Mʉano, yahpa cʉ̃hʉre wahmaare cohtotarohca Cohamacʉ
21
1 Baharo mʉano,
ahri yahpa cʉ̃hʉre wahmaare to cohtotarire ñʉhi.
Mʉanopʉ ji mʉhtari,
yahpapʉ ji mʉhtari,
pjiri mapʉ ji mʉhtari cʉ̃hʉ pihtia wahahre.
Mariahre.
2 Ã yoa yʉhʉ João noari macare,
wahma macare Jerusalẽne ñʉhi.
Tí maca mʉanopʉ Cohamacʉ cahapʉ to duji tachʉ ñʉhi.
Wamomaca dʉhtehticorore noaa suhti mehne wahma sʉora wamomaca dʉhtehtirore wahchechʉ yoaro taro.
Tó seheta tí macare cahnoyure Cohamacʉ,
to yainare wahchechʉ yoaro taro.
3 Tíre yʉ ñʉri baharo pʉhtoro dujiropʉ to sañurucuro coa tachʉ tʉhohi:
—Ñʉga.
Mipʉre masa watoi jiro nina Cohamacʉ.
Tina mehne jirohca tiro.
à jia to yaina jiahca tina.
à yoa Cohamacʉ to basi tina mehne macariro jiro,
ti yairo Cohamacʉ jirohca.
4 Ã jiro ã wahcherucuchʉ yoarohca tiro tinare.
à jia pari turi cahyasi tina.
à jia ne pari turi yariasi tina.
Ne ñano yajeripohna tia,
yahco tia,
purĩa cʉ̃hʉ mariahca tinare.
Ahri jipihtia panopʉ macaa cjiri pihtia wahaahca —ni sañurucuro coa tahre.
5 Baharo pʉhtoro dujiropʉ dujiriro õ sehe nihre:
—Ñʉga.
Jipihtiare wahma cohtotachʉ yoaihca —nihre.
To ã niri baharo yʉhʉre õ sehe nihre tjoa:
—Ahri yʉ niare joa naga.
Yʉ nia potocã tjira.
à jiro yʉ niriro seheta ã waharohca.
à jicʉ yʉ niare joa naga —nihre yʉhʉre.
6 Baharo õ sehe nihre tjoa yʉhʉre:
—Tó puro tjica.
Yʉhʉ jipihtiare bajuamehneriro jija.
à yoa jipihtiare pihtichʉ yoahtiro jija tjoa.
Ñahma yapioina tuaro ti core cahmano seheta yʉ cahapʉ waha duaina Jesure cahmaahca.
à jia Jesure yʉhtiahca.
Tiro catichʉ yoaa co yoaro sehe jira.
Tirore cahmainare wapa cahmano marieno yʉhʉ mehne ã jirucuchʉ yoaihtja tinare.
7 Jipihtina yʉhʉre wacũ tua duhuerainare õ sehe yoaihtja:
Ti yairo Cohamacʉ jiihtja.
à jia tina sehe yʉ pohna jiahca.
8 Wiho mejeta cuia yʉ yare duhuina,
yʉhʉre cahmaeraina,
ñabiaare yoaina,
masare wajãina,
numia mehne ñano yoaina,
mʉa mehne ñano yoaa numia,
yaya,
“Cohamacʉ jira”,
ti nia masʉrine ño payoina,
jipihtina mahñoina pichacapʉ wahaahca.
Tói pjiri ma puro jiri pichaca pjiri pichaca azufre mehne jʉ̃no nina.
Tópʉ wahaina pari turi ti yariaro sehe wahaa nina —nihre yʉhʉre.
Wahma maca Jerusalẽne yahuha
9 Baharo cʉ̃iro anjo yʉ cahapʉ wihihre.
Tiro siete wahwari cjʉaina,
to buhiri dahre dutiro to cũina anjoa mehne macariro jihre.
à wihiro,
õ sehe nihre yʉhʉre:
—Ñʉi taga.
Cordero to wamomaca dʉhtericorore ñoihca mʉhʉre —nihre anjo yʉhʉre.
10 To ã nini baharo Espíritu Santo yʉhʉre Cohamacʉ ya macare ñohre.
Õ sehe bajuro ñohre yʉhʉre:
Mʉadʉ tʉ̃cʉ buipʉ yʉhʉre na mʉjahre.
Tópʉ Jerusalẽne Cohamacʉ ya macare noari macare ñohre yʉhʉre.
Cohamacʉ cahapʉ mʉanopʉ jiri maca duji taro nihre ahri yahpapʉ.
11 Cohamacʉ to si sitea mehne si siteri maca jihre tí maca.
Wapa tia tãa yoaro sehe si sitehre.
Diamante wama tia tãa yoaro sehe si sitehre.
à yoa vidro yoaro sehe noano co sitiri maca jihre tí maca.
12 Pjiri sahrĩno mʉari sahrĩno ti sahrĩ sãari maca jihre tí maca.
Doce sopacari tihre tí sahrĩno.
Tí sopacaripe cohtahre anjoa.
Tí maca macaa sopa pahmaripʉ Israe masa curuari doce curuaripe ti wama wahãhre.
13 Sʉ̃ mʉja taro sehe tí sahrĩno cjʉahre tia sopaca.
Norte sehe tia sopaca jihre.
Sur sehe tia sopaca jihre.
Sʉ̃ sãano sehe cʉ̃hʉre tia sopaca jihre.
Jipihtiro doce sopacari waro cjʉahre tí sahrĩno.
14 Tí sahrĩno doce tãa bui pisahre.
Tí tãape Cordero to cũrina doce to cũrina sã cãina wama wahãhre.
15 Ã yoa anjo yʉhʉre yahuriro quihõdʉ uru mehne ti yoadʉre cjʉahre.
Tí macare,
tí maca macaa sopacarire,
sahrĩno cʉ̃hʉre quihõno taro nihre.
16 Tí maca to yoaro purota sahre.
Mʉano cʉ̃hʉ tó purota mʉahre.
à yoa anjo to quihõdʉ mehne tí macare quihõhre.
Tí maca dos mil doscientos kilómetros yoari maca jihre.
Tó purota sari maca jihre.
Tó purota mʉari maca jihre.
17 Ã jiro tí maca macari sahrĩnore quihõhre anjo.
Sesenta y cinco metros mʉari sahrĩno jihre.
Masa mari quihõno seheta quihõno nihre tiro anjo.
18 Tí sahrĩno diamante wama tia tãa mehne to yoari sahrĩno jihre.
à yoa tí maca sehe uru mehne to yoari maca jihre.
Tí uru wete mariea jia vidro yoaro sehe noano co sitihre.
19 Tí sahrĩno docai jia tãare payʉ soro jia wapa tia tãa wahãhre.
Tí tãa sahrĩnoi pisaa tãa doce tãa jihre.
Ji mʉhtaria tãcare diamante wama tia tãa wahãhre.
To baharo jiria tãcare zafiro wama tia tãa wahãhre.
Pʉaria baharo jiria tãcare ágata wama tia tãa wahãhre.
Tiaria baharo jiria tãcare esmeralda wama tia tãa wahãhre.
20 Pititia poca baharo jiria tãcare ónice wama tia tãa wahãhre.
Cʉ̃ wamomaca pihtia poca baharo jiria tãcare rubí wama tia tãa wahãhre.
Seis poca baharo jiria tãcare crisólito wama tia tãa wahãhre.
Siete poca baharo jiria tãcare berilo wama tia tãa wahãhre.
Ocho poca baharo jiria tãcare topacio wama tia tãa wahãhre.
Nueve poca baharo jiria tãcare crisoprasa wama tia tãa wahãhre.
Diez poca baharo jiria tãcare jacinto wama tia tãa wahãhre.
Once poca baharo jiria tãcare amatista wama tia tãa wahã batoahre.
21 Ã yoa doce sopa pahmari doce perla mehne to yoaa pahmari jihre.
Tí pahmaripe cʉ̃ yapa perla yapa mehne to yoaa pahmari jihre.
à jiro tí maca macari maha uru mehne to yoari maha jihre.
Tí uru wete marieni uru jihre.
à jiro vidro yoaro sehe noano co sitiri maha jihre tí maha.
22 Tí macai Cohamacʉ wʉhʉre ñʉerahi.
Mariahre.
Tí macai jipihtiropʉ mari pʉhtorore Cohamacʉ tua yʉhdʉarirore,
Cordero cʉ̃hʉre ño payora masa.
à jiro tí maca jipihtiro Cohamacʉ wʉhʉ yoaro sehe jihre.
23 Tí macai Cohamacʉ to si sitea noano buhriahre.
Cordero cʉ̃hʉ sihãria yoaro sehe buhriahre.
à jia sʉ̃ dacho macariro cʉ̃hʉre ñami macariro cʉ̃hʉre tói ti buhriachʉ cahmaerare.
24 Ã yoa ahri yahpai ti buhria mehne jiahca jipihtiro macaina.
à jia jipihtia yahpari macaina pʉhtoa tí macapʉ noa yʉhdʉa ti cjʉaare na wihiahca.
25 Ã yoa dachore tí maca macaa sopacari pjõori sopacari jiahca.
Tópʉ ne ñami marianohca.
à jia ti sopacarire ne bihasi.
à susurucuahca.
26 Ã yoa jipihtia yahpari macaina noaare ti cjʉaare tí macapʉ naa wihiahca.
27 Ñaa sehere tí macapʉ ne naa wihisi.
Bʉo tichʉ yoaina,
ñaare yoaina cʉ̃hʉ tí macapʉ ne wahasi.
Mahñoina cʉ̃hʉ wahasi.
Cordero to joari tjui ti wama wahãina dihta tí macapʉ wahaahca.
Tí tju to yʉhdʉchʉ yoaina ti wamare to joa õri tju jira.
Tí tjui ti wama wahãina ã jirucuahca.