A markato a tsimus
4
E Kristo e sagohi a kamits i tuenreinen,
na limiou go mar hakats hatagala has uaiam iesana batema rama nami a nikamits.
Taraha,
a katuun te sagohena a nikamits i tuenreinen ema hakats nanei tega kato menaien a markato a omi.
2 Te markato tala uanen teka ba limiou tema tatei kato lenemi a markatona turu ngilngilina i puta.
E möa.
Na turu mamana u lan alimiou go markato las uaiam temar ngil uana e Sunahan.
3 Tara pöata i manasa alimiou u kato hantuna hakapeiam man markato a man omi te roron ngiler u katuun te hahamanar.
Alimiou u ronge mia a peisa milimiou turu ngilngil u omi bate uaua pala mia tara man pati a man omi,
bate tutu memiou u ramun u tagala,
bate hatsunono hase miou a man got gamogamo.
A markato teka alimiou u katoe men i manasa kaba i romana e möa.
4 Ba pala te hahamanar e asingoto koru ner tema kato lel gono mera mien limiou a man markato a man omi pinopino teka,
ba nori te ranga hohomi rariou limiou.
5 Kaba i murimuri nori ena tatei ranga peisa ner romana a man mouna a man markato ti katoeien te tuol rien romana i matana e Sunahan,
nonei te ona ranou u katuun te töatöar na u katuun ti mate.
6 Nonei a ka ti habulungana bei u Bulungana u Niga turu katuun ti mate,
u tuanrei i taren ti onari bate mater,
kaba u namnamei i taren te tatei töatöar temar töatöa uana e Sunahan.
Tarakap haniga naiam a man nitagala te hala railimiou e Sunahan
7 A nikapakapa tara mamanaka e susuku hakapa.
Nonei tego hakats halesala haniga beiam limiou bate hakats haniga mia i peisamiou ba limiou te tatei singo uamiou tere Sunahan.
8 A ka te pan bala koruna tara mamanaka,
alimiou go hiangilngil hatagalaiam,
taraha u ngilngil nonei te kato hataie nou a mamana a markato a omi.
9 Alimiou go lu merami a palair u katuun i luma i tamilimiou,
bate tarakap haniga ramen batema ranga sil ramien.
10 Alimiou a man tötöa hoboto u lu hakape muma a nitagala a niga tere Sunahan.
Na limiou go tarakap haniga naiam a man nitagala teka bate taguhu ramiou a palair u katuun.
11 A katuun te ka mena a nitagala tega habulungana menaien u raranga,
ega habulungana hamatskön u raranga tere Sunahan.
Na katuun te roron hitaguhuna ega hitaguhu mei a nitagala te lue nen tere Sunahan.
Ba tara mamanaka a solona e Sunahan e hala sei sila naroa tere Iesu Kristo,
nonei te ka nitöa mena a nikapan na nitagala tara mamana pöata.
U mana.
U nikamits te söater u kristen
12 A man hahatoulana i tar,
alimiou goma asingoto nami a kamits pan te butu silena tega torohana merai limiou.
Alimiou goma poeiemi,
“Ta ka halhal ta omi te butuna i tarara.”
E möa.
13 Alimiou go sasaalaiam,
taraha e here nei alimiou e sagoho gono memi e Kristo a kamits.
Nonei tego tatei sasaala koru beiam limiou romana tara pöata te butu mena men romana a nikapan i tanen.
14 Alimiou go sasaalaiam tegi ranga homi merai limiou te kukute mena milimiou e Kristo,
taraha a ka teka e poeiena u Namnamei u tagala tere Sunahan e kana i tamilimiou.
15 Kaba,
tego sagoho kamits ia lö,
alö goma here ii a katuun a hihipuli,
na katuun a kopkop,
na katuun a herheroko,
na taina katuun te kato homina.
16 Kaba tego kamits sil mena milimiou te kukute mena milimiou e Kristo,
alimiou goma matsingolo memien.
E möa.
Alimiou go haniga uaiam tere Sunahan te ka mena milimiou u solon “kristen.”
17 A pöata tega hatanian ona merai e Sunahan u katuun e butu hakapa,
na nonei e ona mam ranou u katuun i tanen.
Na te hatania nen romana i tarara,
ga ime tena mar kapa uanoen romana turu katuun te hipus ner u Bulungana u Niga i tanen?
18 U Buku u Göagono e mar ranga uana teka:
“Te kamenen a tsi tabubun maroro koru te tatei lu pouts merari u katuun u matskö,
Ga ime te markato ueier romana u katuun te habirits hasoala baner e Sunahan bate katoeier a markato a omi?”
19 Na e markato uana teka,
te kamits sile mia limiou u ngilngil tere Sunahan,
ba limiou te kato haniga miou,
bate hake mia a nitöatöa i tamilimiou i limana e Sunahan te kato raiou limiou.
Nonei e roron kato hamanena a ka te ranga nanen.