Papera tiare to nari tiare wihtã ñaharire pahrẽna Cordero
6
1 Baharo papera tiare to nari tiare Cordero wihtã ñaha mʉhtanore pahrẽhre.
To ã pahrẽchʉ ñʉhi.
To ã pahrẽri baharo cʉ̃iro soro bajuina mehne macariro,
“Ñʉna taga”,
nihre.
à nino wʉpo yoaro sehe bisihre tiro.
2 To ã niri baharo ñʉhi yʉhʉ.
Yehseriro cawalore ñʉhi.
Tiro bui pisariro bʉedʉre cjʉahre.
Tirore pʉhtoro pisari sorore wahre pairo sehe.
To ã wari baharo tiro sehe tirore ñʉ tuhtiinare yʉhdʉrʉcaro wahahre.
3 Baharo cʉ̃ wihtã ñahanore pahrẽ tuhsʉ Cordero pa wihtã ñahanore pahrẽhre tjoa.
To ã pahrẽri baharo pairo soro bajuina mehne macariro “Ñʉna taga”,
to nichʉ tʉhohi tjoa.
4 Ã jicʉ pairo cawalore sohãrirore ñʉhi tjoa.
Tiro bui pisarirore tuaare wahre pairo sehe.
Ahri yahpa macainare cahma wajã dutihtirore cũhre tirore.
à jia jipihtiro macaina cahma wajãahca ahri yahpapʉ.
à yoa pjiri pjĩ ñosari pjĩne wahre tirore.
5 Baharo pʉarore pahrẽ tuhsʉ Cordero parore pahrẽhre tjoa.
à jicʉ pʉaro ti durucuri baharo pairo soro bajuina mehne macariro “Ñʉna taga”,
to nichʉ tʉhohi.
To ã niri baharo ñiriro cawalore ñʉhi.
Tiro bui pisariro balanza quihõnore cjʉahre.
6 Tirore yʉ ñʉri baharo soro bajuina watoi õ sehe nino coa tahre:
—Cʉ̃ dacho dahrari wapa mehne trigore cʉ̃ kilota nuchʉahca masa.
Cʉ̃ dacho dahrari wapa mehne cebada wama tia yaparire tia kilota nuchʉahca masa.
(Trigo,
cebada cʉ̃hʉ pihtia wahaahca.
à jia tí wapa bʉjʉ niahca.)
Wiho mejeta chʉa dahrea sere,
vino cʉ̃hʉre dojochʉ yoaena tjiga —nino coa tahre.
7 Baharo tiarore pahrẽ tuhsʉ Cordero parore pahrẽhre tjoa.
To ã pahrẽri baharo pairo soro bajuina mehne macariro ji bato tiriro “Ñʉna taga”,
nihre tjoa.
8 To ã nichʉ tʉhocʉ wapoariro cawalore ñʉhi.
Tiro bui pisariro “Yariachʉ yoariro” wama tihre.
à yoa to baharo tariro “Yariaina ti jiro” wama tihre.
à jiro tinare tuaare wahre pairo sehe.
Ahri yahpapʉre cuarta parte masare wajã dutihre.
Cahma wajãa mehne,
jʉca baa mehne,
dohatia mehne,
wahiquina nʉcʉri macaina suaina mehne tópeina masare ti wajãhtore cũhre tinare.
9 Baharo pititiaro wihtã ñahaare pahrẽ tuhsʉ Cordero paro ñahanore pahrẽhre tjoa.
To ã pahrẽchʉ altar docai Jesu yaina ti wajãrina ti catiri yajeripohnarine ñʉhi.
Cohamacʉ yare ti yahuri buhiri,
“Jesu yaina jija”,
ti ni yahuri buhiri tinare wajãri jire.
10 Tina sañurucua õ sehe nihre Cohamacʉre:
—Mʉhʉ sã pʉhtoro,
ñaa marieriro,
mahñono marieno,
mʉ niriro seheta yoariro jira mʉhʉ.
¿Ahri yahpa macainare,
sãre wajãrinare dohse jichʉ buhiri dahreihcari mʉhʉ?
—ni sañurucuhre tina.
11 Ã jiro tinare yehsea suhti yoaa suhtire wahre.
Tinare ã waro õ sehe nihre tinare:
—Sosiniga.
Paina mʉsa coyea Jesu yaina mʉsa yoariro seheta mipʉ cʉ̃hʉre noaa buheare buhesinia nina.
Mʉsare ti wajãriro seheta tina cʉ̃hʉre ti wajã pahñohto dʉhsasinina.
à jina tinare jipihtinare ti wajãhto pano mahanocã sosiniga mʉsa —nihre tinare.
12 Baharo cinco wihtã ñahaare pahrẽ tuhsʉ Cordero paro wihtã ñahanore pahrẽhre tjoa.
Tóre to ã pahrẽchʉta tuaro yahpa ñuhmihre.
To ñuhmini baharo sʉ̃ dacho macariro ñiriro choro wahahre.
Ñiri suhtiro yoaro seheta ñiriro choro wahahre.
à yoa sʉ̃ ñami macariro di yoaro sehe sohãriro wahahre.
13 Ã yoa ñahpichoha poca yahpapʉ boraa wahahre.
Yucʉcʉ dicha yahsaare wihnono to wã bure bororo seheta ñahpichoha poca boraa wahahre.
14 Ti ã wahari baharo mʉano butia wahahre.
Papera tiare mari turẽchʉ to bajueraro seheta bajuerare mʉano.
à yoa jipihtia tʉ̃yucʉ cʉ̃hʉ nʉcopo cʉ̃hʉ pa sehepʉ sʉrʉcahre.
15 To ã wahachʉ ñʉa,
ahri yahpa macaina bui pʉhtoa coparipʉ tʉ̃yucʉ macaa tãa docapʉ cʉ̃hʉre duhtihre.
Paina pʉhtoa,
surara pʉhtoa,
pache pʉa,
tuaina,
jipihtina tinare dahra cohtaina,
dahra cohtaina jieraina cʉ̃hʉ tóihta duhtimahre.
16 Ã duhtia tʉ̃yucʉre,
tãa cʉ̃hʉre õ sehe nihre:
—Sã bui bora pjaga.
Sãre nʉoga.
Siro pʉhtorore to dujiroi dujirirore cui yʉhdʉaja.
Cordero suaro,
sãre ñano buhiri dahrerohca.
“Ã buhiri dahreri”,
nina nʉoga sãre.
17 Jipihtinare tuaro ti buhiri dahrehti dacho ji tuhsʉra.
à jia ti buhiri dahrehtore ne cʉ̃iro duhtiro bihoeraro,
cʉ̃no pjasi —nihre tina jipihtina.