3 San Juan
João Gayo wama tirirore “Noariro jira”, niha
1
1 Yʉhʉ bʉcʉro mʉhʉre Gayore potocã yʉ cahĩrirore ahri pũre joarocaja.
2 Yʉ cahĩriro,
Cohamacʉ mehne macariro mʉ jichʉ masija yʉhʉ.
Tiro mehne mʉ noano jiriro seheta mʉ noano yʉhdʉhti cjihtire,
mʉ pjacʉ dohatiro marieno mʉ jihti cjihtire Cohamacʉre sini payoja mʉhʉre.
3 Mahainacã Jesu yaina yʉ cahai wihia mʉ jia tiare yahuhre yʉhʉre.
“Cristo to cahmano seheta potocãta yoa namono nihre Gayo”,
ni yahuhre tina yʉhʉre.
Ti ã ni yahuchʉ tʉhocʉ tuaro wahchehi yʉhʉ.
4 Mʉsa Jesu yare yʉ buherina cjiri to cahmano seheta mʉsa yoachʉ tʉhocʉ tuaro wahcheja.
5 Yʉ cahĩriro,
Jesu yainare yoadohocʉ noano yoara mʉhʉ.
Mʉ ñʉ masieraina ti jipachʉta,
tinare yoadohocʉ noa yʉhdʉaro yoara mʉhʉ.
6 Tina panopʉ mʉ ñʉ masieraina sehe Jesu yainare õi cahmachuinare sãre õ sehe ni yahuhre:
“Gayo Jesu yainare noano cahĩna”,
ni yahuhre panopʉ mʉ ñʉ masieraina sehe.
Baharo mʉ ya macare ti yʉhdʉ wahcãchʉ ñʉcʉ tinare noano yoadohoga Cohamacʉ to wahchehto sehe.
7 Tina Jesu yare buhe tinia wahaa,
Cohamacʉre cahmaeraina ti yoadohochʉ cahmaerara.
8 Ã jina tinare Jesu yare buhe tiniinare yoadohojihna mari.
Tinare ã yoadohona nija potocã jiare ti yahuhti cjihtire.
Diotrefe to ñaa yoarire yahuha João
9 Tó macainare Jesu yainare mahanocã joarocamahi.
Yʉ ã joarocapachʉta Diotrefe to basi ti pʉhtoro yoaro sehe ji duaro,
yʉhʉre tʉho duaerayuhca.
10 Mʉsa cahai yʉ sʉri baharo to yoarire mʉsare yahu pahñoihtja.
Sãre ñano durucuyuhca tiro.
Mahñoa payʉriro jira tiro.
à yoa paye ñaa cʉ̃hʉre yoayuhca tiro.
Jesu yainare to yare buhe tiniinare ne tiro to wʉhʉre sãa ta dutierayuhca.
à yoa paina tó macaina Jesu yaina sehe buhe tiniinare ti sãa ta dutichʉ ñʉno tiro sehe “Buhe tiniinare sãa ta dutiena tjiga mʉsa ya wʉhʉsepʉre”,
ni yahusãyuhca tinare.
“Mʉsa ya wʉhʉsepʉ buhe tiniinare mʉsa sã ta dutiri buhiri mari Jesu yaina mari cahmachuri wʉhʉpʉre sãaena tjiga mʉsa sehe”,
niyuhca Diotrefe tó macainare Jesu yainare.
11 Yʉ cahĩriro ñainare ñʉ cũi tjiga.
Noano yoaina sehere ñʉ cũga.
Noaare yoaina Cohamacʉ yaina jira.
Ñaare yoaina Cohamacʉre masierara.
Demetrio noaa to yoarire yahuha João
12 Jipihtina noano durucura Demetrio sehere.
à yoa to yoarire ñʉa noano to yoariro jichʉ masina masa.
Sã cʉ̃hʉ tirore ãta ni yahuja.
Sã yahua sehere potocã jichʉ masina mʉsa.
Yahu batoaha João
13 Mʉhʉre payʉ yahu duamahi.
à yahu duapaihta tíre joaeraja.
14 Mahanocã baharota mʉhʉre ñʉ duaja.
à jina tópʉ mari basi sʉhʉdunahca.
15 Noano jiga mʉhʉ.
Mari mehne macaina õ macaina Jesu yaina cʉ̃hʉ mʉhʉre noa dutira.
Tó macaina mari mehne macaina jipihtina noajaro.