2 Onye mu ede iya anụ bụ gụbe nwa mu ono,

mu yeru obu,

bụ Timoti.

Gẹ Chileke,

bụ Nna;

yẹe Nnajịuphu anyi,

bụ Kéreshi Jizọsu meeru ngu eze-iphe-ọma;

phụkwaaru ngu phọ obu-imemini;

mekwaphọ g'ẹhu dụ ngu guu.

3 Mu etu Chileke ẹpha;

mbụ onye mu gude obu mu g'ọ ha ejeru ozi gẹ nna mu oche phẹ jeru iya;

ọphu ọowadu mu obu mini.

Iphe,

bụkpoo tekenteke,

mu epfu anụ Chileke l'eswe mẹ l'ẹnyashi bẹ mu anyatajẹ tua ya ẹpha l'opfu ẹhu ngu.

4 Timoti;

mu nyatakwarụ-a ẹnya-mini ono,

ghakashịhuru ngu l'ẹnya ono.

Ọ bụru iphe ono meru g'o gude oghoroko ngu dụ mu shii.

Mbụ-a;

ọ gụkwa mu g'a sụ lẹ mu lẹ ngu hụmaru ọzo k'ọphu ẹhu-ụtso e-jikwanụ mu ọkpoma.

5 Mu anyatajẹkwa ọkpobe ekwekwe ono,

i kweru kẹ Nnajịuphu anyi ono.

Ekwekwe ono bẹ ne ngu oche,

bụ Loyisu yẹe nene ngu,

bụ Yunayisu vuhaadaa ngu rọ ụzo kwetaadaa;

o dokwaa mu phọ ẹnya l'o nokwaphọ gẹ gụbedua kwetarụ.

6 Noo g'o gude mu nọdu anyatarụ ngu sụ g'i mekwaa iphe-ọma ono g'o ree ire;

mbụ iphe-ọma ono,

Chileke shi l'ẹka ono,

mu byabẹru ngu l'ishi nụ ngu teke ono,

mu pfuru nụ Chileke l'opfu ẹhu ngu ono.

7 Lẹ Unme-dụ-Nsọ ọphu Chileke nụru anyi ta abụkwa Unme,

l'e-me anyi g'anyi tsụje ebvu.

Ọ kwa Unme a-nụje anyi ike bya abụru Unme n-yemobu;

bya abụru Unme emejekwaphọ g'anyi dụ ike sedekọtaje onwanyi.

8 Ọo ya bụ;

g'ọ tọ dụkwa teke ịisoje ẹnya epfuru ndiphe l'ị bụ onye kẹ Nnajịuphu anyi ono.

Ọphu iphere ẹhu mbẹdua adụjekwa ngu;

mbụ mbẹdua ono,

a tụru mkpọro l'opfu ẹhu Nnajịuphu anyi ono.

Iphe,

ii-mechia bụkwa g'i jee òkè iphe-ẹhuka nkengu l'iphe-ẹhuka ono,

anyi eje gude ese iswi ozi-ọma ono.

Chileke bẹ e-mekwaa g'ị dụ ike ejeje iya.

9 Ọo Chileke ono bẹ bụ onye dzọru anyi;

bya ekua anyi oku,

dụ nsọ ono;

ọ tọ bụdu iphe,

anyi setarụ l'akanya;

ọ bụ eze-iphe-ọma,

bụ iphe,

ọ tụbehawaru l'o noo gẹ ya l'eme iya.

Ono bụru iphe,

ọ gbẹ l'ẹka Kéreshi Jizọsu meeru anyi tẹme mgboko dụ.

10 Ọle nta-a bẹ ọ byaru emee:

a hụma-dzuru eze-iphe-ọma ono;

kẹle Kéreshi Jizọsu ono,

bụ Onye-Ndzọta anyi ono bẹ byawaru eliphe-a bya emebyiwaa ike k'anwụhu.

Nta-a bẹ o shiwaa l'ozi-ọma ono mee g'ahụma-dzuru ndzụ ono;

mbụ ndzụ ọphu bụ a -dzụwaru iya;

a taa nwụhubaedu anwụhu.

11 Ọ bụru iya bẹ a họtaru mu gẹ mu sajẹ àsàsà;

mu abụkwarupho onye-ishi-ozi iya;

bụru onye ezi iphe ezizi.

12 Ọ kwa iphe ono meru g'o gude mu nọdu ejekọtakpoo iphe-ẹhuka-a,

mu eje-a;

ọphu ọ bụdu l'iphere iya adụje mu;

noo lẹ mu maru onye mu kweru nkiya;

tẹme o doo mu ẹnya ree l'ọo-dụ ike kwakọbe iphe ono,

mu yeru iya l'ẹka ono jeye mbọku ono.

13 Gudeshiẹkwapho ọkpobe-opfu ono,

ị nụmaru mu l'ọnu ono;

g'ọ bụru iya a-nọdu akpọ-ziru ngu ụzo g'ii-gudeje epfu opfu;

kweta iya;

nọdu Kéreshi Jizọsu l'ẹka yee nwibe ngu obu.

14 Kwabẹkwaru ẹguru iphe ono,

e yeru ngu l'ẹka ono ẹnya.

Ọo Unme-dụ-Nsọ ono,

bu l'ime anyi ono e-me g'ị dụ ike letakọta iya ẹnya.

15 ?Ọ kwa l'ị maru lẹ ndu Eshiya,

g'ẹphe ha bẹ tụkoakwaru g'ẹphe ha gbakashịhu parụ mu haa;

mbụ je akpaa lẹ Fayigẹlosu yẹe Hemojinizu.

16 Gẹ Nnajịuphu phụaru ndibe Onẹsiforosu obu-imemini;

kẹle o shi anọduje agba mu unme;

ọphu iphere mu adụjedu iya gẹ mu nọ mkpọro-a.

17 Teke o beberu byarwuta Romu bẹ ọ wataẹru mu phọ achọshi ike jeye teke ọ hụmaru mu.

18 Gẹ Nnajịuphu jiko yekwarụ iya ẹka;

gẹ Chileke phụaru iya obu-imemini mbọku onoya;

gụbedua l'onwongu mawaru-a g'o yetaberu mu ẹka lẹ Efesọsu.