Mkpuma, dzụ ndzụ; bụru iya gude ụlo
2
Ọo ya bụ;
unu tụa onwunu ẹkpu tụshia iphe,
bụkpoo ẹjo-iphe,
unu eme.
Unu haa adzụ ụka;
ọphu ọ dụhe onye a-bụru tụko-l'ẹhu-atụko-l'obu;
unu ahaa ẹnya-pfụrupfuru;
haa epfubyishi nemadzụ ibe unu.
2 G'ọ bụru g'ẹgu ẹra l'anọduje agụ nwamee nshị-a bụ g'opfu Chileke anọduje agụ unu;
mbụ opfu Chileke ono,
e te emerwụshiduru emerwụshi ono;
ọo ya bụ g'unu e-gude iya vua evuvu;
vuta k'ọphu Chileke a-dzọ unu.
3 Lẹ unu lẹ Nnajịuphu megbabẹwaru iphe;
unu hụma l'ọ dụ ree.
4 Sụ-a;
unu byapfuta Nnajịuphu ono.
Ọo ya bẹ bụ mkpuma ono,
dzụ ndzụ ono,
Chileke gude tụa ọkpa ụlo iya ono.
Mkpuma-a bẹ ndiphe họfuru tuphaa sụ l'ọ bụ ọgalemkpa.
Ọle hụmanu;
l'ẹnya kẹ Chileke bẹ ọ gbẹchikwa bụru iya bẹ ọ họtaru kwabẹ ùbvù.
5 Unubẹdua kwaphọ,
bụ ndu dụ gẹ mkpuma,
dzụ ndzụ;
bẹ Jizọsu Kéreshi gudekwa akpụ ụlo Unme-dụ-Nsọ;
edozi ọgbo uke,
dụ nsọ kẹ Chileke.
G'unu bụru ndu a-nọduje anụ Chileke ngwẹja,
dụ iya ree.
6 Kẹle e deru l'ẹkwo-opfu Chileke sụ:
“Lenu;
mu gudeakwa ẹka mu
tọgbo mkpuma lẹ Zayọnu.
Mkpuma ono bẹ mu họtaru;
ọ bụru
mkpuma vu oke-aswa;
tẹme ọ bụru itso gude ụlo.
Iphe,
bụkpoo onye daphuberu
iya nụ bẹ
ta abyakwa akwa izimanụ.”
7 Ọ kwa l'ẹhu k'unubẹdua,
kwetarụ kẹ Kéreshi bẹ mkpuma ono bụ iphe,
akwabẹ ùbvù;
a bya l'ẹhu kẹ ndu te ekwedu kẹ Kéreshi bẹ;
“Mkpuma ono,
ndu l'akpụ
ụlo jịkaru ono
mechaarụ bya abụru
mkpuma,
gude ụlo.”
8 Tẹme e dekwaaphọ sụ:
“Mkpuma ono bẹ bụkwa
mkpuma,
anọduje adụ ndiphe
ụpfu
bya abụkwarupho epfu,
ẹphe e-vukotajẹ daa iko.”a
Noo kẹle ẹphe jịkaru ekweta opfu Chileke.
Ọ bụru gẹ Chileke dobekpọhawaru l'ọo-dụ phẹ bụ onoya.
9 Obenu l'unubẹdua bụ ndu Chileke gude ẹka iya họta.
Unu bụ ọgbo uke kẹ Chileke;
bya abụru ọha dụ nsọ;
bụru ndu Chileke nwe enwenwe;
k'ọphu unu e-me g'ajajẹ iya ajaja;
mbụ onye ono kufutaru unu l'ọchii kuru unu ye l'ìphóró iya,
dụ biribiri ono.
10 Ọ dụkwaru teke unu eshidu bụru ndu kẹ Chileke;
nta-a bẹ unu bụwaa ndu nkiya.
Ete shidu phụaru unu obu-imemini;
obenu lẹ nta-a bẹ ọ phụwaru unu obu-imemini.
Umere, gbaru ndu Kéreshi tọwaru l'ẹgbu
11 Ndu mu yeru obu;
unu bụkwa nlwamụlwa lẹ mgboko-a;
tẹme unu byakwa iya phọ g'onye kpafụtaru ụri.
Ọo iphe ono meru g'o gude mu nọdu epfuru iya unu;
epfushiru iya unu ike sụ unu jiko g'unu te ewokwaru onwunu tọgboru ẹgu ẹjo-iphe,
dụ iche iche,
anọduje agụ nemadzụ ẹgu ememe.
Ọ kwa ndzụ ọ̀phúú ono,
Chileke nụru unu ono bẹ ẹgu eme ẹjo-iphe ono anọduje etso ọgu.
12 G'umere unu shije ekiri l'iphu ndu ete ekwedu kẹ Chileke;
k'ọphu bụ ẹphe -bokpọonu unu ibo l'unu bụ ndu eme ẹjo-iphe;
ẹphe eleanaa umere unu l'ọ dụnukaru ree;
ẹphe egudekwanụ iya jaa Chileke ajaja mbọku ono,
ọo-bya ekpee phẹ ikpe ono.
13 Unu wozejekwa onwunu alị l'iphu ndu ọha meru ndu-ishi;
m'ọbvu Nnajịuphu;
l'iphu ndu-eze,
bụ phẹ bẹ ike dụ l'ẹka;
14 mẹ l'iphu ndu bụ ọ-chị-ọha,
bụ ndu e yeru g'ẹphe hụ̀je ndu eme ẹjo-iphe ahụ̀hù;
ẹphe ajajẹ ndu ọphu eme iphe,
dụ ree ajaja.
15 Noo kẹle iphe,
dụ Chileke l'uche bụ g'unu gude umere ọma mechishia ẹhu-eswe ẹhu-eswe ndu amadụ iphe anọduje epfuru unu ono.
16 Kéreshi bẹ tọakwaru unu l'ẹgbu.
Ọle ọ tọ bụkwa g'unu bya eworu onwunu saarụ eme iphe-ẹji ọgbo.
Unu mejechia umere,
gbaru ndu ejeru Chileke ozi.
17 Unu kwabẹje onyemonye ùbvù.
Iphe,
bụkpoo ndu bụ ụnwunna;
mbụ ndu nọ Kéreshi l'ẹka;
bẹ unu eyekọtaje obu.
Unu tsụjekwa Chileke ebvu.
Unu akwabẹjekwapho eze ùbvù.
Iphe-ẹhuka, Kéreshi jeru bụ anyi iphe-leta-mee
18 Unubẹ ndu ejeru nemadzụ ozi;
unu wozejekwa onwunu alị l'iphu nnajịuphu unu;
kwabẹje iya ùbvù.
Iphe,
bụkpoo iphe,
ẹphe sụru g'unu mee;
unu mejekwa iya.
G'ọ tọ bụekwapho onye ọphu nnajịuphu iya dụru odoo bya emeru ọnu ụtso bẹ a-kwabẹje iya ùbvù kpoloko.
G'onye ọphu nnajịuphu iya dụru ẹhuka kwabẹjekwa iya phọ ùbvù.
19 Chileke bẹ ẹhu atsọjekwa ụtso mẹ ọ -bụru l'unubẹ ndibe iya gude iya ata nshi eje iphe-ẹhuka,
byaru unu;
mbụ iphe-ẹhuka,
e meru unu;
unu nọdu eje l'ẹbe abụ l'ọ dụru iphe,
unu meru,
dụ ẹji.
20 Ọle ọ tọ bụkwa:
a -nọdu ahụ̀ ngu ahụ̀hù iphe,
dụ ẹji,
i meru ị nọdu ata nshi;
ono ta agbakwarụ g'a jaa ngu ajaja iya.
Ọ kwa onye meru iphe,
dụ ree;
a nọdu echi iya iphe ẹheni;
onye ono nọdu ata nshi;
noo onye Chileke a-ja ajaja iya bụ ono.
21 Noo l'ọ kwa eje iphe-ẹhuka ẹgube dụ Chileke ree ono bẹ Chileke kudoru unu oku iya.
Lẹ Kéreshi l'onwiya gudekwa k'iswi ẹhu unu jekwaaphọ iphe-ẹhuka.
Ono bụwaruro iphe-leta-mee bẹ o meru doberu unu;
k'ọphu unu a-nọdu anwụ ẹka iya.
22 “Onye adụdu iphe-ẹji,
o mejeru;
ọphu ntuphu-ire adụjeduru iya l'ọnu.”
23 A kwagọkpokwaaru iya ìphù;
ọle o to phulatadụru.
E mee ya mkpawere;
ọphu ọ dụdu onye ọ sụjeru lẹ ya e-melata.
Iphe,
o mechiaru bụ l'o woru onwiya ye Chileke l'ẹka;
mbụ Chileke ono,
bụ onye-ikpe,
ekpeje ikpe,
pfụru nhamụnha ono.
24 Kéreshi l'onwiya bẹ vutawaru iphe-ẹji,
anyi meru g'ọ hakọta l'ẹhu onwiya teke ono,
a pfugburu iya l'oswebe onoya.
G'anyịbedua ono,
nọ l'eme iphe-ẹji nwụhu anwụhu ono abya adzụru ndzụ bụru ndu pfụberekoto.
Ọ kwa igbiri ẹchachi e chiru iya bẹ e gude mee g'unu wekọrohu.
25 Noo l'unu shi eje phururugbadaa g'atụru,
ephu ụzo;
obenu lẹ nta-a bẹ unu lwaphutawaru azụ;
lwapfuta onye ono,
eche unu g'onye eche atụru;
bya abụkwarupho onye eleta ndzụ unu ẹnya ono.