusu n aka,
aku a wokoi n maluwa ma pige ma uyan tsugbani n aꞌali.
A yain ili i uwono n atoku a le,
kpam ili iꞌya i gita̱i n ele iꞌya mavura adama a ili i utengeshi iꞌya a yain.
28 Ama a yawunsa an wa̱ri n kalen a tsa̱ra̱ ureve u mayun u Kashila̱ wa.
Aku Kashila̱ ka lazai ka a̱sa̱ka̱ le n atakasuvu a cingi a le,
u a̱sa̱ka̱ le a yain ili iꞌya bawu iꞌa̱ri i gain a yain.
29 A shaɗangi n gba̱ icun i unyushi u cingi n tsicingi.
A ka ciga̱ka kaci ka le ili dem.
A kovoi ama.
A shaɗangi n malyon.
A ka ciga mawunuka gbani gbani,
n a shila̱ka̱na̱si n atoku,
a vurusa̱i aꞌene atoku.
Kain dem uyawunsa u le u ili i cingi u ɗa a kaci ka ama.
A yain ndyami.
30 A nangasai aꞌala a ama.
A kovoi Kashila̱.
A wenike ama karinga̱ wa.
A yain ara̱ɗi.
A cikpala̱sai kaci ka le.
A ma̱tsa̱i a yain tsicingi a ire i savu.
A na̱ka̱ isheku i le karinga̱ wa.
31 Aꞌa̱ ta̱ n utengeshi.
A shaɗangusu kazuwamgbani ka le wa.
A wenike ikuna i shinga ko asuvayali wa.
32 A reve ta̱ mele ma Kashila̱ ma dana ta̱ uza ɗa baci wa̱ri nala u gan ta̱ u kuwa̱.
Shegai nala u ɓishinka le a lyai kelime n uyan tsicingi tsu le wa.
Hal gba̱m a wushunki aza roku a yain dem nala.