2 Afarishi a roku a danai,

“Ndya i zuwai ya yan ili iꞌya i nangasai mele ma Ashibi?”

3 Yesu wushunku le,

“Eɗa̱ kotsu i yan ka̱neshi u ili iꞌya Dawuda yain,

aꞌayin a ɗa u panai kambulu,

eyi n aje a nwalu a ne wa?

4 An u uwai a Kuwa ku Kashila̱,

u bidyai iburodi i uwulukpi u takumai.

Ili iꞌya aɗara̱kpi a ɗa koshi a wushunki a takuma.

Kpam u na̱ka̱i aje nwalu n ne i roku.” ^a

5 Pini nala,

u tonuko le,

“Maku ma Vuma ma Asheku a kain ka Ashibi.”

6 Kain ka Ashibi ka roku,

Yesu uwai a kagata ka Kashila̱ wa̱ri a uwenishike.

Pini a asuvu yi,

uza roku u ɗa pini uza ɗa ili i soi kukere ku ulyaki ku ne.

7 Aku awenishiki a Mele n Afarishi a ka putsa̱ yi ko wa ta̱na̱sa̱ yi n kain ka Ashibi ki,

kotsu a tsa̱ra̱ unyushi u ɗa a ka ba a sapula yi.

8 Eyi tani u revei uyawunsa u le,

aku u tonukoi vuma vi,

“ꞌYa̱nga̱ vu shamgba a mere.”

Aku u ꞌya̱nga̱i u shamgbai.

9 U tonuko le,

“Ma wece ɗa̱,

ndya iꞌa̱ri dere kain ka Ashibi?

A yain ili i shinga,

ko a yain i cingi?

A wauwa uma,

ko a wuna u ɗa?”

10 Aku u lingana le gba̱ le,

u tonukoi vuma vi,

“Ba̱ra̱kpa̱ kukere ku vunu.”

U ba̱ra̱kpa̱i kukere ki,

aku ku ta̱na̱i.

11 A panai upan cika,

a gita̱i usheshe tyoku ɗa a ka yan n Yesu.

12 Aꞌayin a nala yi,

Yesu wuta̱i u yuwa̱i masasa tsa̱ra̱ u yain kavasu.

U rongoi uyan kavasu ubana a asu u Kashila̱ hal kain ka wansai.

13 An kain ka wansai,

u isa̱i atoni a ne,

aku u ɗanga̱sai kupa n ama a re a asuvu a le,

u isa̱ le asuki.

14 Alya Simo (uza ɗa u isa̱i Bituru) n utoku u ne Andurawu n Yakubu,

n Yahaya,

n Filibu,

n Batalamawu.

15 U ɗanga̱sa ta̱ dem Matiyu,

n Toma n Yakubu maku ma Halfa,

n Simo uza ɗa a ka isa̱ Ziloti.

16 U ɗanga̱sai kpam Yahuza maku ma Yakubu,

n Yahuza Isikariyoti uza ɗa u tuwa̱i u neke yi.

17 Aku u gida̱la̱i kaɓolo n ele,

u shamgbai a asu u ɗa wa̱ri kateshe.

Kakuma̱ ka atoni a ne,

n kakuma̱ ka ama ushani a tuwa̱i a pana̱ka yi,

tsa̱ra̱ a ta̱na̱sa̱ le.

A wutusa̱i a uyamba u Yahuda n Urishelima,

n aza ɗa aꞌa̱ri a Taya n Sida u una̱ u kushiva̱.

18 N aza ɗa ityoni i cingi ya yan mavura dem,

a ta̱na̱sa̱ le.

19 Gba̱ ama yi a ka ciga a sawusa yi,

kpaci ucira wa wutusa̱ ta̱ a asuvu a ne,

u ta̱na̱sa̱ le gba̱ le.

20 Aku Yesu gaɗigbai kaci ka ne,

u weɓelei atoni a ne,

u danai:

“Eɗa̱ aza a una̱ u shinga a ɗa,

eɗa̱ aza a unambi,

kpaci tsugono tsu Kashila̱ tsu ɗe tsa.

21 Eɗa̱ aza a una̱ u shinga a ɗa,

eɗa̱ aza ɗa ya yan kambulu gogo‑na,

kpaci a ka cuwa̱ta̱ngu ɗa̱ ta̱.

Eɗa̱ aza a una̱ u shinga a ɗa,

eɗa̱ aza ɗa ya sa̱ gogo‑na,

kpaci ya dosuso ta̱.

22 Eɗa̱ aza a una̱ u shinga ɗa,

aꞌayin a ɗa ama a ꞌyuwan ɗa̱,

a wutukpa̱ ɗa̱ a asuvu a le,

a wisha ɗa̱,

a panai icaɗi i ɗe adama a va̱ Maku ma Vuma.

23 “Pelei a kain ki,

i raɗugusu n maza̱nga̱,

kpaci katsupi ka malen ma manyan ma ɗe ka̱ ta̱ ushani a zuba.

Nala dem akaya a le a yankai ntsumate.

24 “Shegai ter ɗe eɗa̱ aza a utsa̱ri,

kpaci i wusha ɗe upana u kayanyan u ɗe.

25 Ter ɗe,

eɗa̱ aza ɗa iꞌa̱ri n ucuwi gogo‑na,

kpaci ya tuwa̱ ta̱ i yain kambulu.

Ter ɗe,

eɗa̱ aza ɗa ya dosuso gogo‑na,

kpaci ya namgba ta̱ katsuma̱,

kpam i sa̱i.

26 Ter ɗe,

eɗa̱ aza ɗa ama a ka cikpala̱sa,

kpaci nala dem akaya a le a cikpala̱sai ntsumate n kaɓan.”

27 Yesu doki u danai,

“Shegai n tonuko ɗa̱,

eɗa̱ aza ɗa ya pana̱ka mu,

i cigi atokulalu a ɗe,

i yanka aza ɗa a ꞌyuwan ɗa̱ ukuna u shinga.

28 I zuwuka aza ɗa a ka wishisa ɗa̱ una̱ u shinga.

Aza ɗa a ka kovo ɗa̱ kpam i yanka le kavasu.

29 Uza ɗa u ɓasa vu a kagbaguzu ka te,

kpatala̱ka yi ka ire ki.

Uza ɗa u wusa vu kunya,

kotsu vu ɓishinka yi matogo ma vunu wa.

30 Gba̱ uza ɗa baci u folo vu ili,

vu na̱ka̱ yi.

Uza ɗa baci kpam u wusa vu ucanga,

kotsu vu boli iꞌya wa.

31 Yankai ama tyoku ɗa ya ciga a yanka ɗa̱.

32 “Aza ɗa a ka ciga ɗa̱ alya baci ya ciga koshi,

katsupi ka malen ma manyan ka eni ka ya tsa̱ra̱?

Ko aza a unyushi u cingi dem a ka ciga ta̱ aza ɗa a ka ciga le.

33 Aza ɗa baci a ka yansa̱ka ɗa̱ ukuna u shinga a ɗa baci ya yanka ukuna u shinga koshi,

katsupi ka malen ma manyan ka eni ka iꞌa̱ri n ka?

Ko aza a unyushi u cingi dem nala a ka yansa.

34 Kpam aza ɗa baci i wenei a ka tuwa̱ a tsupa ɗa̱ a ɗa baci ya na̱ka̱ akopi,

katsupi ka malen ma manyan ka eni ka iꞌa̱ri n ka?

Ko aza a unyushi u cingi dem,

a tsu na̱ka̱ ta̱ aza a unyushi u cingi akopi,

tsa̱ra̱ a tsupa le dere.

35 Shegai i cigi atokulalu a ɗe,

i yanka le ukuna u shinga.

Na̱ka̱i akopi,

kotsu i zuwa aꞌeshi a tsupa ɗa̱ wa.

Katsupi ka malen ma manyan ma ɗe kpam ka yan ta̱ ushani.

Ya woko ta̱ kpam mmuku n Kashila̱ ka Zuba,

kpaci eyi uza u ukuna u shinga u ɗa a asu u aza ɗa bawu a tsu cikpa n aza a cingi.

36 I woko aza a asuvayali,

tyoku ɗa Tata u ɗe wa̱ri uza u asuvayali.”

37 Yesu doki u danai,

“Kotsu i taɗanku uza unyushi wa,

adama a ɗa a ka taɗanku ɗa̱ dem.

I kiɗa̱ga uza ugana wa,

adama a ɗa a ka kiɗa̱ga ɗa̱ dem.

I cimbusa̱ unyushi u ɗa a yanka ɗa̱,

kotsu a cimbusuka̱ ɗa̱ dem.

38 Na̱ka̱i,

kotsu a na̱ka̱ ɗa̱ dem:

kakundatsu ka shinga ka a shaɗangi,

a sovonoi,

a colukpoi hal ka wotsongusu.

Aku a tsunku ɗa̱ a matogo.

Kakundatsu ka i kundunki ka a ka kundunku ɗa̱.”

39 U yanka le agisani a roku u danai,

“Karumba̱ ka fuɗa ka rono utoku u ne karumba̱?

Ama a re a le gba̱ she a rukpa̱ a kaɗa̱ka̱ wa?

40 Karotsongishi ka tsu la kawenishiki ka ne wa.

Shegai uza ɗa baci a wenishikei mai,

she u woko tyoku u kawenishiki ka ne.

41 “Ndya i zuwai va wundya macuku ma kenukulu ma ma̱ri a keshi ka utoku u vunu,

aku vu kpa̱ɗa̱i ukirana n kagbukulu ka ka̱ri a keshi ka vunu?

42 Niɗa va fuɗa vu tonuko utoku vunu,

‘Utoku u va̱,

a̱sa̱ka̱ n takpa vu macuku ma ma̱ri a keshi ka vunu,’

avu tani vu wene kagbukulu ka ka̱ri a keshi ka vunu wa?

Avu uza maci u kaɓan,

gita̱ ve vu takpa kagbukulu ka ka̱ri a keshi ka vunu,

aku vu wene mai tyoku ɗa va takpa macuku ma ma̱ri a keshi ka utoku u vunu.”

43 Yesu doki u danai,

“Maɗanga ma shinga ma̱ la ma ma matsa ilimaci i cingi wa,

maɗanga ma cingi ma̱ tani la ma ma matsa ilimaci i shinga wa.

44 Kpaci maɗanga dem,

a ilimaci i ne iꞌya a tsu reve ma.

A tsu ta ilimaci i kapopi a kawana wa,

ko kpam cinwi a kaworo wa.

45 Vuma u maci u tsu wutukpa̱ ta̱ ili iꞌya iꞌa̱ri i shinga a katakasuvu ka shinga ka ne.

Vuma u cingi tani a asuvu a katakasuvu ka ne ka u tsu wutukpa̱ ili i cingi.

Kpaci ili i ushani iꞌya iꞌa̱ri a katakasuvu ka vuma,

iꞌya u tsu dansa.”

46 Yesu doki u danai,

“Adama a iyen a ɗa ya isa̱ mu ‘Asheku,

Asheku,’

kpam ya yan tani ili iꞌya n tonuko ɗa̱ i yain wa?

47 Gba̱ uza ɗa baci u tuwa̱i ara va̱,

wa pana̱ka mu,

aku wa tono udani u va̱,

ma wenike ɗa̱ ta̱ ucun u ne.

48 Wa̱ ta̱ tyoku u uza ɗa wa ma kuwa,

u ga̱va̱i lyungu-lyungu,

aku u zuwai cuku tsi a katali ka upeti.

An aga̱ta̱ a wayai,

mini ma aga̱ta̱ ma lapai ubana a kuwa ki.

Shegai ma gba̱ɗa̱ ka wa,

kpaci a ma ta̱ ka mai.

49 Shegai uza ɗa u panai kadyanshi ka va̱ u ꞌyuwain ka uyanka manyan,

wa̱ ta̱ tyoku u uza ɗa u mai kuwa a kayala,

bawu u zuwai cuku tsu maci.

Aꞌayin a ɗa mini ma aga̱ta̱ ma lapai ka,

kute‑kute aku ku rukpa̱i ku yuruwai yukuyuku.”