Utuwa̱ u Kulu Keri
2
An kain ka Abiki a Kain ka Amangarenkupaa ka yain,
gba̱ Atoni yi a ɓolomgbonoi a asu u te.
2 Kute‑kute a panai mawura̱ ma uwule u pige u ɗa u wuta̱i a zuba u shaɗangi kuwa ka aꞌa̱ri pini ndishi vi.
3 Aku a wenei ili i roku yavu aletsu a akina a ka pecenishe n a cipusi a zuba u aꞌaci a le.
4 A shaɗangu le n Kulu Keri,
aku a gita̱i kadyanshi n aletsu a roku kau‑kau tyoku ɗa Kulu Keri ki ku tonoi n ele.
5 Aꞌayin a nala yi,
aza a Yahuda a roku aza ɗa a ka tono Kashila̱ a wuta̱i a iyamba i likimba gba̱ ya dem n kaletsu ka ne a tuwa̱i pini a Urishelima vi na̱ ndishi.
6 An a panai mawura̱ ma uwule mi,
aku kakuma̱ ka ama ka sumai ka banai tsa̱ra̱ a wene ili iꞌya ya gita̱.
Aku a yain majiyan kpaci gba̱ le ya dem pana ta̱ kaletsu ka ne a asu u Atoni yi a ka dansa ka.
7 A yain majiyan cika,
hal a ka wecishike,
“Aza ɗa a ka dansa na vi tsa wundya gba̱ le aza a Galili a ɗa vi?
8 Niɗa kpam gba̱ tsunu tsu pana̱ka le a ka dansa aletsu a tsunu?
9 A̱tsa tani na tsu wuta̱ ta̱ iyamba kau‑kau,
aza a roku aza a Paratiya a ɗa,
n aza a Madaya,
n aza a Elam.
Tsa̱ ta̱ dem n aza a Masopotamiya,
n aza a Yahuda,
n aza a Kapadosiya,
n aza a Pontu,
n aza a Asiya asuvu a tsunu.
10 Aza a Firijiya,
n aza a Bamafiliya n aza a Masar a ɗa dem pini.
Hal n aza a kaɓon ka kapashi ka Libiya evu n Sirani,
n amoci a uyamba u Roma aza ɗa aꞌa̱ri aza a Yahuda n aza ɗa a uwai utono u adini a aza a Yahuda.
11 A̱tsa tani na aza a Kiriti n aza a Arabi,
gba̱ tsa pana̱ka le a ka dansa ukuna u manyan ma pige ma Kashila̱ ka yain n aletsu a tsunu.”
12 Gba̱ le a yain majiyan,
hal a la̱pa̱na̱i a ka wecemgbene,
a da,
“Ndya kalen ka ukuna u naha vi?”
13 Shegai aza roku a ka yanka le majari,
a danai,
“Mini ma cinwi ma a soi hal a gutukpai.”
Bituru yankai kakuma̱ ka ama kuɓari
14 Bituru ꞌya̱nga̱i kushani kaɓolo n asuki kupa n uza u te vi,
u danai,
“Aza a va̱,
aza a Yahuda n aza ɗa aꞌa̱ri ndishi a Urishelima,
panai na,
kpam i kirana n ili iꞌya ma tonuko ɗa̱.
15 Ama a na yi,
so ɗa a soi tyoku ɗa iꞌa̱ri uyawunsa wa.
U yan ta̱ usana cika,
ama a tsu so a gutukpa n ulapa u uwule u kuci n usana u de naha wa.
16 Ili i na yi,
ili iꞌya Juwelu matsumate u danai iꞌya:
17 ‘Kashila̱ ka danai,
Aꞌayin a makorishi a rawa baci,
ma na̱ka̱ ta̱ ya dem Kulu Keri.
Mmuku n ɗe aka n aꞌali a ka yan ta̱ kadyanshi ka ili iꞌya ya tuwa̱.
Alobo a ka wene ta̱ kuwene.
Nkoshi kpam ma lavutansa ta̱.
18 Aꞌayin a nala yi ma na̱ka̱ ta̱ agbashi a va̱ aka n aꞌali Kulu Keri,
kpam a ka dansa ta̱ kadyanshi ka va̱.
19 Ma wenike ta̱ ikunesavu a zuba u alishi,
n iryoci i savu a likimba;
wata,
mpasa n akina,
n ka̱nga̱ ka alishi.
20 Kaara ka woko ta̱ karimbi,
uwoto kpam u woko san yavu mpasa.
Ili i na yi ya gita̱ ta̱ kahu kain ka tsupige n ka ucira ka Magono ma Zuba ka tuwa̱.
21 Aꞌayin a nala yi,
uza ɗa baci dem u yain kavasu a asuvu a kala ka Magono ma Zuba wa tsa̱ra̱ ta̱ iwauwi.’ b
22 Eɗa̱ aza a Isaraꞌila panai na!
An Yesu uza u Nazara u yansai gba̱ iryoci n ikunesavu yi,
i wenike ta̱ an Kashila̱ ka ka suki yi mayun,
kpam gba̱ ɗe i reve ta̱ nala iꞌa̱ri.
23 Caupa Kashila̱ ka reve ta̱ ili iꞌya ya gita̱,
kpam iꞌya u foɓusoi vi i gita̱ ta̱ an a nekei Yesu ara ɗe.
I wandamgbana yi ta̱ a mawandamgbani,
i wuna yi a akere a aza a unyushi u cingi.
24 Shegai Kashila̱ ka wutukpa̱ yi ta̱ a asuvu a ucira u ukpa̱,
kpaci ukpa̱ wa̱ n ucira u ɗa wa ka̱na̱ yi wa.
25 Dawuda Magono u yan ta̱ kadyanshi ka na a kaci ka Yesu,
u danai,
‘Magono ma Zuba ma̱ ta̱ na̱ mpa kain dem,
ili iꞌa̱ la ya ne mu uwonvo wa,
kpaci wa̱ ta̱ a kukere ku ulyaki ku va̱.
26 Adama a nala katakasuvu ka va̱ ka shaɗangu ta̱ n maza̱nga̱,
una̱ u va̱ wa sala ta̱ icikpali i ne,
kpam ikyamba i va̱ ya rongo ta̱ n uzuwa u uma.
27 Kpaci va a̱sa̱ka̱ uma u va̱ a asuvu a kasaun wa,
kpam va a̱sa̱ka̱ ikyamba i Uza u Uwulukpi u vunu i shama wa.
28 Vu wenike mu ta̱ tyoku ɗa ma tsa̱ra̱ uma,
kpam vu shaɗangu mu ta̱ n maza̱nga̱ kpaci va rongo ta̱ kaɓolo na̱ mpa.’ c
29 “Ama a va̱ aza a Isaraꞌila,
ma fuɗa ta̱ ma dansa ukuna u akaya a tsunu Dawuda n a̱ɗa̱ bawu mala̱la̱.
U kuwa̱ ɗe,
a ciɗa̱ngu yi,
kpam kasaun ka ne ka pini hal n ara.
30 Eyi matsumate ma,
kpam Kashila̱ ka yanka yi ta̱ kazuwamgbani,
u da wa zuwa ta̱ uza roku a asuvu a kagali ka ne u woko magono,
tyoku ɗa u zuwa yi u wokoi magono.
31 An Dawuda wenei nala,
aku u yain kadyanshi ka ukuna u uꞌya̱nga̱ u ukpa̱ u Kawauwi,
u da,
‘A ka a̱sa̱nsa̱ n ikyamba i ne a kasaun wa,
kpam iꞌya ya shama wa.’
32 “Kashila̱ ka ꞌya̱nga̱sa̱ ta̱ Yesu u na vi a ukpa̱,
kpam a̱tsu dem tsu wene ta̱ ukuna vi.
33 “Gogo‑na aya pini ndishi a ulyaki u Kashila̱ a asu u tsupige,
kpam Kashila̱ Tata u ne u na̱ka̱ yi ta̱ Kulu Keri tyoku ɗa u zuwamgbanai.
Gogo‑na Yesu vi u tsunku tsu ɗe ka a aꞌaci a tsunu,
aya u tukoi ili iꞌya tsu wenei kpam tsa pana na vi.
34 Dawuda ɗa yuwa̱i a zuba wa,
shegai eyi n kaci ka ne u dana ta̱,
‘Magono ma Zuba ma tonukoi Asheku a va̱,
dusuku a ulyaki u va̱,
35 hal n zuwa vu taɗanku atokulalu a vunu aꞌene.’ d
36 “Adama a nala,
eɗa̱ aza a Isaraꞌila she i reve an Yesu ɗa i wandamgbanai nala vi,
Kashila̱ ka gonuko yi ɗe Asheku n Kawauwi.”
37 An a panai nala,
aku kadyanshi ki ka sawa le atakasuvu cika,
a wecei Bituru n asuki a ɗa aꞌa̱ri pini vi,
“Atoku a tsunu,
ndya tsa yan?”
38 Bituru wushunku le,
“U ka̱na̱ ta̱ i a̱sa̱ka̱ tsicingi tsu ɗe i kpatala ubana a asu u Kashila̱.
A lyuɓugu ɗa̱ a asuvu a kala ka Yesu Kirisiti,
kotsu Kashila̱ ka cimbusuka̱ ɗa̱ unyushi u cingi u ɗe,
tsa̱ra̱ i tsa̱ra̱ kune ku Kulu Keri.
39 Kazuwamgbani ka Kashila̱ ka na ki adama a ɗe a ɗa na̱ mmuku n ɗe hal gba̱m n aza ɗa aꞌa̱ri a mɓa̱ri:
aza ɗa Magono ma Zuba Kashila̱ ka tsunu ka isa̱i ubana ara ne.”
40 Bituru lyai kapala n u yanki le kuɓari cika,
n u dansi,
“Wauwai kaci ka ɗe a upana u ikyamba u ɗa wa tuwa̱ a kaci ka ama a cingi a aꞌayin a na yi.”
41 Ama ushani a wushuku ta̱ n kadyanshi ka ne,
aku a lyuɓugu le.
Ama yi a raɓansa ta̱ ama azu a tatsu (3,000) aza ɗa a ɓolomgbonoi n atoni kain ki.
Tyoku ɗa Atoni yi a rongoi
42 A gonukoi ugboji u le a asu u uwenishike u asuki vi,
n a rongi kaɓolo,
n a lyayi ilikulya,
n a yanyi kavasu.
43 Aku ya dem panai uwonvo n majiyan,
adama a iryoci n ikunesavu iꞌya Kashila̱ ka yansa a akere a asuki.
44 Gba̱ Atoni yi a ɓolomgbonoi a asu u te,
n a yanyi manyan n ili iꞌya a tsa̱ra̱i kaɓolo.
45 A dengishei utsa̱ri u le aku a neshei ama ɗa bawu aꞌa̱ri n ili dere tyoku ɗa a ka ciga.
46 Kain dem a tsu gbashika ta̱ Kashila̱ a Kuwa ku Kashila̱,
a gawunsusa a aꞌuwa a le a lyai ilikulya kaɓolo n katakasuvu ka te.
47 N a cikpali Kashila̱ kain dem,
kpam gba̱ ama yi a ka na̱ka̱ le ta̱ tsupige.
Kain dem Asheku a dokusu le ta̱ ama ushani aza ɗa a ka tsa̱ra̱sa̱ iwauwi.