\id 3JN - Ipili NT [ipi] -Papua New Guinea 2008 (web version -2013 bd) \h 3 Jone \toc1 Joneto Pepa Tepone Peyo Pee Leane Oko \toc2 3 Jone \toc3 3Jo \mt1 3 JONE \mt2 Joneto Pepa Tepone Peyo Pee Leane Oko \c 1 \p \v 1 Namba sosa okona akali kawane okomane nambana yamapane yene amene Gayasa nimbana pepa oko peyo epe leyo. Nambato nimba towa wayumane epelewa yamapane yo atalawane.\x * \xo 1 \xt Ap 19:29; Lom 16:23\x* \p \v 2-4 Nambana yamapane yene amene, wamba Kitisene minditupa namba atewanga epoto, nimbato Gotena pii enene oko wato minu atoto, pii okonemane pipe leya pua pilini lo namba langeai-kola, namba epele andane wete ewa. Nambana andopane yame tupamane Gotena pii enene oko wato minu ateyai lene oko ale wato, namba epele andane wete alawane okonemane waka minditaka epele alawane tupa pitaka sia minalane. Wandakali utupane-mane wuane leai oko ale wato, nambato nimbana tandini oko kuai leya nembo teyo. Wuane pua teke nimbana umbaini okopi kuai lola-kola, nimbato piape pule tupa pitaka kuai leakale lo nambato pote leyo.\x * \xo 2-4 \xt 2Jo 4\x* \s Nanimato Gotena Piape Akali Tupa Moyo Atamakale Leane Oko \p \v 5 Nambana yamapane yene amene, nimbato Kitisene wandakali tupa moyo, piape kuai lo pilini. Nimbato wandakali utupanena minditupa wamba lee-mane anda napee tekeko, nimbato wandakali utupanepi moyalene. \v 6 Nimbato wandakali utupane moyee-kola, wandakali utupanena minditupa epoto, nimbato utupane towa epelewa yamapane yoto, moyalene lo nanimana sosa oko lamai-yaini. Akali utupane yuu waka mindina poyale atolai-angi, nimbato mana Goteto epele alane oko wato minuto, akali utupane wayumane moyalu, pulupa leendo, nimbato mana epene wete mindi wato minule-kola pulupeya.\x * \xo 6 \xt Tai 3:13\x* \p \v 7 Anu peakale nambato wuane leyope. Akali utupane-mane Jisasana piape oko pimakale nembo toto, balana pii oko aitene wandakali tupa lamalu peyai wete, aitene wandakali utupane-mane pii lamayaini akali utupane moyo minditaka mindi mai na-piyaini.\x * \xo 7 \xt 1Ko 9:12\x* \v 8 Tene okonena, nanimato Gotena pii enene oko lamayaini akali utupane towa potomane lo atamakale nembo toto, piape akali utupane moyo, minditaka utupane maipe-pene. \s Diyote-pasato Gotena Piape Akali Tupa Moya Napiyane Leane Oko \p \v 9 Kitisene wandakali tupamane Gotena piape akali tupa moyakale loto, wamba nambato pepa mindi peyoto, sosa okona pee lewa tekeko, akali Diyote-pasa bala tane sosa okona akali kawane atokale nembo toto, nanimana pii oko ale na-alane. Jia. \v 10 Balato nanima ando lamba loto, mana koo minditupa tako pua minalane. Kitisene amene minditupa yuu waka mindisa atalu epeyai-kola, balato akali utupane moyo yatawa pali napiyane. Dee, sosa memba waka mindimane akali utupane moyo yatawa palimakale nembo teya-kola, Diyote-pasato wandakali utupane yatawa palulaini lo asia kando laka piyane. Sosa memba mindimane balana pii tanga loto, Kitisene amene utupane yatawa palea-kola, Diyote-pasato sosa memba okone bala sosa memba ata napene, takita ateakale lo peyo wata alane. Balato mana koo utupane pitaka minalane okonena, matili namba nimba atelenga epewando, wandakali pitakana wenonga nambato balana mana koo minalane utupane pitaka lapana wakale. \s Nimbato Mana Epene Tupa Wato Minu Atape Leane Oko \p \v 11 Nambana yamapane yene amene, koo piyaini wandakali utupane-mane Gote anda na-piyaini. Tene okonena, wandakali mindimane mana koo mindi mineando, nimbato balana mana koo okone wato mina napipe. Jia. Mana epene minalaini wandakali tupa Gotena yame atalaini. Tene okonena, wandakali mindimane mana epene mindi wato minu ateando, nimbato balana mana epene okone wato minu atape.\x * \xo 11 \xt 1Jo 3:4-10\x* \v 12 Wandakali pitaka-manepi, Gotena pii enene okomanepi, nambatopi, nanima pitaka-mane akali Dimiti-yasa balato mana epene tupa wato minu ateya leyama okone enene leyai lo nimbato nembo tele okoni. \s Pii Lokoyo Pua Leane Tupa \p \v 13-14 Nambato pii kambua nimba langulane eya tupa nimbana pepa okona peyo epe lauwa-yale tekeko, pii utupane pitaka pepanga peyo epe na-lokale. Jia. Namba wamba ini nimba atelenga epoto, nimba towa pii lalawa pua atapakale nembo teyo.\x * \xo 13-14 \xt 2Jo 12\x* \v 15 Nimba mini epene palu atape. Nimba towa potomane lo atalaini wandakali wali ateyai tupamane nimba kuai lo atalapape leyai. Namba towa potomane lo atalaini wandakali yuu nimba atele okona ateyai tupa pitaka mindiki-mindiki lo kuai lo atalapa leyo oko nimbato utupane lamaipe.