3 Aku u danai,

“Mpa uza u Yahuda u ɗa,

a matsa mu ta̱ a Tarsu,

a uyamba u Kilikiya,

shegai nte n gbonguroi pini na.

N yan ta̱ ka̱neshi a kukere ku Gamaliya uza ɗa u wenishike mu gba̱ mele ma isheku i tsunu.

Ma̱ ta̱ n uciga u ugbashika Kashila̱,

tyoku ɗa gba̱ ɗe iꞌa̱ri uyan ara.

4 N foro ta̱ ama ɗa a ka tono Ure u Asheku,

hal gba̱m n wunai aza roku.

N sira̱sai aka n aꞌali n gbagirya le a asuvu a kuwa ku aꞌali.

5 Magono ma Aɗara̱kpi n azapige a Asheshi a Pige a ka dana ta̱ mayun ɗa.

A na̱ka̱ mu ta̱ ukanikorongi ubana a asu u atoku a tsunu aza a Yahuda a ɗa aꞌa̱ri a Damasuka.

Ukanikorongi vi u wushunku mu ta̱ n tuko Atoni a ɗa aꞌa̱ri ɗe utuwa̱ a Urishelima usiri n ikani tsa̱ra̱ a yan le mavura.

6 “Kain ka te,

evu n ubana kaara a kaci,

cina n yan ɗe evu n urawa a Damasuka,

aku katyashi ka wuta̱i a zuba ka wakana mu ukyawan.

7 Aku n rukpa̱i a iyamba,

n panai kala̱ga̱tsu ka wece mu,

‘Shawulu,

Shawulu,

ndya i zuwai va yan mu mavura?’

8 “Aku n wushuki,

‘Asheku,

aɗa yai?’

“U wushuki,

‘Mpa Yesu uza u Nazara uza ɗa va yan mavura.’

9 Aza ɗa tsa̱ri kaɓolo a wene ta̱ katyashi ki,

shegai a reve ili iꞌya kala̱ga̱tsu ki ka tono wa.

10 “Aku n wece yi,

‘Asheku,

ndya va ciga n yain?’

“U wushunku mu,

‘ꞌYa̱nga̱ vu uwa a Damasuka.

Vu rawa baci ɗe a ka tonuko vu ta̱ ili iꞌya va yan.’

11 Katyashi ki ka zuwa mu ta̱ n rumba̱na̱i,

aza ɗa tsa̱ri kaɓolo ki alya a rono mu ubana a Damasuka.

12 “Aku vuma roku uza u kala Ananiya tuwa̱i ara va̱.

Eyi uza ɗa wa gbashika Kashila̱ tyoku ɗa Mele ma tsunu ma danai ɗa,

uza ɗa gba̱ aza a Yahuda a ɗa aꞌa̱ri a Damasuka a ka cikpala̱sa.

13 U tuwa̱i ara va̱,

u shamgbai evu na̱ mpa,

u danai,

‘Utoku u va̱ Shawulu,

wene asu.’

Pini a asu u nala vi ɗa n wene yi!

14 “U tonuko mu,

‘Kashila̱ ka isheku i tsunu ka ɗanga̱sa vu ta̱ vu reve ili iꞌya wa ciga.

Kpam vu wene Uza u Uwulukpi u nala vi,

vu pana kpam kadyanshi ka ne.

15 Aɗa va bidya kadyanshi ka ne ubana ko nte wa,

n vu tonusuko le iꞌya vu wenei n iꞌya kpam vu panai.

16 Kotsu vu nangasa aꞌayin wa.

ꞌYa̱nga̱ a lyuɓugu vu tsa̱ra̱ a za̱i unyushi u cingi u vunu.

Yan nala n vu isa̱si kala ka Asheku.’

17 “Kain ka te,

an n gonoi a Urishelima,

mpa a uyan kavasu a Kuwa ku Kashila̱,

aku n wenei kuwene,

18 kpam n wenei Asheku a ka dansa,

u danai,

‘A̱sa̱ka̱ Urishelima gogo,

kpaci a ka wushuku n ili iꞌya va tonuko le a kaci ka va̱ wa.’

19 “Aku n wushuki,

‘Asheku,

ele n kaci ka le dem a reve ta̱ an n ka̱na̱sa̱i aza ɗa a wushuki n avu a agata a Kashila̱ n sira̱sa le kpam n lapa le.

20 Aꞌayin a ɗa a wunai Isitifanu,

^b uza u uyan kadyanshi ka Kashila̱,

mpa pini kushani kpam n wushuku ta̱ n ili iꞌya a yain.

Hal gba̱m mpa n ɓa̱na̱i aminya a ama ɗa a wuna yi vi.

21 “Aku Asheku a tonuko mu,

‘ꞌYa̱nga̱ vu wala,

ma suku vu ta̱ a mɓa̱ri a asu u Awulawa.’ ”

22 Kakuma̱ ka ama ki ka rongo yi upana̱ka hal a asu u ɗa u danai udani u ‘Awulawa,’

aku a salai una̱ u te,

‘Rawukai vuma u na vi!

Wuna ni!

U gan a a̱sa̱ka̱ yi n uma wa!’

23 Aku a rongoi iyoroli n a mondusi aminya a le n maloko,

a shaɗangusi akere a le n kayala a polusoi ka a uwule.

24 Aku uzapige u kuvon u aza a Roma u zuwai a bidya yi ubana a kuwa ku asoje,

tsa̱ra̱ a bawan yi adama a ɗa wa tonuko le ukuna u maci.

25 Tyoku ɗa a sira yi tsa̱ra̱ a bawin yi,

aku u tonukoi katigi ka ka̱ri pini vi,

“U gan a bawin uza u Roma u ɗa wa̱ri n ucira u uyan ili bawu a yanka yi afada?”

26 An katigi ki ka panai nala,

aku u banai a asu u uzapige vi,

u danai,

“Ndya ya ciga n yain?

Vuma u na vi uza u aza uyamba u Roma ɗa.”

27 Aku uzapige vi u banai ara Bulus,

u wece yi,

“Tonuko mu,

avu uza u aza uyamba u Roma ɗa?”

Aku u wushunku yi,

“Nala wa̱ri.”

28 Aku uzapige vi u danai,

“She na n tsupai ikebe ushani kahu n tsa̱ra̱ ucira u nala vi.”

Bulus danai,

“Mpa kpam n u ɗa a matsa mu.”

29 An asoje a ɗa a ka ciga a bawin yi vi kpam a yan yi keci ki a panai nala,

aku a wozoi akere a le gogo.

Uzapige u kuvon vi u pana ta̱ uwonvo,

kpaci u zuwa ta̱ a sira yi.

30 An kain ka wansai,

aku uzapige u kuvon vi wa ciga u reve ili iꞌya i zuwai aza a Yahuda a tukoi ukuna u na a kaci ka Bulus.

U zuwai a surukpa yi ikani yi,

aku u zuwai aɗara̱kpi a pige n Asheshi a Pige yi gba̱ a ɓolomgbonoi.

U zuwai a ukai Bulus a asuvu,

u zuwa yi u shamgbai a kapala ka le.