Mahari tiacãre papera tiacãre na taha anjo
10
1 Baharo pairo tuariro anjo mʉanopʉ to duji tachʉ ñʉhi.
Me curua watoi tahre.
à yoa buhini soro to dapu bui pisahre.
To wʉhdʉa sʉ̃ dacho macariro yoaro sehe si sitehre.
To ñʉchʉa pichaca yoaro sehe bajuhre.
2 Ã yoa mahari tiacã papera tiacãre to pjãri tiacãre cjʉahre tiro.
To dahporo poto bʉhʉsehe macari dahporo mehne pjiri mápʉ tʉ cũhre.
To dahporo cõ bʉhʉsehe macari dahporo sehe macarocai tʉ cũhre.
3 Ã ducuro yaya ti sañurucuro seheta tiro tuaro sañurucuhre.
To ã sañurucuri baharo siete wʉpoa yahua coa tamahre.
4 Ti ã yahuchʉ tʉhocʉ joa dʉcamahi.
Yʉ ã joa dʉcapachʉta mʉanopʉ yʉhʉre õ sehe ni durucuro coa tahre:
—Siete wʉpoa ti nirire painare yahui tjiga.
à jicʉ tíre joa nai tjiga —nino coa tahre yʉhʉre.
5 To ã niri baharo pjiri mapʉ ducuriro,
macarocai ducuriro anjo to wamomaca poto bʉhʉsehe siõroca mʉohre mʉanopʉ.
6 Ã siõroca mʉono Cohamacʉ ã catirucuriro wama mehne wama payohre.
Tiro Cohamacʉ sehe jipihtiare mʉanore,
mʉano macaare,
ahri yahpare,
ahri yahpa macaare,
pjiri mare,
pjiri ma macaare yoariro jira.
à wama payoro õ sehe nihre anjo:
—Cohamacʉ mehne potocã nii nija.
Tó purota cohtanahca.
7 Seis anjoa cornetarire ti putiri baharo pairo anjo to putichʉ Cohamacʉ panopʉ “Õ sehe yoaihtja”,
to niriro seheta ã yoarohca.
Panopʉ masare tíre noano yahuera tiri jire.
Baharo tirore dahra cohtainare,
to yare yahu mʉhtaina sehere noano yahu pahñoa tiri jire tiro.
Tí to yahu cũrire mipʉre yoarohca tiro —nihre anjo.
8 To ã niri baharo mʉanopʉ yʉhʉre durucuro coa tariro pari turi durucuro coa tahre tjoa.
Õ sehe nino coa tahre yʉhʉre:
—Pjiri mápʉ ducuriro macarocai ducuriro siro anjo cahapʉ wahaga.
à wahacʉ papera tiacãre to cjʉari tiacãre naga —nino coa tahre yʉhʉre.
9 To ã nino coa tachʉ tʉhocʉ anjo cahapʉ wahahi.
Tirore papera tiacãre yʉ sinichʉ tʉhoro õ sehe ni yʉhtihre yʉhʉre:
—Naga.
à jicʉ ahri tia papera tiacãre chʉga.
Mʉ wahma chʉchʉ mi yoaro sehe noano bisirohca.
Mʉ pjaropʉ mʉ bʉrori baharo sʉẽa waharohca —nihre yʉhʉre.
10 To ã nichʉ tʉhocʉ tí tiacãre anjore yʉ nari baharo chʉhi.
Yʉ wahma chʉchʉ mi yoaro sehe bisihre.
Yʉ chʉ bʉrori baharo yʉ pjaropʉ sʉẽa wahahre.
11 Yʉ ã chʉri baharo õ sehe nihre yʉhʉre:
—Pari turi macari macaina,
yahpari macaina,
payʉ dʉseri durucuina,
tina bui pʉhtoa cʉ̃hʉ baharo ti dohse wahahtore,
Cohamacʉ tinare to dohse yoahto cʉ̃hʉre yahuyuga mʉhʉ —nihre yʉhʉre.