Ẹkwo-ozi Kẹ Mbụ,
Jiọnu
Deru
Opfu, bụ ndzụ, shi Chileke l'ẹka
1
Iphe,
anyi ede l'ẹkwo-ozi-a anụ unu-a bụkwa k'onye ono,
ẹpha iya bụ Opfu Chileke-a,
bụ iya bụ kẹ Opfu,
bụ ndzụ,
shi Chileke l'ẹka-a.
Opfu ono,
anụje ndzụ ono shikpọ lẹ mbụlembu dụ.
Anyi nụmakpooru iya lẹ nchị;
bya ahụma iya l'ẹnya;
gbua ya ẹnya igo;
bya ebyia ya ẹka.
2 Onye ono,
bụ ndzụ ono bẹ e meru k'ọphu eegudeje ẹnya hụma iya;
anyi hụmawa iya.
Ọ bụru iya bẹ anyi atụru unu ọnu iya-a,
bụ iya bụ kẹ ndzụ ojejoje onoya.
Ndzụ ono bụ yẹe Chileke,
bụ Nna shihawaa nọduta.
Chileke bya egoshiwa iya anyi;
mee anyi maru iya.
3 Ọ bụ iphe ono,
anyi hụmaru l'ẹnya bya anụma lẹ nchị ono bẹ anyi akọkwarupho unu-a g'anyi l'unu atụgbabe onwanyi.
Atụgba ono bụ atụgba ọphu anyi lẹ Chileke,
bụ Nna waa Nwa iya,
bụ Jizọsu Kéreshi tụgbaru.
4 Iphe,
anyi ededoru unu iphemiphe-a bụ g'ẹhu atsọfu anyi l'unu ụtso l'ishi.
Chileke bụ ìphóró, ngarụ ẹgu
5 Ọwa-a bụ ozi,
anyi nụmaru iya l'ọnu;
bụ iya bẹ anyi akọru unu-a,
bụ iya bụ lẹ Chileke bụ ìphóró;
ọchii ta adụdu iya ililekpọo.
6 Teke anyi sụru l'anyi l'iya tụgbaru onwanyi;
l'ẹka anyi nọ l'ọchii;
bụkwa ụka bẹ anyi adzụ;
tẹme ọphu anyi emedu ire-lanụ.
7 Obenu teke anyi bu l'ìphóró gẹ yẹbedua nọ l'ìphóró-a;
ọo ya bụ l'anyi lẹ nwibe anyi tụgbaru;
mee Jizọsu,
bụ iya bụ Nwa Chileke nọdu asafụkotaje anyi iphe-ẹji,
anyi meru g'ọ ha.
8 Teke anyi sụru l'anyi te emedu iphe-ẹji bụkwa onwanyi bẹ anyi aghọru ụgho;
tẹme ọphu ọkpobe-opfu ono adụdu anyi l'ẹhu.
9 Teke anyi kọshiru iphe-ẹji,
anyi meshiru b'ọo-gụru anyi nvụ l'iphe-ẹji ono g'ọ ha;
bya asafụkota anyi iphe,
bụkota ẹjo umere,
anyi eme;
eshinu ọ bụ onye apfụshije ike l'iphe,
o kweru ukwe iya;
bya abụru onye emeje iphe,
pfụru ọto.
10 Teke anyi sụru l'anyi te emeduru iphe-ẹji bẹ anyi mewaru iya onye ntuphu-ire;
tẹme ọphu opfu iya adụdu anyi l'ẹhu.