'Atahutatɨ niuki tuayamete 'atahutame kwiniyayari memi'atɨa
15
Xeime tawarita 'inɨari mariweme nekaniuxeiya muyuawitsie tiyɨhɨxiyatsitɨwame:
'atahuta niuki tuayamete nekaniwaruxeiya 'atahutame kwiniyayari memexeiyakai 'imatɨrieka miemete,
mɨkɨkɨ Kakaɨyari haxɨaya memaye'atɨanikɨ.
2 Yaxeikɨata haramara xikɨri mutitatawe hepaɨ 'anekame nekaniuxeiya.
Mɨkɨ meta nepɨwaruxei haramara tetsita me'uti'ukame yeutanaka mema'iwaxɨ,
'ɨkiyari meta 'inɨariyari kemɨtitewa.
Haripa mekaniu'ɨkaitɨ Kakaɨyari mɨwayetuiriekai,
3 meta Muitsexi nɨawarieya mekwikatɨ Kakaɨyari ti'uximayatsiriwame,
meta Muxa nɨawarieya:
«Pepɨmariwe meta 'a'uximayatsika pɨtiyuhɨxiyatsitɨwa,
Ti'aitame,
Kakaɨyari Naimekɨmɨtɨrɨkaɨye.
Heitseriemekɨ meta 'ahuye kaniyuritɨni,
nuiwarite Tiwa'aitɨwame.
4 Kamɨtsɨ Ti'aitame,
mekamenayemakaxekakuni.
Kamɨtsɨ 'aixɨa petikuxaxatsiwame mekamenayeitɨakakuni.
'Ekɨ xeikɨa pekanipatsieka.
Yunaitɨ nuiwarite mekani'axɨakuni,
nenewieri memetsipitɨanike
'a'uximayatsika
heitseriemekɨ mɨhekɨakɨ».
5 Mɨya tiuyɨku mɨpaɨta nekatiniuniere,
muyuawitsie tuki muwe kaneuyepiere,
hakewa Kakaɨyari mehekɨatsie.
6 Muwa tukita mekanayenexɨani niuki tuayamete 'atahutatɨ memi'atɨa 'atahuta kwiniyayari.
Rinu 'ixurikiyari mɨ'itiya mepanakatɨtɨkatei xawatɨmekɨ,
meta huru hɨiyameyarikɨ yutawitsie mepayuhɨatɨkatei.
7 Hikɨ yunaukatɨ memayeneniere,
xewitɨ mɨkɨ kaniwarutahapatɨani niuki tuayamete xexuime huru kupayari Kakaɨyari haxɨaya hɨpɨneme,
yuheyemekɨ mayeniere tsepanetɨ xeitsienituyari wiyari manuyekɨka.
8 Hikɨ tukita kɨtsi kaniuyehɨne,
Kakaɨyari xawatɨriyaya meta kemɨtitɨrɨkaɨye,
xewitɨ pɨkayɨwekai tukita meutahanikɨ kepaukake meutipare 'atahuta kwiniyayari,
'atahutatɨ niuki tuayamete memi'atɨa.