Nɨawari.
98
Xekenekwikani Yawé hetsiemieme kwikari hekwame,
mariweme mɨtiuyurikɨ.
Yɨtɨrɨkariyakɨ,
yumamá patsiekamekɨ,
mɨwara'iwaxɨkɨ memeye'unie.
2 Yawé pitihekɨata kemɨrayu'iwaxɨkɨ,
pɨtiwahekɨatɨa heitserie kemɨrexeiya nuiwarite wahɨxie.
3 Paye'eri naki'eriya kemɨrexeiya meta ke'aixɨa mɨtikamie,
'ixaheritsixi teɨteriyari wahetsiemieme,
yunaitɨ teɨteri kwiepa memɨtama yamepɨtemate
takakaɨyari wikweitsitɨarikaya hetsiemieme.
4 Kwi xekenahɨaweni Yawé xeyutemamawietɨ,
yunaitɨ kwiepa xemɨtama.
Xekeneutikwikani xeyutemamawietɨ kwikari meta nɨawari.
5 Xekeneutikwikani nɨawari Yawé hetsiemieme haripa hayuanekaku,
kanarikɨ meta kwikari witsihanɨyɨtɨkaime.
6 Kwi xekenahɨaweni Yawé xeyutemamawietɨ,
Ti'aitame,
pirikɨxa hayuanekaku meta kuxineta.
7 Haramara ke'utatɨrarɨkani meta yunaitɨ mana memɨteye'uwa,
meta kwie,
meta mana memɨtama.
8 'Aki haa 'amupapa muyehapane mekete'utahutsunani,
meta hɨrite meke'utikwikani meyutemamawietɨ.
9 Yawé hɨxie xekeneutikwikani,
'ukanamieniri kwiepa 'aixɨa tiyurienike.
Kwiepa memɨtama wahetsie 'aixɨa katiniyurimɨkɨ,
teɨteri wahetsie 'aixɨa 'anemekɨ katinita'aitamɨkɨ.