Bulus ba u kondoi Tasaloniya
17
An Bulus n Sila a wurai a Amihipali n Apoloni,
aku a tuwa̱i a Tasaloniya a asu u ɗa wa̱ri n kagata ka Kashila̱ ka aza a Yahuda.
2 Bulus uwai pini tyoku ɗa u cuwana̱kai,
hal Ashibi a tatsu aꞌa̱ri a uyan kadyanshi ka ukuna u Kashila̱ a itagara̱da i Kashila̱,
3 wa̱ri le ukasana̱sa̱ka n u tonusuko le mayun ɗa Kawauwi ka pana ikyamba kpam u ꞌya̱nga̱ a ukpa̱.
U tonuko le,
“Yesu ɗa ma̱ri ɗa̱ utonusuko na vi,
aya gai Kawauwi ki.”
4 Aku ama roku aza a Yahuda,
n aza a Heline aza ɗa a ka gbashika Kashila̱,
n aka roku ushani,
a wushuki n kadyanshi ka Bulus n Sila,
kpam a ɓolomgbonoi n ele.
5 Shegai aza a Yahuda a ka yan malyon cika,
aku a banai a kuden a ɓolomgbonoi ama aza a ahali a cingi,
a ꞌya̱nga̱sa̱i atakasuvu a ama a ilyuci yi gba̱ le.
A sumai ubana a kuwa ku Yason,
tsa̱ra̱ a tuko Bulus n Sila a kapala ka kakuma̱ ka ama ki.
6 Shegai an bawu a cina le,
aku a ronoi Yason n Atoni a roku ubana a asu u azapige a afada.
A ka sala̱sa,
“Bulus n Sila alya a ka ꞌya̱nga̱sa̱sa̱ atakasuvu a ama a likimba,
alya na dem a rawai ara tsunu.
7 Kpam Yason ɗa cipuka̱ le a kuwa ku ne.
Kpam gba̱ le a ka tono mele ma Kaisa wa,
n a dansi magono ma roku ma pini a ka isa̱ Yesu.”
8 An a panai nala,
aku aza a ilyuci yi n azapige a afada yi atakasuvu a le a ꞌya̱nga̱i.
9 A a̱sa̱ka̱ le wa,
she na a zuwai Yason n ama yi a tsupai ikebe i uꞌa̱sa̱ka̱,
aku a a̱sa̱ka̱ le a lazai.
Bulus n Sila a ba a kondoi Biriya
10 An kayin ka yain,
aku Atoni yi a soku le,
a lazai ubana a Biriya.
An a rawai ɗe,
a uwai a kagata ka Kashila̱ ka aza a Yahuda.
11 Shegai aza a naha a la ta̱ aza a Tasaloniya ahali a shinga,
kpaci a wusha ta̱ kadyanshi ki n akere a re.
Aꞌa̱ri ukonduso Itagara̱da i Ntsumate kain dem,
tsa̱ra̱ a wene ko ili iꞌya Bulus wa tonusuko le vi mayun ɗa.
12 Ama ushani a pityanangu ta̱ n Asheku.
A asuvu a aza ɗa a wushuki vi,
alya aza a Yahuda,
kaɓolo n aka a roku ushani aza a Heline aza ɗa aꞌa̱ri n tsupige a ilyuci yi,
hal n aꞌali aza a Heline dem.
13 An aza a Yahuda aza ɗa aꞌa̱ri a Tasaloniya,
a panai a da Bulus ɗa pini wa yan kuɓari ku kadyanshi ka Kashila̱ a Biriya,
a banai ɗe n a la̱pa̱na̱si kakuma̱ ka ama ki n a ꞌya̱nga̱sa̱si le atakasuvu.
14 Kute‑kute Atoni yi a soki Bulus ubana a kushiva̱,
shegai Sila n Timoti a shamgbai ve pini.
15 Aza ɗa a soki Bulus vi,
a soku yi ta̱ hal ubana a Atina.
An a ka gono,
aku Bulus na̱ka̱ le akani a tuwa̱ a tonuko Sila n Timoti a tuwa̱ a cina yi pini gogo.
A banai a ilyuci i Atina
16 Aꞌayin a ɗa Bulus wa̱ri a uvana Sila n Timoti a Atina,
u namgba ta̱ katsuma̱ an u wenei ilyuci yi i shaɗangi n ameli.
17 U tsu yan ta̱ kadyanshi a kagata ka Kashila̱ n aza a Yahuda n Awulawa aza ɗa a ka tono Kashila̱.
Kpam kain dem u tsu yan ta̱ kadyanshi n aza ɗa u tsu cina a kuden.
18 An Bulus wa̱ri a uyan kuɓari ku Yesu n uꞌya̱nga̱ u ukpa̱ vi,
aku ayawunshi a Epikuriyaa n ayawunshi a Sitokiya a yain kananamgbani n eyi.
Aza roku a le a wecikei,
“Ndya uza u kacan naha wa tono?”
Aza roku a danai,
“Yavu uza u uyan kuɓari ku ameli a roku a ɗa,
bamu n a tsunu.”
19 Adama a nala,
aku a bidya yi a banka yi a asu u Asheshi a ɗa a ka isa̱ Arasa,
a danai,
“Ko va tonuko tsu ucun u uwenishike u savu u ɗa va yan na vi?
20 Kpaci kotsu tsu pana ukuna u na vi wa,
kpam tsa ciga ta̱ tsu reve kalen ka ne.”
21 Gba̱ aza a Atina n amoci a ɗa aꞌa̱ri pini na̱ ndishi a la ta̱ uciga a ɓa̱ra̱kpa̱ a upana kadyanshi ka savu kpam a dansa ka kapala n ili gba̱.
22 Bulus shamgbai a kapala ka asheshi yi,
u danai,
“Eɗa̱,
aza a Atina,
n reve ta̱ eɗa̱ aza a uciga utono adini a ɗa cika.
23 Kpaci an ma kyawunsa a ilyuci yi,
ma konduso ili iꞌya ya gbashika.
N wene ta̱ asuɗara̱kpa u roku n ikorongi a zuba u ne,
i danai,
‘Adama a Kashila̱ ka Bawu a Revei.’
Uza ɗa ya gbashika bawu i reve yi vi,
aya Kashila̱ kpam aya ma tonuko ɗa̱ ukuna u ne.
24 “Kashila̱ ka ka yain likimba n ili iꞌya iꞌa̱ri a asuvu a ne.
Aya Magono ma Zuba ma zuba n iyamba,
u tsu dusuku a Kuwa ku Kashila̱ ka vuma mai wa.
25 Nala dem u tsu ciga vuma u ɓa̱nga̱ yi n ili i kukere i ne wa.
U namba ili wa,
kpaci aya u na̱ka̱i gba̱ ama uma,
n kuvi,
n ili iꞌya a ka ciga.
26 Aya kpam u yain gba̱ ama a asu u vuma u te.
U ɗanga̱sa̱ka le asu u ɗa a ka dusuku gba̱ a kubain ku likimba.
Kpam u foɓusuko le aꞌayin a ɗa gba̱ ama yi a ka rongo.
27 “Kashila̱ ka yan ta̱ nala tsa̱ra̱ a zami yi,
kpaci a papura baci a ka tsa̱ra̱ yi ta̱,
ko an u wokoi u yan mɓa̱ri n ele wa.
28 Adama a ne a ɗa tsa̱ri n uma,
tsa za̱mgba̱na̱sa̱ kpam,
adama a ne a ɗa tsu wokoi ili iꞌya tsa̱ri,
tyoku ɗa ashipi a ɗe a roku a danai,
‘A̱tsu aza a kagali ka ne a ɗa.’
29 “An u wokoi a̱tsu aza a kagali ka Kashila̱ a ɗa,
u gan tsu ra̱tsana̱ka Kashila̱ n ili iꞌya a yain n zinariya ko azurufa ko katali,
iꞌya vuma u yain n ugboji u ne wa.
30 Caupa Kashila̱ ka̱ri ka foro ama a unyushi u le wa,
adama a ukpa̱ɗa̱ u ureve u le.
Shegai gogo‑na u tonuko ta̱ ama ko nte wa a kpatala a a̱sa̱ka̱ tsicingi tsu le tsu ugbashika ameli.
31 “Kpaci u ɗanga̱sa ɗe kain ka wa tuwa̱ u yanka likimba afada a ɗa aꞌa̱ri dere a kukere ku uza ɗa u ɗanga̱sai.
Kashila̱ ka a̱sa̱ka̱ tsu ta̱ tsu reve vuma u nala vi a asu u ɗa u ꞌya̱nga̱sa̱ yi a ukpa̱.”
32 An a panai adama a uꞌya̱nga̱ u ukpa̱,
aku aza roku a yanka yi majari,
shegai aza roku a danai,
“Tsa ciga ta̱ tsu doku tsu pana ukuna u ɗa vu danai nala vi.”
33 Pini nala,
Bulus a̱sa̱ka̱i asheshi yi.
34 Shegai ama roku a asuvu a le a wushuki n kadyanshi ka Bulus a wokoi Atoni.
A asuvu a Atoni a savu yi alya Diyonisiyu uza ɗa wa̱ri asuvu a asheshi,
n uka u roku uza ɗa a ka isa̱ Damari,
kaɓolo n aza roku kpam.