Teyuitɨwamete wa'ukiyari. Yuariyaya xekeneuweiyani «Pepɨka'ika'unani». 'Atsahapi nɨawarieya. Kwikari.
75
Kakaɨyari 'aku,
pamɨpariyutsi tepɨmetsipitɨa,
'aixɨa 'anemekɨ tepɨmetsihahɨawe,
yunaitɨ naitsarie 'a'uximayatsika mɨmamariwawe mepukuxata.
2 'Ekɨ mɨpaɨ pepaine:
«Kepauka ne yanemɨra'eriwani,
'aixɨa mɨ'anekɨ nepɨwaranutaxɨrieni.
3 Kepauka kwie mutayuane
meta teɨterimama yunaitɨ,
ne nekanihɨkɨtɨni 'aixɨa nemikuyuruwa».
4 «Xepɨka'uyuti'ɨreni»,
mɨpaɨ nekatiniwarahɨaweni memuyuti'ɨre.
«Temaiwawemete xepɨka'ayuyeitɨaka»,
Kakaɨyari memɨka'ayexeiya nekatiniwarahɨaweni.
5 «Temaiwawemete xepɨkayu'erieka muyuawitsie miemekɨ,
xepɨka'utiniukani witsi'anemekɨ».
6 Tewi mariwetɨ mayeitɨariwanikɨ tau manatineika pɨkamieme,
meta makayuyuipiketsie tatsutua,
7 matsi Kakaɨyari pɨhɨkɨ 'itsɨkame:
hipame pɨwahiweritɨa,
hipameta 'aixɨa pɨwayurie.
8 Yawé mamayatsie tekɨxi kanaweni winu mukwaimuxa,
haxɨaya kanihɨkɨni 'uyematɨ meta tiyutsata tinɨtɨ,
kepauka mɨkɨ mitiyeurieni,
yunaitɨ kwiepa memɨtama Kakaɨyari memɨka'ayexeiya
mekaniti'ikuni kepaukake memiyexɨni.
9 Ne 'ikɨ hepaɨtsita nepɨtikuxatani yuheyemekɨ,
nepinɨawani Kakuwu Kakaɨyarieya.
10 Kwinimieme memɨteyuti'ɨre Kakaɨyari meka'ayexeiyatɨ pekaniwarakumaweriyamɨkɨ,
meta heitserie memexeiya watɨrɨkariya hetsiemieme 'aixɨa nekanitayɨmɨkɨ.