2 Ọ sụ phẹ:

“?Unu dobesu lẹ ndu Gálili ono kakọta ndu Gálili ọzo abụ ndu eme iphe-ẹji opfu l'e gburu phẹ ẹgube ono.

3 Mu sụ unu:

Waawaa-o!

Teke ọ bụ l'izimanụ iphe-ẹji unu ta alwakọtaduru unu azụ;

unu lwapfuta Chileke bẹ unu a-lakọtakwapho l'iswi ẹgube ono.

4 Tọo ụmadzu iri l'ẹsato ono,

ụlo-eli ephekerephe Sayilowamu zeru tugbushia ono;

 ?unu dobesu l'ẹphe ka ndu Jierúsalẹmu ọphuu abụ ndu ẹjo-iphe?

5 Mu sụru unu:

Waawaa-o!

Teke ọ bụ l'izimanụ iphe-ẹji unu ta lwakọtaduru unu azụ;

unu ghaa umere bẹ unu a-lakọtakwapho l'iswi nno.”

6 Ọ bya anmaa ẹtu-a sụ:

“Ọ dụru oshi figu lanụ,

nwoke yeru lẹ mgbabu iya.

Ọ nọdu abyajẹ elee ya ẹnya mebyi;

ọ tọ dụdu iphe,

ọohuma.

7 Ọ sụ onye-ozi mgbabu:

‘?Ị hụmaru lẹ mu byawaru apha ẹto mgburugburu bya elee ẹnya mebyi l'oshi figu-a:

ọle ọ tọ dụdu iphe,

ọ mịtaru.

Gbutsua ya!

 ?Bụ gụnu meru g'o gude o jee adzụru ndzụ emebyishiru mu alị?’

8 Onye-ozi mgbabu ono sụ iya:

‘Jiko hafụa ya rọ apha lanụ-a;

gẹ mu bvupheadaa ya mgburugburu yeadaa ya ọzu.

9 Teke ọ bụ l'ọ mịru mebyi apha ọzo;

ọo ya bụ l'ọ dụ ree;

teke ọdumeka l'ii-gbutsuwa iya rọ.’ ”

10 O be teke ọ nọ l'ụlo-ndzukọ ndu Jiu ono nanụ ezi iphe l'eswe-atụta-unme;

11 ọ dụru nwanyị,

nọ l'ẹka ono,

ọbvu mewaru iphe-ememe mgbarapha iri l'ẹsato.

Ọ lọtawa iya phugọbe;

ọphu o kwejẹdu g'ọ pfụru nhamụnha.

12 Jizọsu hụma nwanyị ono bya ekua ya sụ iya:

“Nwanyị ọma!

I nwewaa onwongu l'iphe ono,

eme ngu nụ ono!”

13 Ọ bya ebyibe iya ẹka;

nwanyị ono lọchia onwiya teke ono teke ono pfụru nhamụnha;

bya ekeleahaa Chileke ekele.

14 Ẹhu ghuahaa onye-ishi ụlo-ndzukọ eghu lẹ Jizọsu meru g'onye iphe eme wekọrohu l'eswe-atụta-unme.

Ọ sụ ndu ono:

“Abalị ishii bẹ e doberu k'ejeje ozi;

unu byajẹ g'e mee g'unu wekọrohu teke ono;

unu ta abyajẹshi l'eswe-atụta-unme.”

15 Nnajịuphu sụ iya:

“Unubẹ tụko-l'ẹhu-atụko-l'obu-a!

 ?Unu ta akpọfujedu eswi unu l'ẹhu l'ẹhu;

ọzoo nkapfụ-ịgara unu l'ọka iya;

chịru iya je g'ọ ngụta mini l'eswe-atụta-unme?

16 Sụ-a;

nwanyị-a,

bụ awa Ébirihamu-a,

Nsetanu keru ẹgbu eshi k'apha iri l'ẹsato-a;

 ?tọ gbadụru kẹ g'a tọfu iya l'ẹgbu ono l'eswe-atụta-unme?”

17 O pfuchaẹpho nno;

iphere gude ndu ono,

etso yẹbe Jizọsu opfu ono.

Ikpoto ndu nọ l'ẹka ono tụko teahaa ẹswa k'eze iphe ono,

Jizọsu emeshibẹbe ono.

18 Jizọsu sụ:

“?Bụ gụnu bẹ ẹka Chileke bụ eze dụ g'ọ ya?

 ?Bụ gụnu bẹ mu a-tụru iya yeru?

19 Ọ dụ g'akpụru oshi mọsutadu,

nwoke wotaru je akụa lẹ mgbabu iya.

O fua;

vuta bụru oshi k'ẹka iya;

k'ọphu ẹnu,

ephe l'eli byaru bya akpaahaa ẹpfune l'ẹkali iya.”

20 Ọ sụkwa phẹ phọ ọzo:

“?Bụkpoo gụnu bẹ mu a-tụru ẹka Chileke bụ eze yeru?

21 Ọ dụ g'iphe-ekoje-buredi,

nwanyị hatarụ nwanshịi ye l'ukpokutu iphe,

eegudeje eme buredi,

jiru ẹda-mbacha;

o woru iya dobe jasụ ọ tụko koo.”

22 Jizọsu nọdu ejekpọepho ụzo Jierúsalẹmu,

ooje.

Ọ nọdu aghatagbaa mkpụkpu lẹ mkpụkpu ezi iphe.

23 Noo ya;

ọ dụru onye jịru iya sụ iya:

“Nnajịuphu-e!

 ?Ndu aa-dzọta a-ha nwanshịi tọo?”

Ọ sụ phẹ:

24 “Unu kpata ụzo shia ụzo,

dụ kparagụ bahụ;

kẹle aa-dụ igwerigwe mee g'a bahụ;

ọle ẹphe taa dụdu ike.

25 A -nọnyawaa onye nwe ụlo gbẹshi woru ụzo guchia;

unu apfụru l'etezi akụ ẹka l'ụzo sụ:

‘Nnajịuphu;

gụhaaru anyi ụzo!’

L'ọo sụ unu lẹ ya ta amakwa ẹka unu shi-o!

26 Unu awata epfu sụ:

‘Obenu l'anyi rikwaru;

bya angụa l'iphu ngu;

tẹme i zia iphe l'edupfu anyi.’

27 Ọle ọo-sụkwapho:

‘Mu sụru unu lẹ mu ta amadụ ẹka unu shi bya;

unu gbẹshi mu l'iphu g'unu ha;

unubẹ ndu ẹjo-iphe ono!’

28 Noo ẹka unu a-nọdu kwaa ẹjo ẹkwa;

taa ikireze teke unu a-nọdu ele Ébirihamu ẹnya;

waa Áyizaku;

waa Jiékọpu;

waa ndu mpfuchiru Chileke l'ẹka ẹphe nọ l'ẹka Chileke bụ eze;

unubẹdua bụru ndu a chịshiru achịshi.

29 Amadụ e-shi l'ụzo ẹnyanwu awawa mẹ l'ụzo,

ẹnyanwu arịba;

shikwaphọ ndẹgu;

shi ndọhali;

bya lẹ nri l'ẹka Chileke bụ eze.

30 Unu hụma-a;

ọ dụru ndu bụ ikpazụ,

l'e-mechaa bụru ivuzọ;

tẹme ọ dụkwarupho ndu bụ ivuzọ,

e-mechakwanaa bụru ikpazụ.”

31 Teke ono teke onokwaphọ bẹ ọ dụru ndu Fárisii,

byaru bya asụ Jizọsu:

“Shilẹkwaa l'ẹka-a tụgbua nta;

kẹle Herọdu achọkwa ngu egbugbu.”

32 Ọ sụ phẹ:

“Unu je akaru awuru ono lẹ mu achịfu ọbvu;

bya eme gẹ ndu iphe eme wekọrohu ntanụ-a yẹle echele;

o -be mbọku k'ẹto;

ozi mu abvụ.

33 Ọle g'ọ dụhabe;

mu a-nọdukpoepho eje iphe,

mu eje ntanụ-a;

waa echele;

waa nwarechi;

kẹle ọ tọ dụdu ẹka ọzo,

onye mpfuchiru Chileke l'e-phuhu gbahaa lẹ Jierúsalẹmu!

34 “Gụbe Jierúsalẹmu;

Jierúsalẹmu,

tụkoru ndu mpfuchiru Chileke egbu;

bya egude mkpuma atụ-gbushi ndu e ziru g'ẹphe byapfuta ngu.

Tekenteke bẹ mu meru gẹ mu chịkobe ụnwu ngu l'ẹka lanụ gẹ nepfu-ọku achịkobeje ụnwu iya l'ime ǹkù iya-a;

ọphu i kwedu!

35 Hụma ahụma;

l'ibe ngu bẹ aa-gbagharu haa ya l'ọ bụru ochobu!

Gẹ mu karụ unu:

unu taa hụmabaekwa mu jasụ teke unu a-sụ:

‘Chileke gọru ọnu-ọma nụ onye ono,

gude ẹpha Nnajịuphu abya ono.’ ”