Babilonia wama tiri maca to cohãri maca jira
18
1 Baharo pairo anjo mʉanopʉ dujiarirore ñʉhi.
Tiro pʉhtoro waro jihre.
To si sitea jipihtiropʉ noano buhria sahsea wahahre.
2 To ã dujiari baharo õ sehe ni tuaro sañurucu yahuhre:
—Cohãri jihre.
Babilonia wama tiri maca pjiri maca macainare cohãri jihre.
Mipʉre watĩa,
payʉ ñaina pjacʉ bajueraina cʉ̃hʉ tí macai jia nina.
Ñaina baro wahiquina wʉina peri cʉ̃hʉ masa ti ñʉ yabiina tí macai jia nina.
3 Jipihtia yahpari macaina tí maca macainare ñainare ñʉ cũa,
tina cʉ̃hʉ ñano yoare.
à yoa yahpari macaina bui pʉhtoa tí maca macaina numia mehne ñano yoare.
Ticoro ã mʉa mehne ñano yoarucuricoro jiro wapa tiare nuchʉa tire.
Pjíro to ã nuchʉchʉ ahri yahpa macaina pache duaina pjíro wapatare —ni yahuhre anjo.
4 Baharo pari turi mʉanopʉ durucuro coa tahre.
Õ sehe nihre:
—Yʉ yaina ahricoro mʉa mehne ñano yoarucuricoro mehne jiena tjiga mʉsa.
Ticoro mehne mʉsa jichʉ mʉsa cʉ̃hʉre buhiri dahrerohca.
à jina to ñano yoaare ñʉ cũena tjiga.
5 To ñano yoari payʉ jinocahna.
To ñano yoarire pari tju mari duhu payo mʉochʉ tí tju sehe mʉanopʉ wahã sʉnocaboa.
à jia to ñano yoari payʉ jinocahna.
à jiro to ñano yoarire wacũna Cohamacʉ.
à wacũno ticorore buhiri dahre dutirohca.
6 Ticoro tuaro to buhiri dahrehticoro jijaro.
Masare to ñano yoachʉ yoariro seheta ticoro cʉ̃hʉre ñano yʉhdʉchʉ yoajaro.
Masare ã ñano to yoariro seheta tí yʉhdoro ticorore ñano buhiri dahrejaro.
7 Ticoro “Noaricoro jija”,
ni tʉhotumare.
à ni tʉhoturo,
wapa bʉjʉare pjíro cjʉare ticoro.
To wapa bʉjʉare pjíro to cjʉaro purota ticorore pjíro ñano yʉhdʉchʉ yoajaro.
Tó purota ticorore cahyachʉ yoajaro.
To basi õ sehe ni tʉhotumana ticoro:
“Õi pʉhtorocoro yoaro sehe jiricoro dujija.
Wapewahyoro jieraja.
à jico ne ñano yʉhdʉsi yʉhʉ”,
ni tʉhotumana ticoro.
8 Ã ni tʉhoturicoro to jichʉ wacũenoca ticorore buhiri dahrehto jirohca.
Ticoro dohati,
yariainare yahco tii,
jʉca barohca.
Tuhsʉ,
ticorore jʉ̃ borohca.
Mʉsa pʉhtoro Cohamacʉ ticorore buhiri dahre dutiriro tua yʉhdʉariro jira.
à jiro tó seheta yʉ niriro seheta ticorore buhiri dahre dutirohca —nino coa tahre mʉanopʉ.
9 Ã jia ticoro yoaro sehe jiri macare Babiloniare Cohamacʉ to buhiri dahreri baharo ahri yahpa macaina pʉhtoa tuaro cahya,
tiiahca.
Tí maca macaina mehne ñano yoaina jire.
à jia tí maca to jʉ̃chʉ ñʉa tiiahca tina.
10 To ã jʉ̃chʉ ñʉa tina pʉhtoa yoaropʉ ñʉrocarucuahca,
“Mari cʉ̃hʉre buhiri dahreri”,
nia.
Tói ñʉrocarucua õ sehe niahca:
—Cue,
pjacʉori maca jira,
Babilonia.
Sí maca pjiri maca tuari maca jimahre.
Wacũenoca sí macare buhiri dahrehre —niahca tina.
11 Jipihtiropʉ macaina pache duaina tí macare ñʉa tuaro cahya tiiahca.
Tí maca to pihtichʉ ñʉa,
ti pachere nuchʉina mariachʉ ñʉa cahyaahca tina.
à jia tiiahca.
12 Ti na tarire urure,
platare,
wapa bʉjʉa tãare,
perla wama tia poca cʉ̃hʉre nuchʉina mariahca.
à yoa paye ti na tari cjirire suhti noaa suhtire,
yahsaa suhti pʉhtoa ti sãa suhti yoaro sehe jia suhtire,
seda wama tia suhtire,
sohãa suhtire nuchʉina mariahca.
à yoa paye ti na tarire yucʉri me sitia yucʉrire nuchʉina mariahca.
à yoa paye ti na tarire marfil wama tiro mehne ti yoarire,
wapa bʉjʉa yucʉri mehne ti yoarire,
bronce wama tiri comaa mehne ti yoarire,
comaa mehne ti yoarire,
marmol wama tiro mehne ti yoarire nuchʉina ne mariahca.
13 Ã yoa paye ti na tarire canela wama tiare ti chʉare coachʉ yoaare,
paye ti chʉare coachʉ yoaare,
inciensore,
mirra wama tia me sitiare,
paye me sitiare nuchʉina mariahca.
à yoa paye ti na tarire vinore,
chʉa wajaa sere,
trigo pohcare noano ti sʉhaweri pohcare,
trigo yaparire,
wachʉare,
corderoare,
cawaloare,
tunua bʉso cawaloa ti wajaa bʉsore nuchʉina mariahca.
Dahra cohtainare nuchʉ tinare cjʉaina cʉ̃hʉ mariahca.
Masa ti jipachʉta tinare nuchʉina jimahre.
Mipʉre mariahca.
à jia cahyaahca pache duaina.
14 Ã jia õ sehe niahca tina tí maca macaina cjirire:
—Ade,
ñacaro wahajari.
Jipihtia mʉsa cahĩri cjiri pihtia wahahre.
à yoa jipihtia noaa mʉsa cjʉari cjiri pihtia wahahre.
à ti pihtia wahachʉ tíre pari turi bocasi mʉsa —niahca pache duaina.
15 Tina tí macare pachere duaa,
pjíro wapatamare.
à jia tina tí macare yoaropʉ ñʉrocarucuahca,
“Mari cʉ̃hʉre buhiri dahreri”,
nia.
à ñʉrocarucua tí macare tuaro cahya,
tiiahca.
16 Õ sehe niahca tí macare:
—Cue,
pjacʉoina jira sí maca pjiri maca noari maca macaina cjiri.
Sí maca numino yoaro seheta noaare cjʉahre.
Numino sehe noaa suhtire,
yahsaa suhti pʉhtoa ti sãa suhti yoaro sehe jia suhtire,
sohãa suhti cʉ̃hʉre sãahre.
à yoa uru,
wapa bʉjʉa tãa,
perla wama tia poca õa suhtire sãahre.
Tó seheta yoahre sí maca macaina.
17 Ã jia wacũenoca sí maca buti pihtia wahahre —niahca tí macare.
à yoa jipihtina dohoa bʉso mehne tiniina,
tí bʉso pʉa,
ti mʉa,
paina pjiri mapʉ dahra wapataina cʉ̃hʉ tí macare yoaropʉ ñʉrocarucuahca.
18 Tói ñʉrocarucua tí macare to jʉ̃chʉ ñʉa õ sehe ni sañurucuahca:
—Noaa macari sí maca yoaro sehe jia macari ne paye macari mariahna —ni sañurucuahca tina.
19 Ã cahyaina jia ti dapu poca bui dihtare orẽ payoahca.
à jia tuaro yahco tiia õ sehe niahca:
—Cue,
pjacʉoina jira sí maca macaina cjiri.
Noari maca jimare.
Jipihtina dohoa bʉso cjʉaina pjiri mapʉ tiniina sí maca macaa pache mehne noano wapatamahi mari.
à yoa dóihta sí maca macaa buti pihtia wahahre —niahca bʉso macaina.
20 Tí macare to cohãchʉ ñʉna wahchega mʉsa mʉano macaina.
Cohamacʉ yaina,
Jesu to cũrina,
to yare yahu mʉhtaina jipihtina mʉsa wahchega.
Tí maca macaina mʉsare ñano yʉhdʉchʉ yoare.
Ti ã yoari buhiri buhiri dahrehre Cohamacʉ.
à jina wahchega mʉsa.
21 Ã yoa tuariro anjo pjiria tãcare arẽni soro puro jiria tãcare na wahcõ,
pjiri mapʉ doca ñohre.
à doca ñono õ sehe nihre:
—Ahria tãca to bora ñojariro seheta pjiri maca Babilonia wama tiri maca tuaro boraro bisirohca.
To ã borari baharo tí macare pari turi ñʉsi masa.
22 Tí macare butia wahachʉ yoarohca.
à jia tí macai basaare mʉsa basarucuriro sehe ne coa tasi.
Arpa wama tiare mʉsa bʉapʉtẽrucuriro sehe,
flauta wama tia pocare,
corneta cʉ̃hʉre mʉsa putirucuriro sehe pari turi tí macai coa tasi.
à yoa tí maca mariachʉ pari turi tí macai dahraina dahrasi.
à yoa tãca mehne mʉsa soari cʉ̃hʉre tʉhomahnosi.
23 Ne tí maca to buhria coãriro sehe ne jisi.
à yoa wamomaca dʉhteina mʉsa bose nʉmʉre mʉsa dahreriro sehe pari turi ne coa tasi.
Tí maca macaina pache duaina nuchʉina mehne paina yʉhdoro cjʉahre mʉsa.
à jina yaya wijõ wijĩina yoaro sehe yoana jipihtiro macainare mahñohre mʉsa.
Mʉsa ã yoarire ñʉ cʉaa,
Cohamacʉ sehere cahmaerare masa —nihre tuariro anjo.
24 Tí maca macaina Cohamacʉ yare yahu mʉhtainare paina to yaina cʉ̃hʉre jipihtiro macainare wajãri jire.