Seis papera ti wihtã ñahaare pahrẽ tuhsʉro parore pahrẽha Cordero
8
1 Seis papera ti wihtã ñahaare pahrẽ tuhsʉro parore pahrẽhre tjoa Cordero.
To ã pahrẽ tuhsʉchʉ cʉ̃ hora dacho macai tópʉ mʉanopʉ noano dihta marieaa wahahre.
2 To ã wahari baharo siete anjoare Cohamacʉ panoi ducuinare ñʉhi.
Tinare siete cornetarire wahre pairo.
3 Pairo anjo uru wahware inciensore posa tihti wahware cjʉariro altar cahapʉ sʉ,
ducuhre.
Tói to ducuchʉ payʉ inciensore tirore wahre,
jipihtina Cohamacʉ yaina tirore ti siniri mehne morehtire.
à jiro uru altarpʉ Cohamacʉ to dujiro panoi jiri altarpʉ tí inciensore jʉ̃ mʉohre Cohamacʉre.
4 Ã jia anjo to cjʉari wahwa macaa inciensore altarpʉ to poho siteri baharo tí incienso macaa me Cohamacʉ yaina tirore ti siniri mehne mʉjaa wahahre.
5 Ã wahari baharo altar macaa niti mehne tí wahwa wahpa wahachʉ,
yahpai poho cũnocahre.
To ã poho cũnocachʉta wʉpo pja,
soro sehe jiro bisi mʉa,
oroca site mʉa,
yahpa ñuhmi mʉahre.
Cornetarire yahuha João
6 Baharo siete anjoa cãina ti cornetarire putia taa nihre.
7 Cʉ̃iro anjo to yariare puti mʉhtahre.
To ã putichʉ co poca yʉsʉa poca pichaca mehne,
di mehne morea poca yahpapʉ bora sʉ cahahre.
Ti bora sʉ cahachʉta yahpa jʉ̃a wahahre.
Õ puro jʉ̃hre:
Ahri yahpa dacho maca sʉro caharoi jʉ̃a wahahre.
à jiro tó puro posata yucʉri cʉ̃hʉ jʉ̃a wahahre.
Tó puro posata tja cʉ̃hʉ jʉ̃a wahahre.
8 Anjo cʉ̃iro to ã puti mʉhtari baharo pairo anjo to yaria cornetare putihre tjoa.
To ã putichʉ pjidʉ tʉ̃cʉ yoaro sehe bajudʉ noano jʉ̃rucudʉ pjiri mapʉre waharoca ñojaa wahahre.
à jiro yahpa to jʉ̃riro puro tó purota pjiri ma di ma dojoa wahahre.
9 Ã jia pjiri ma macaina wahi dacho maca mahano sʉboro waroi yariaa wahahre.
Tópe bʉsota dohoa bʉso cʉ̃hʉ minia wahahre pjiri mapʉre.
10 Pʉaro anjoa ti putiri baharo pairo anjo cʉ̃hʉ to yaria cornetare putihre tjoa.
To ã putichʉ pjiria ñahpichohaca,
sihãria yoaro sehe siria yahpapʉ bora sʉ cahaa wahahre.
Ahri yahpa macaa mári dacho macabo cureroi tópe mári bui bora sʉ cahaa wahahre ñahpichohaca.
Tópe co wijaa copari bui cʉ̃hʉre bora sʉ cahaa wahahre.
11 Tópe márita sʉẽa mári wahahre.
To ã wahachʉ payʉ masa tí mári macaa core,
tí copari macaa co cʉ̃hʉre sihnimaa,
yariaa wahahre.
Tia ñahpichohaca “Sʉẽnia”,
wama tihre.
12 Tiaro anjoa ti putiri baharo pairo anjo cʉ̃hʉ to yaria cornetare putihre tjoa.
To ã putichʉ sʉ̃ dacho macariro,
ñami macariro cʉ̃hʉ dacho maca sʉboro waroi dojoa wahahre.
Ñahpichoha peri cʉ̃hʉ dacho maca sʉboro waroi jia poca tópe pocata dojoa wahahre.
Tópe poca mʉano macaa poca noano buhrierare.
Dachopʉ pititia horari waro sʉ̃ dacho macariro ne buhrierare.
Ñamine pititia horari waro sʉ̃ ñami macariro,
ñahpichoha poca cʉ̃hʉ ne buhrierare.
13 Baharo ñʉroca mʉohi tjoa.
Mʉanopʉ wʉrirore cjare ñʉhi.
à jicʉ to sañurucuchʉ tʉhohi.
Õ sehe nihre tiro:
—Ñabiara.
Ñabiara.
Tiaro anjoa mipʉ putierasiniina ti putiri baharo pinihtare ñabiaro waharohca.
To ã wahachʉ ahri yahpai jiina ñabiaro yʉhdʉahca —nihre tiro.