Wani
Meitanɨ'axɨa mexɨakame xapayari
Niuki tukari tiyupitɨwame hepaɨtsita
1
Tita matɨari paitɨ mɨtimieme,
tita temɨte'u'eni,
tita temɨte'uxei tahɨxikɨ,
tita 'ahurawa temɨtexeiyakai,
tita tamamakɨ temɨte'umayɨa,
mɨkɨ tekanixekuxaxatɨwani niuki tukari tiyupitɨwame hepaɨtsita.
2 Tukari matsiɨkɨtɨ kanayani.
Tame tekanixeiya,
tekanihekɨatani,
meta tekatenixe'utaxatɨani mɨkɨ tukari mɨkaxɨwe hepaɨtsita,
mɨkɨ yu'ukiyari kaniteɨtakaitɨni meta tepuxeitsitɨarie tame.
3 Tita temɨte'uxei,
tita temɨte'u'eni,
mɨkɨ tekanixekuxaxatɨwani xemeta tanaitɨ temɨtaxewinikɨ.
Ketemɨtetaxewi tame,
ta'ukiyari hamatɨa tepɨtaxewi nu'aya hamatɨa meta Ketsutsi Kɨritsitu hamatɨa tepɨtaxewi.
4 'Ipaɨ tekateniu'utɨani maye'anikɨ tatemawierika.
Hekɨariya hetsie teke'uhuni
5 'Ipaɨ panuyɨne niuki hetsɨana mɨmieme temi'eni meta temɨxekuxaxatɨwa:
Kakaɨyari hekɨariya kanihɨkɨtɨni,
yɨriya pumawe hetsiena.
6 Xɨka yate'utiyuani kename hamatɨana tetaxewi,
yɨwipa xɨka te'u'uwani,
tepɨte'itawa,
yuri yatepɨkatekahu.
7 Matsitsɨ hekɨaripa xɨka te'u'uwani mɨkɨ hekɨaripa makawe hepaɨ,
tanaitɨ tekanitaxewikakuni,
mɨkɨ meta,
Ketsutsi Kakaɨyari nu'aya xuriyaya naime 'axatemɨteyurie katani'itirieka.
8 Xɨka yate'utiyuani kename tita 'axamɨti'ane tekatehexeiya,
takɨmana tepeutayexɨrɨwa,
tita yuri mɨraine tahetsie pumawe.
9 Mexɨka te'itahekɨata tita 'axatemɨte'uyuri,
mɨkɨ kemaine yapɨtikamie,
kemɨtiheitserie yapɨtiyuriene,
tita 'axatemɨte'uyuri pɨtareuyehɨwirieni,
katani'itirieka naime mɨkatiheitserie.
10 Xɨka yate'utiyuani kename 'axatekateyuriwawe,
mɨkɨ ti'itawame tekanayeitɨwani,
niukieya tahetsie pumawe.