Yesu n Yahaya Kalyuɓugi
11
An Yesu kotsoi utonuko Kupanamere yi ukuna u na vi,
aku u a̱sa̱ka̱i a asu vi u banai a ilyuci a asuvu a Galili tsa̱ra̱ u wenishike u yain kpam kuɓari.
2 Yahaya Kalyuɓugi wa̱ ta̱ a asuvu a kuwa ku aꞌali.
An u panai ili iꞌya Kirisiti wa yansa,
aku u suki atoni a ne a roku ama a re.
3 A ba a wece yi,
“Aɗa uza ɗa wa tuwa̱ vi,
ko tsu vana uza roku?”
4 U wushunku le,
“Walai i tonuko Yahaya ili iꞌya i wenei n ili iꞌya i panai.
5 Arumba̱ a wene ta̱,
awunu kpam a wala ta̱,
nkutu n ta̱na̱ ta̱,
agulani a pana ta̱,
akushe kpam a ꞌya̱nga̱i a gonoi n uma.
A yanka ta̱ aza a unambi kuɓari ku Kadyanshi ka Shinga.
6 Kashila̱ ka zuwuka ta̱ uza ɗa bawu u ꞌyuwan mu adama a ili iꞌya n yain una̱ u shinga.”
7 An atoni a Yahaya a lazai,
aku Yesu gita̱i uyanka ama yi kadyanshi ka Yahaya,
u danai,
“An i banai a kakamba ki,
ucun u vuma u eni u ɗa i banai uwene?
Wa̱ tyoku u asomini a ɗa uwule u tsu purusa̱ a asu u ɗa baci dem u lapanai?
8 Ucun u vuma u eni u ɗa i banai uwene?
Vuma ɗa u ukai aminya a ikali?
Aza ɗa a tsu uka aminya a ikali a aꞌeɓile a ngono a ɗa aꞌa̱ri.
9 Ya i banai uwene?
Matsumate ma?
Eye.
N tonuko ɗa̱ u la ta̱ matsumate.
10 Tagara̱da u Kashila̱ u yan ta̱ kadyanshi a kaci ka ne,
“ ‘Ma suku ta̱ katsumate ka va̱ a kapala ka vunu,
uza ɗa wa lapuluka vu ure.’ a
11 “Mayun n tonuko ɗa̱,
Yahaya Kalyuɓugi u la ta̱ gba̱ uza ɗa baci wa̱ri n uma.
Shegai uza u kenukulu gba̱ a asuvu a tsugono tsu zuba u la yi ta̱.
12 Ili iꞌya i bidyai aꞌayin a ɗa Yahaya Kalyuɓugi tuwa̱i hal utuwa̱ gogo‑na,
tsugono tsu zuba tsa̱ ta̱ udoku ucira,
kpam ya dem wa moɗono ta̱ tsa̱ra̱ u uwa tsa.b
13 Gba̱ ntsumate n Mele ma Musa a dana ta̱ ukuna u tsugono tsu Kashila̱ hal utuwa̱ aꞌayin a Yahaya.
14 I wushuku baci n ele,
Yahaya vi aya Iliya matsumate ma ya vana vi.
15 Iꞌa̱ baci n atsuvu,
panai!
16 “Niɗa ma dansa ukuna u ama a gogo‑na?
Ndya a rotsoi?
Aꞌa̱ ta̱ tyoku u mmuku n ɗa ma̱ri ndishi a kuden,
n a ika̱mgba̱ni,
17 “ ‘Tsu fula̱ka̱ ɗa̱ ta̱ ugbali,
shegai i ꞌyuwain kuje!
Tsu shipuka ɗa̱ ushipa u ukpa̱,
shegai i sa̱ wa!’
18 “An Yahaya tuwa̱i,
u laɓa ulya ilikulya wa,
u so tani mini ma cinwi wa,
aku i danai,
‘Wa̱ ta̱ n ityoni i cingi!’
19 Shegai an Mpa Maku ma Vuma ma lya na̱ n soyi,
aku i danai,
‘Kalyai ka n kasoi,
kpam kaje ka aza a uwusha u utafa n aza a unyushi u cingi ka.’
Ugboji u tsu wenike ta̱ kaci ka ne a asu u manyan ma maci ma u tsu yansa.”
Yesu ɓongoi ama
20 A ilyuci iꞌya Yesu yansai ikunesavu i ne cika,
ama yi a ꞌyuwan ta̱ ukpatala a gono a asu u Kashila̱.
U gita̱ le uɓongo,
21 “Ter ɗe,
aza a Korasinu!
Ter ɗe,
aza a Besaida!
A da baci ikunesavu iꞌya n yain a asuvu a ɗe iꞌya n yain a Taya n Sida,
an aꞌa̱ri a kpatala ɗe caupa.
A uka ta̱ akashi a rongoi a upoluso kakomo,
tsa̱ra̱ a wenike an a kpatalai a a̱sa̱ka̱i unyushi u cingi u le!
22 N tonuko ɗa̱,
kain ka afada,
Kashila̱ ka laka ta̱ uyanka ama a Taya n Sida ajebigi kapala n a̱ɗa̱!
23 Eɗa̱ kpam aza a Kafarnahum,
ꞌya̱nga̱sa̱ ɗa wa̱ a ka ꞌya̱nga̱sa̱ ɗa̱ a zuba?
A ka vuta̱la̱ ɗa̱ ta̱ a asuvu a akina!
A da baci ikunesavu iꞌya a yain ara ɗe iꞌya a yain a Sodom,
an wa̱ri wa buwa ta̱ pini hal n gogo‑na.
24 N tonuko ɗa̱,
kain ka afada,
Kashila̱ ka pana ta̱ iyali i Sodom kapala n a̱ɗa̱!”
Yesu na̱ka̱i ama uwunvuga
25 Aꞌayin a nala yi,
Yesu danai,
“Tata,
Magono ma zuba n likimba,
n cikpa vu ta̱,
kpaci vu sokongu ta̱ ukuna u na vi a asu u aza a ugboji n arevi,
shegai vu wenikei u ɗa a asu u aza ɗa bawu a revei ili.
26 Tata,
nala vu wenei u gain vu yain!
27 “Tata u va̱ u na̱ka̱ mu ta̱ ili yi gba̱.
Uza wa̱ la u revei Maku mi wa,
she Tata vi.
Kpam uza wa̱ la u revei Tata vi wa,
she Maku mi n uza ɗa Maku mi ma ɗanga̱sai u tonuko.
28 “Tuwa̱i ara va̱,
gba̱ ɗe aza ɗa a wowoi n ucanga wa ara̱ji,
ma na̱ka̱ ɗa̱ ta̱ uwunvuga.
29 Pana̱ka numu,
tsa̱ra̱ i woko ama a va̱.
Tuwa̱i i rotsongusu ara va̱,
kpaci mpa ma̱ ta̱ n uvakunku kaci kpam ya tsa̱ra̱ ta̱ uwunvuga.
30 Uwenishike u ɗa n danai i wushuku n u ɗa vi,
wa̱ ta̱ shana,
kpam ucanga u va̱ u ra̱zugba̱ wa.”