Mawari wewiwame 'Ewari hɨriyaritsie
27
Muitsexi meta 'ukirawetsixi 'ixaheritsixi yunaime teɨteri mɨpaɨ mekateniwarutahɨawe:
«Xekenaye'atɨa naime 'ikɨ 'aitsikate hikɨ temɨxeyetɨirie.
2 Kepauka Kurutani hatuxameyaritsie xemanukɨne,
meta 'ari xeheutahaxɨaximetɨ kwie Yawé xekakaɨyari mɨxeyetuirietsie,
mana tetexi xepanɨkɨtɨkɨ 'anenekame,
naxi xepitiwirieni,
3 mɨkɨtsie naime 'aitsikate xepa'utɨaxɨani.
Mɨpaɨ xepɨteheyurieni kepauka xemanukɨne Kurutanitsie,
kepauka xemɨ'axɨani kwie Yawé xekakaɨyari mɨxeyetuirietsie,
hakewa waɨkawa retsi meta xiete mexuawetsie,
Yawé xekakaɨyari xetutsima kemɨtiwarutahɨawekai.
4 Kepauka xemanukɨne Kurutanitsie,
mɨkɨ tetexi 'Ewari hɨriyaritsie paitɨ xekanitiyatsakuni,
naxi xekanitiwiriekuni,
yemekɨ hikɨ kenemɨtixe'aitɨa.
5 Manata xepitawewieni tetexikɨ mawari wewiwame Yawé xekakaɨyari hetsiemieme,
tetexi tepɨakɨ xixiyatɨkaime xepukayurieni,
matsi tetexi nanaimimekɨ pɨta,
6 mɨkɨtsɨ mawari taiyame Yawé hetsiemieme tetexi yeuta miemekɨ kaniyutawewiwamɨkɨ.
Mana hetsiena mawari xepɨtataiya Yawé xekakaɨyari hetsiemieme,
7 mana 'aixɨa memɨteyuxeiyanikɨ mawariyari xepɨwewieni,
meta xeyutemamawietɨ xepɨtekwani Yawé xekakaɨyari hɨxie.
8 Mawari wewiwame tetexiyaritsie naime 'aitsikate waɨkawa yuhekɨkɨakamekɨ xepa'utɨaxɨani».
'Axakememu'itɨarie 'Ewari hɨriyaritsie
9 Hikɨ Muitsexi meta rewitsixi mawari wewiwamete yunaime teɨteri mɨpaɨ mekateniwarutahɨawe:
«'Ixaheritsixi,
kayuwatɨ xekeneumaka,
xekeneu'enana.
Hikɨri Yawé xekakaɨyari teɨterimama xekanakɨne.
10 Kemaine Yawé xekakaɨyari xekeneu'enieka,
yaxeketenekahuni 'aitsikateya kemaitɨka,
hikɨ ne kenemɨtixe'aitɨa».
11 Muitsexi 'ana kwitɨwa tukaritsie teɨteri mɨpaɨ katiniwaruta'aitɨani:
12 «Kepauka xemanukɨne Kurutanitsie,
'ikɨ yayupaɨmetɨ nuiwarite Keritsini hɨriyaritsie mepɨyuhayewa mana 'ixaheritsixi 'aixɨa memɨwayurienikɨ:
Tsimehuni,
Rewi,
Kura,
'Itsakaxi,
Kutse meta Wenikamini.
13 »'Ikɨta hipatɨ 'Ewari yemuriyaritsie mepukuyaxe,
'axamemɨ'itɨarienikɨ memɨtaxata:
Xuweni,
Kahari,
'Atsexi,
Tsawuruni,
Rani meta Nepɨtahari.
14 »Rewitsixi yamepɨtiyuani,
karima me'utiniutɨ,
'ixaheritsixi yunaime mɨpaɨ mepɨtewatahɨawe:
15 “'Axake'u'itɨarieni kemɨ'ane kɨye kakaɨyariyari mɨtawewieni,
yatɨni kɨye xixiyakame yatɨni tepɨakɨ wewiyakame,
meta xɨka 'awie hawaikɨ heitakeni.
Mɨkɨ tewi pɨtiwewiyaya,
'ayumieme Yawé mɨtixani'erie pɨtihɨkɨ”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
16 “'Axake'u'itɨarieni kemɨ'ane yupaapa yatɨni yumaama mɨkawa'enieni”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
17 “'Axake'u'itɨarieni kemɨ'ane yu'iwa kwieyatsie manuyeyeikani”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
18 “'Axake'u'itɨarieni kemɨ'ane mɨkaheuniere huyetana mɨti'itaiya”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
19 “'Axake'u'itɨarieni kemɨ'ane timaitɨtɨtɨ heitserie kememɨtehexeiya mɨwananaimaka 'ateewa kiekatari,
nutuite meta wiuraxi”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
20 “'Axake'u'itɨarieni kemɨ'ane yupaapa 'ɨyaya hamatɨa mɨkahuni,
mɨkɨtsɨ mɨyamɨtiuyuri yupaapa 'utaya 'axakaniuyurieni”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
21 “'Axake'u'itɨarieni kemɨ'ane tewatsiekame mukumayɨani”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
22 “'Axake'u'itɨarieni kemɨ'ane yutaru hamatɨa mukahuni,
yupaapa yatɨni yumaama niweya hamatɨa”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
23 “'Axake'u'itɨarieni kemɨ'ane yuwarɨkaɨ hamatɨa mɨkahuni”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
24 “'Axake'u'itɨarieni kemɨ'ane yuhepaɨ tewi mumieni 'awie”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
25 “'Axake'u'itɨarieni kemɨ'ane ti'iwatɨ xeime mɨmieni 'atsikatiyurienekame”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.
26 “'Axake'u'itɨarieni kemɨ'ane yamɨkatikayani heitseriemekɨ 'ikɨ 'inɨari niukiyaritsie”.
Yunaitɨ teɨteri mɨpaɨ meke'utiyuani:
“'Aixɨa pɨ'ane”.