22
1 Baharo noari mare catichʉ yoari mare ñohre yʉhʉre anjo.
Tí ma noano co sitiri ma Cohamacʉ,
Cordero cʉ̃hʉ ti dujiropʉ tari ma jihre.
2 Ã yoa tí maca macari maha dacho macai bʉrʉahre tí ma.
Tí ma pʉ bʉhʉseheri dʉhtʉ cahai catichʉ yoaa yucʉ ducuhre.
Tí yucʉ sʉ̃ripe dicha tihre.
Cʉ̃ cʉhmare doce tahari dicha tihre.
à yoa tí yucʉ macaa pũri mehne noano co tiahca jipihtia yahpari macaina.
3 Tí macare ne ñaa marianohca.
Tí macai Cohamacʉ to dujiro jirohca.
Cordero to dujiro cʉ̃hʉ jirohca tói.
à jia jipihtina masa tói jiina tinare dahra cohtaina tina pano na tuhcua caha sʉ,
tinare wahche payoahca.
à jiro tói ñaa marianohca.
4 Tina Cohamacʉre ñʉ piti boca dujiahca.
à yoa ti wʉhdʉa pocai to wama wahãina jiahca.
5 Tópʉre ñami marianohca.
à jia sihãa pocare cahmasi tói jiina.
Sʉ̃ to buhriachʉ cʉ̃hʉre cahmasi.
Mari pʉhtoro Cohamacʉ to buhriaro jirohca.
à jia tí macai jiina pa sehe macaina bui pʉhtoa ã jirucuahca.
Jesucristo ahri yahpapʉ to tjua tahto mahanocã dʉhsara
6 Baharo anjo yʉhʉre õ sehe nihre:
—Jipihtia ahri ti yahuri cjiri potocã tjira.
à jia ti niriro seheta waharohca.
Mari pʉhtoro Cohamacʉ to yare yahu mʉhtainare masichʉ yoariro jira.
Tiro sehe mipʉre to yairo anjore warocahre tirore dahra cohtainare masichʉ yoaro taro.
Baharocã to dohse wahahtore masichʉ yoaro taro to yairo anjore warocahre —nihre anjo yʉhʉre.
7 Jesu sehe õ sehe nihre:
—Tʉhoga mʉsa.
Mahanocã dʉhsara yʉ tjua tahto.
Ahri tju macaa yahuare yʉhdʉrʉcaeraina wahcheina jiahca —nihre Jesu.
8 Yʉhʉ João ahri jipihtiare yʉ joa narire tʉhohi.
à yoa tíre ñʉhi.
à jicʉ yʉ tʉhori baharo,
yʉ ñʉri baharo yʉhʉre ñoriro anjo panoi na tuhcua caha sʉmahi.
Tirore ño payoi tai nimahi.
9 Yʉ ã yoachʉ ñʉno õ sehe nihre yʉhʉre:
—Tíre yoai tjiga.
Mʉ jiro seheta jiriro yʉhʉ cʉ̃hʉ Cohamacʉre dahra cohtarirota jija.
Mʉ coyea Cohamacʉ yare yahu mʉhtaina,
jipihtina ahri tju macaa dutiare yoaina cʉ̃hʉ ti jiro seheta yʉhʉ cʉ̃hʉ Cohamacʉre dahra cohtarirota jija.
à jicʉ Cohamacʉ panoi na tuhcua caha sʉ,
tiro sehere ño payoga —nihre anjo yʉhʉre.
10 Ã yoa õ sehe ni yahu namohre yʉhʉre:
—Ahri tjui baharo to dohse wahahtore yahura.
To ã wahahto mahanocã dʉhsara.
To ã mahanocã dʉhsachʉ ahri tjui yahurire nʉoi tjiga mʉhʉ.
11 Tí pja yʉ yahuri pjare ñaina sehe ã yoarucuwahnojaro ñaare.
Ñaputiina cʉ̃hʉ ñabiaro yoarucuwahnojaro.
Noaina sehe noano yoarucujaro.
à yoaga ñaa marieina ã ñaa marieina jirucujaro tí pjare —nihre anjo yʉhʉre.
12 Õ sehe nihre Jesu:
—Tʉhoga mʉsa.
Mahanocã dʉhsara yʉ tjua tahto.
Mʉsare yʉ yainare yʉ wahtore na tai tai nija.
à jicʉ noaare mʉsa yoari wapa mʉsare noano yoaihtja.
13 Yʉhʉ jipihtiare bajuamehneriro jija.
à yoa jipihtiare pihtichʉ yoahtiro jija tjoa.
14 ’Jipihtina wete mariea suhtire sãaina ti jiro seheta ti ñaa yoari buhirire cosaweina tí macapʉ sʉahca.
à sʉa,
tí maca macaa yucʉ catiare waa yucʉ dichare chʉahca.
à jia wahcheina jiahca tina.
15 Tí macapʉ sʉeraina sehe ahrina jira:
Ñabiaina,
yaya,
numia mehne ñano yoaina,
mʉa mehne ñano yoaa numia,
masare wajãina,
“Cohamacʉ jira”,
ti nia masʉrine ño payoina,
mahño ji coaina,
mahñoa payʉina cʉ̃hʉ jira tí macapʉ sʉeraina —nihre Jesu.
16 Ã yoa õ sehe ni yahu namohre Jesu:
—Yʉhʉ,
Jesu yʉ yairo anjore warocahi mʉsare yʉ yainare ahri tju macaare yahui tai.
Pʉhtoro Davi panamino ji turiariro jija yʉhʉ.
Yʉhʉ bohrea mʉja tachʉ mʉja taria noano si siteria ñahpichoca yoaro sehe jiriro jija —ni yahu namohre Jesu.
17 Espíritu Santo Jesure “Tjua taga”,
nina.
Jesu yaina to wamomaca dʉhtehticoro yoaro sehe jiina cʉ̃hʉ “Tjua taga”,
nina.
Jipihtina ti “Tjua taga”,
nirire tʉhoina cʉ̃hʉ “Tjua taga”,
nijaro Jesure.
Ñahma yapioina core tuaro ti cahmano seheta Cohamacʉ cahapʉ waha duana Jesure tuaro cahmaga.
Tiro catichʉ yoaa co yoaro sehe jira.
Tirore cahmainare wapa cahmano marieno ã jirucuchʉ yoarohca Cohamacʉ.
18 Yʉhʉ João,
jipihtina ahri tju macaare Cohamacʉ yare tʉhorinare mʉsare õ sehe ni cua pisaro mehne yahuihtja.
Ahri buhea mehne paye buhea mehne more suhu yahu namoina Cohamacʉre yʉhdʉrʉcaa nina.
Ti ã yʉhdʉrʉcachʉ ñʉno jipihtia ahri tjui to buhiri dahrehtore to yahuriro seheta cũnohca tina cʉ̃hʉre.
à jiro tó seheta tina cʉ̃hʉre buhiri dahrerohca.
19 Ã yoa ahri tju macaa yahuare yahu dʉhaina Cohamacʉre yʉhdʉrʉcaina jira.
Ti ã yʉhdʉrʉcachʉ ñʉno catichʉ yoaa yucʉ dichare tinare chʉ dutisi.
à jia ã jirucusi tina.
Tuhsʉ,
to ya macapʉ noari macapʉ waha dutisi.
Tí yucʉ,
tí maca cʉ̃hʉ ahri tjui ti yahuripʉ jira.
20 Jipihtia ahri tju macaare yahuriro õ sehe nina:
—Ã tjira.
Mahanocã dʉhsara yahpapʉ yʉ tjua tahto —nina tiro.
à tjia.
Sã pʉhtoro Jesu tjua tahga.
21 Mari pʉhtoro Jesu to cahĩa mehne jipihtina mʉsa noano jiga.