Bulus a uyamba u Malita
28
An tsu lai,
aku tsu revei an a uyamba u ɗa wa̱ri a mere ma mini u ɗa tsa̱ri,
kpam kala ka asu ki ka Malita.
2 Aza a uyamba vi a ryabusa tsu ta̱ mai,
hal a zuwuka tsu akina tsa̱ra̱ tsu lyashuku,
kpaci a ka ro ta̱ kpam kuta̱nu ka pini.
3 Bulus cira̱ngi ncaka,
aꞌayin a ɗa wa zuwa n ɗa a akina,
aku kasuɗugbate ka akina ki ka wutukpa̱i kali ka roku ka tsukonu,
cina eyi pini uka̱ni na̱ ncaka mi.
Pini nala,
kali ki ka kapa yi a kukere bawu ka takpai.
4 An ama a ilyuci yi a wenei nala,
aku a dansai utyoku u le,
“Gaawan vuma u na kawuni ka ama ka.
Ko an u lai a asuvu a aɓali yi,
hal n gogo‑na kameli ka ka̱ri uka ka afada a ɗa aꞌa̱ri dere ka buwa yi ta̱ utono ka ciga ka wuna yi.”
5 Bulus vishanai kukere ku ne,
aku kali ki ka rukpa̱i pini a akina yi,
kpam ko i te ka yanka yi wa.
6 Ama yi n a wundi kukere ki ka shita ko kpam wa rukpa̱ kute‑kute u kuwa̱.
Shegai an a ɓa̱ra̱kpa̱i a wenei ili i yan yi wa,
aku a savaɗai kadyanshi a da,
“Vuma u na,
kashila̱ ka roku ka.”
7 Evu n asu vi,
uyamba u ɗa pini u ɗa wa̱ri u uzapige u uyamba u mere ma mini mi,
uza ɗa a ka isa̱ Pubilu.
Aya u wusha tsu u zuwa tsu a kuwa ku ne hal aꞌayin a tatsu.
8 Dana tata u ne ɗa pini nvain n usuɗugbi u ikyamba n kucaru.
Pini nala,
Bulus ba u dana̱sa yi,
u taɗanku yi akere u yanka yi kavasu u ta̱na̱sa̱ yi.
9 An vuma u ta̱na̱i,
aku gba̱ aza ɗa aꞌa̱ri a uyamba vi a tukusoi aza a mɓa̱la̱ ara Bulus,
kpam u ta̱na̱sa̱ le.
10 Ama yi a na̱ka̱ tsu ta̱ karinga̱,
kpam an tsa laza a kpatsu,
a na̱ka̱sa̱ tsu ta̱ ili iꞌya tsa ciga.
A rawai a Roma
11 Tsu rongo ta̱ a Malita hal uwoto u tatsu,
pini nala,
tsu lyai kapala na̱ nwalu mi.
Tsu uwai a kpatsu ka ku wuta̱i a ilyuci i Alizandariya ka ka̱ri n iryoci i aꞌulu a mpeshe ma amelia a ɗa a ka isa̱ Kasata n Pololua a ɗa a shei na̱ nɗanga.
Nte dem ku lyai pini ilyushi a ilyuci yi.
12 An tsu rawai a ilyuci i Sirakusa,
tsu rongo ta̱ pini aꞌayin a tatsu.
13 Pini nala,
tsu uwai kpatsu she a Rigiyun.
An kain ka wansai,
uwule u ꞌya̱nga̱i a ɗaka,
aku tsu lazai she a Putiyoli.
14 Tsu cina ta̱ pini Atoni,
aku a folo tsu tsu shamgba n ele.
An aꞌayin a shindere a wurai,
aku tsu lazai she a Roma.
15 Aza a tsunu aza ɗa aꞌa̱ri a Roma a reve ta̱ an tsa tuwa̱,
aku a tuwa̱i a ka̱ngu tsu a Kuden ku Apiyu n asu u ɗa a ka isa̱ Aꞌuwa a Amoci a Tatsu.b
An Bulus gawunsai n ele,
u cikpai Kashila̱ kpam ikyamba i ne i doki ucira.
Bulus yain kuɓari a Roma
16 An tsu rawai a Roma,
aku a zuwai Bulus rongo utyoku u ne,
kpam kasoje n ka wundi yi.
17 An tsu yain aꞌayin a tatsu,
Bulus isa̱i azapige aza a Yahuda,
u tonuko le,
“Aza a va̱,
n nusuka ama a va̱ wa,
ko kpam ukuna u isheku i tsunu wa.
Shegai gba̱ n nala a neke mu a akere a aza a Roma a Urishelima a ka̱na̱ mu.
18 Alya n kunu ku afada ki,
an a vecei ukuna u va̱ vi,
aku a ka ciga a a̱sa̱ka̱ mu,
kpaci a ka̱na̱ mu n unyushi u ɗa u rawai a wuna mu wa.
19 Shegai an aza a Yahuda a ꞌyuwain uwushuku,
aku u ka̱na̱i n foli a gonuko kadyanshi ki ara Kaisa.
Shegai ciga ɗa ma ciga n banka ama a tsunu a asu u afada wa.
20 Isa̱ ɗa n isa̱ ɗa̱ tsa̱ra̱ tsu dansa.
A sira mu ta̱ n ikani,
kpaci n wushuku ta̱ n uzuwa u uma u aza a Isaraꞌila;
wata,
Kawauwi uza ɗa tuwa̱i.”
21 Aku a danai,
“Tsu pana ili i roku a kaci ka vunu wa.
Tsu wene ukanikorongi u ɗa u wuta̱i asu u aza a Yahuda wa,
ko uza u tuwa̱ u tonuko tsu ukuna vi wa.
22 Shegai tsa ciga ta̱ tsu pana ili iꞌya iꞌa̱ri a katakasuvu ka vunu,
kpaci ili iꞌya tsu revei a kaci ka kaɓolo ka savu ka na ki iꞌya ko nte wa a ka dana ta̱ ukuna u cingi a kaci ka ne.”
23 A zuwai kain ka a ka tuwa̱ a gawunsa n eyi a asu u ɗa u cipa̱i vi.
Kain ki a tuwa̱ ta̱ ushani.
Ili iꞌya i bidyai usana hal ubana kuvuli,
Bulus wa̱ri udansa n ele ukuna u tsugono tsu Kashila̱.
U yan ta̱ manyan n Mele ma Musa n Itagara̱da i Ntsumate.
Wa moɗono tsa̱ra̱ u rono le utuwa̱ a asu u Yesu.
24 Aza roku a wushuku ta̱ n ili iꞌya u danai,
aza roku tani wa.
25 Aku aꞌa̱ri kananamgbani ubana n ugono utyoku u le,
aku a gita̱i ulaza̱sa.
A makorishi,
Bulus danai,
“Kulu Keri ku dana ta̱ mai an ku yain kadyanshi a una̱ u Ishaya matsumate,
an u tonukoi isheku i tsunu,
26 “ ‘Ba vu tonuko ama a va̱,
Ya pana ta̱ kadyanshi ka va̱,
shegai ya reve wa.
Ya wene ta̱,
shegai ya reve kalen ka ne wa.
27 Kpaci atakasuvu a ɗe a gbama ɗe,
a votsuku ɗe atsuvu a ɗe,
a kimba̱ ɗe aꞌeshi a ɗe.
Tsa̱ra̱ i wene n aꞌeshi a ɗe wa,
i pana n atsuvu a ɗe wa,
kpam i reve n atakasuvu a ɗe wa.
A da baci nala wa,
iꞌa̱ri ya kpatala ta̱ utuwa̱ ara va̱ aku n ta̱na̱sa̱ ɗa̱.’ c
28 “Adama a nala,
ma ciga i reve,
alabari a iwauwi a nala yi a asu u Kashila̱ u ɗa a wuta̱i hal utuwa̱ a asu u Awulawa,
kpam alya a ka wusha a ɗa.” [
29 An u danai nala,
aku aza a Yahuda a ꞌya̱nga̱i aꞌa̱ri uyan kananamgbani utyoku u le.]d