GUINUWA
Yeisu ina vamoleyanayao idi guinuwa
Livala Aba Vaita
Buki ame Luke ina Buki aiyuwoina igini. Ina buki vakuumgoina moe Vala Dedevina Yeisu manuna. Moe bukiyana goi ivatulukoida kaga liliuna Yeisu iguinuwe nakae ina kámasa be ina taoyamna manudi. Ago ame bukiyana goi Luke latuwona siyana Tiyopilo ivatuluko Yeisu ina vamoleyanayao idi guinuwa manudi. Aiyuwoina ivatuluko Yeisu ina vamoleyanayao manakaedi Vala Dedevina sisanunui ina asa liliudi goi. Ego kidi idi guinuwayadi madabokidi moe Baloma Kimaasabaina ina togaga goi siguuinuwedi. Tauna buki ame sinaena tagite Yeisu nava ipaaisewa ina bodao yaidi go, ina paisewayana moe Balomaina goi.
Tétala maniyedi goi Luke toinina matana goi igitedi unana tauyana tuta maniyena Paulo ivaakitau. Tauna neta ikaaiyaka Paulo taiyao ivatétala kana, ‘Kai’ go, neta tauyana geya ivakitauyeta, e kana, ‘Kidi.’
Nakona Luke buki ame igini tala 60 ina 65 go, nauyayanaidi.
Luke ana masi tayamo gagaina ame nakae: Vala Dedevina moe geya kidi Diyuu aditava manudi, go sem Vala Dedevina moe Totuyoyowo manudi be nakae Diyuu manudi. Tauna Totuyoyowo itoboinedi Yaubada ina bodao sisiukoidi.
Aiyuwoina neta Guinuwa 1:8 takatuyaivi, bei tayagoi Luke ina nuwonúwana buki ame manuna. Ame tomwanayana goi Yeisu ina vamoleyanayao ilatuwokoidi Baloma Kimaasabaina bei sibabane. Balomayana togaga ivinidi, e bei Yeisu valena sitalavaite tomota yaidi. Moe Yerusalema goi be Yudiya ana dadava madabokina goi be Samériya ana dadava goi be nakae asa liliudi poyapoya ame ana madabokina goi. Nakonakae Yeisu ilatuwokoidi Guinuwa 1:8 nakae isowóduwo buki ame goi.
Tétala Luluna
1. Tétala ana kaba vatowo 1:1-14
2. Yudasa ana katumapu ana kinava 1:15-26
3. Yeisu ina tonumisayao Baloma Kimaasabaina siibabane tetelina 2:1-47
4. Pita ana yóita be ina kotu tetelidi 3:1–4:31
5. Ananiyasi be Sapira tetelidi: Tomoya ana totugugunayao adi kaba neneta 4:32–5:11
6. Yeisu ina vamoleyanayao adi yóita be adi talígava tetelidi 5:12-42
7. Stiveni tetelina 6:1–7:60
8. Pilipo tetelina 8:1-40
9. Saulo ina tugavila tetelina 9:1-31
10. Pita be Koniliasi tetelidi: Totuyoyowo itoboinedi adi yava sibabane 9:32–11:18
11. Tomoya ana totugugunayao idi gúguna tayamo Antiyoki goi isowóduwo 11:19-30
12. Pita ana yóita be Yaubada ina matakavata tetelidi 12:1-24
13. Tonumisa Antiyoki goi Saulo be Banabasi sivamoleyedi sina Vala Dedevina sitalavaite 12:25–14:28
14. Totuyoyowo adi lovina Yaubada ina Katukeda ana kabikáwana manuna 15:1-35
15. Paulo ilovina bego ina Tomoya ana totugugunayao idi gúguna tamo tamo ivadademneidi 15:36–16:5
16. Paulo be Sailasi Mesadoniya goi 16:6–17:15
17. Paulo be Sailasi Girisi goi Vala Dedevina sitalavaite 17:16–18:23
18. Paisewa Epeso goi 18:24–19:20
19. Paulo ilovina bei ina Yerusalema namlieta bei ina Roma 19:21-22
20. Da Epeso Paulo sivaakaleye tetelina 19:23-41
21. Paulo ina Yerusalema tetelina 20:1–21:17
22. Paulo Yerusalema goi siyoisi, e itaoya kotu goi 21:18–26:32
23. Paulo ina lokoina ina Roma tetelina 27:1–28:31