Teyuitɨwamete wa'ukiyari. 'Ikɨ kanaritekɨ ke'utakwikarieni. Rawiri nɨawarieya.
4
Keneneuta'eiya kenemerahɨawe,
'ekɨ nekakaɨyari nehetsie nunuwame pemɨhɨkɨkɨ.
Kepauka nemɨ'uximatɨarie 'ekɨ pepɨnetsinɨtɨa,
Nenenewieri keneu'eni kenemaine keneneutinenimayata.
2 Xemeta 'ukirawetsixi xemamariwaweme xemuyu'erie,
¿kepaukake xepɨtehayewa 'axaxeteyurietɨ 'aixɨa xemɨteyuriekakɨ nehetsiemieme?
¿Kepaukake xepɨtehayewa memɨkayuri kakaɨyarixi
xewarayexeiyatɨ?
3 Mɨpaɨ xeketenemaika,
Yawé kemɨ'ane 'aixɨa mɨtiyuriene kaninaki'erieka.
Yawé kaneni'enieka kepauka nemehɨawe.
4 Kepauka xemɨha'a 'axaxepɨkateyurieka,
xemuhenitsie xekeneyu'iyaritɨaka 'axaxemɨte'uyurikɨ
yu'iyaritsie xekeneyumaika.
5 'Aixɨa mɨ'ane mawari xekeneyetuaka
Yawé hetsie yuri xete'erietɨ.
6 Yuwaɨkawatɨ mɨpaɨ mekaniutiyuaneni:
«¿Kemɨ'ane 'aixɨa mɨti'ane pɨtatiuxeitsitɨawe?»
Yawé,
pe'atemawietɨ ketaneuxeiya
matsiɨkɨme kene'ayeitɨa tahetsie.
7 'Ekɨ ne'iyari temawierieka pepupitɨa 'anuyuhayewame,
tɨriku,
winu memeuxeiya wareuyeta katiniyutemawieka.
8 Neka'uximatɨarietɨ nekaniukahupuni nekaniukakukutsuni,
'ekɨtsɨ xeikɨa Yawé,
'aixɨa 'iyari pekanenayenieritɨaka.