6
U katuun te karia tara tou kits turu katunun kukui puku egi tara marei a tsunono i taren bate solosei raren.
Taraha,
u katuun e namots ranga hohomi ner a solo tere Sunahan na u hihatuts i tarara.
2 A katunun kukui puku te ka na tara katuun pan te kamena u nihamana goma tatei omieien,
noahasina te pala uanen tere Kristo.
Nonei ega ngil korueien bate kui hatagala koru beienen,
taraha,
nonei e kui beiena a katununa turu nihamana.
U hihatuts u gamo na u mana
Alö go hihatuts hatagalein a manka teka.
3 A katuun te hihatuts nena u hihatuts u gamo ema tahongo neia turu hihatuts tere Iesu Kristo a Tsunono i tarara,
u hihatuts u niga na u mana.
4 A mar katuun teka e ngil koruena a peisanen na ema atei silenei ta ka,
na e ngilin ranga sisi tuun mena u ranga.
A markato teka e habutena a hiomimi ba katuun te ranga homi nena a tai,
bate hiahakhakats homir bate hiangenngenar.
5 A hiaraharaha te katon toa naier u katuun teka,
u baku tutu tema atei sil haseri a ka a mana ba nori te poeier,
u lotu a maroro te tatei lu sila namialö ta moni.
6 A hihol pan e tatei lue mialö te hapan mena mi lö e Sunahan bate sasaala mem a manka te ka memölö.
7 Ara ima la memei ta ka tara pöata ti posa raira,
e möa.
Na ra ema tatei la has merei ta ka tara pöata tena mate rouara.
8 Kaba ragi masa mei te ka menarei ra a kannou na u hasobö.
9 U katuun te ngilin ka mer a mamanaka a parpara e tutu lala tuun rena bate rus beier a maroro tara markato a omi.
A maroro teka,
a tanga turu mamana u ngilngil u omi na u tutu te antunan las mena nei a katuun tara han a omi i hel.
10 Taraha,
u ngilngil tara moni a mouna koru a mamana markato a omi.
Turu ngilngil pan koru tara moni ba palair u katuun te hapolasa susuler a markato te hamana uarara tere Sunahan bate katoeier a mamanaka a omi te kato hakamitsena a peisaren.
U hihatuts te la hamatskö uu tere Timoti
11 Kaba lö o Timoti,
alö a katuun tere Sunahan,
ka halehana ban a manka teka.
Torohanan tagala sil tego kato hamatskö uu lö bate kato haniga mia i matana e Sunahan bate hamane men.
Alö go ngilir u katuun hoboto bate tuatami mia i taren na lö goma sökana has ii.
12 Tagala sil e Sunahan ba lö te hamana haniga uam i tanen.
Pile hakarapotein a nitöatöa te ka nitöana.
E Sunahan e ngö sile ii lö a nitöatöa teka tara pöata tu ranga hanigaia lö i matar u katuun u parpara temar hamana uamia lö i tanen.
13-14 Alö go pile hakarapotein u raranga tere Sunahan batema kamenei tu korkoriana e antunana tena la pouts nama romana e Iesu Kristo te ranga hanigein u raranga u mana i matana e Pontias Pailat.
Alö go hengo hanigei u raranga tere Sunahan,
ba u katuun tema tatei ranga homi naroi lö.
Alö go markato uu teka e antunana tara pöata te butu pouts nama romana e Iesu Kristo a Tsunono i tarara.
15 Nonei e butu nama romana tara pöata te haniga hakapein e Sunahan.
E Sunahan a töa puku te pan saluhena na mouna a nisasaala.
Nonei te King pan rena u king hoboto na te Tsunono pan rena u tsunono hoboto.
16 Nonei a töa tema antunan mate noi na nonei e kana turu ualesala pan tema antunan la hasukusuku uari u katuun.
Emoa ta katuun tega antunan tareien i manasa na ema antunan tara noahas nari i romana.
Aragi soloseien,
nonei te tagala saluhe nitöana.
U mana.
17 Hateir u katuun te ka mer a mamanaka a para i romana gima solose ii a peisaren.
Nori gima hasolaia tara moni tuun te antunan taia boroborona.
E möa.
Nori gi hasolaia tere Sunahan a tatangana koru te hala raneira a mamanaka te kato hasasaala ranoura.
18 Hateiri egi kato haniga bate katoeier a mamana markato a niga.
Nori egi tatangana bate hia halhala ner a manka i taren.
19 Te kato uarouen teka ba nori te haputu beri a peisaren a manka man niga hamana,
a man kana i Kolö te taguhu ranouen i murimuri.
Ba nori te antunan lue riou a nitöatöa hamana.
20 O Timoti,
tara kapiin a manka hoboto ti hale ii lö.
Ka halehana ban u ranga pinopino tema hapane nei e Sunahan,
na turu rangan raharaha turu katuun te gamor bate poeier e ka mer a niatei.
21 A palair u katuun e poeier e ka mer a niatei,
kaba nori i laba hakapein a marorona turu nihamana.
E Sunahan e tatei taguhu ranou limiou.
Nonei talasi.
Alia e Pol