Cohamacʉ pohna ahri yahpa macaa ñaare yoa duaerara
5
1 Jipihtina Jesure “Cohamacʉ masare yʉhdʉchʉ yoa duti to warocariro Cristo jira” niina,
Cohamacʉ pohna jira.
Paina pʉcʉrore cahĩna,
to pohna cʉ̃hʉre cahĩja mari.
2 Tó seheta Cohamacʉre cahĩna,
to dutiare noano yoana to pohna cʉ̃hʉre mari cahĩna nija.
3 To dutiare noano yoana Cohamacʉre cahĩna nija.
Cohamacʉ to dutiare mari yoachʉ marine wapʉoerara.
Mari jipihtina Cohamacʉ pohna jina,
ahri yahpa macaa ñaare cahmaeraja mari.
à jia to dutiare mari yoachʉ wapʉoerara.
4 Cohamacʉre wacũ tuana ne ahri yahpa macaa ñaare cahmaeraja.
à jina tirore mari wacũ tuari baharo ñano yoa duaeraja.
5 Ñaare cahmaerana õ sehe niina jija mari:
“Jesu Cohamacʉ macʉno jira”,
niina jina ahri yahpa macaa ñaare cahmaeraina jija mari.
Cohamacʉ macʉnore yahuha João
6 Jesucristo ahri yahpapʉ to tachʉ tirore João co mehne to bautisarire masina,
crusapʉ to di cohãri cʉ̃hʉre masina,
Cohamacʉ macʉno to jiare masija mari.
To bautisari dihta Cohamacʉ macʉno to jiare marine masichʉ yoaerara.
To di cohãri cʉ̃hʉ marine tíre masichʉ yoara.
Espíritu Santo “Jesucristo Cohamacʉ macʉno jira”,
ni yahura marine.
Tiro potocã ni yahuriro jira.
7 Ã jia Jesu Cohamacʉ macʉno to jiare tiaro marine yahura:
8 To macʉno to jiare Espíritu Santo sehe marine yahura.
à yoa Jesure co mehne to bautisari cʉ̃hʉre masina,
Cohamacʉ macʉno to jiare masija mari.
à jina mari ya cjihtire to yariarire to di to cohãrire masina,
Cohamacʉ macʉno to jiare masija mari.
à jia tí sehe cʉ̃no potori marine masichʉ yoara Jesu Cohamacʉ macʉno to jiare.
9 Masa ti yahuare tʉhona “Potocã tjira”,
nija mari.
à niina jipanahta Cohamacʉ to macʉnore to yahuchʉ masa ti yahua yʉhdoro tiro sehere noano tʉhoro cahmana marine.
Cohamacʉ waro to jichʉ to macʉnore to yahuare tʉhoro cahmana marine.
10 Ã jia jipihtina Cohamacʉ macʉnore wacũ tuaina Jesure yahua buheare noano tʉhora.
“Potocã tjira”,
ni tʉhotura tina Jesure yahua buheare.
Cohamacʉ to macʉnore to yahuare tʉhoerariro “Cohamacʉ mahñoriro jira”,
niriro jira tiro.
11 Cohamacʉ marine jipihtia dachoripe to catia mehne ã jirucuchʉ yoarohca.
Cohamacʉ macʉno yaina mari jichʉ ñʉno ã jirucuchʉ yoarohca marine.
Ahri jira Cohamacʉ marine to yahua.
12 Cohamacʉ macʉno yaina jia to catia mehne ã jirucuahca.
Paina tirore cahmaeraina sehe to catia mehne ne ã jirucusi.
Yahu to joa batoa jira
13 Mʉsa Cohamacʉ macʉnore wacũ tuaina Cohamacʉ catia mehne ã jirucunahca.
Tíre mʉsa masihti cjihtire mʉsare yahu joai nija.
14 Cohamacʉ to cahmariro seheta mari tirore dohse jiare mari sinichʉ tiro marine noano tʉho nʉnʉnohca.
à mari sinina “Potocãta noano tʉhora tiro”,
ni masija mari.
15 Tirore mari sinichʉ,
tiro marine tʉhora.
To ã tʉhorire masina,
tirore mari sinino purota to wahtiro jichʉ cʉ̃hʉre masija mari.
16 Mʉsa coyeiro to ñaare yoachʉ ñʉna,
tí ñaa Cohamacʉ pichacapʉ to waha dutia ñaa jierachʉ,
tirore sini payobasaga Cohamacʉre.
à jiro Cohamacʉ tirore yoadohoro to catia mehne ã jirucuchʉ yoarohca tirore.
Cohamacʉ pichacapʉ to waha dutieraina dihtare sini payobasaga mʉsa.
Paye ñaa sehe Cohamacʉ pichacapʉ to waha dutia ñaa waro jira.
Cʉ̃iro tí ñaa warore to yoachʉ “Tirore sini payobasaga mʉsa”,
nieraja yʉhʉ.
17 Jipihtia ñaa yoaa ñaa warota jira,
Cohamacʉ to ñʉchʉ.
Ti ã jipachʉta paye ñaa Cohamacʉ pichacapʉ to waha dutia ñaa jierara.
18 Cohamacʉ macʉno Jesu sehe Cohamacʉ pohnare noano ñʉ wihbora.
To ã ñʉ wihbochʉ watĩno sehe Cohamacʉ pohnare ne ñano yoa masierara.
à jia Cohamacʉ pohna sehe ñaare ã yoarucuerara.
Ahrire mari masija.
19 Mari sehe Cohamacʉ yaina jija.
Watĩno sehe ahri yahpa macaina pʉhtoro jira.
Ahri cʉ̃hʉre mari masija.
20 Cohamacʉ macʉno ahri yahpapʉre taro marine noano masichʉ yoare tiro.
To ã yoachʉ potocãta Cohamacʉ waroreta mari noano masija.
Ahri cʉ̃hʉre mari masija.
Cohamacʉ macʉno Jesucristo yaina jija mari.
à jina potocãta Cohamacʉ waro mehne macaina jina nija.
Ahriro yʉ niriro potocãta Cohamacʉ waro jira.
à yoa ahriro to macʉno to catia mehne ã jirucuchʉ yoariro jira.
21 Yʉ pohna,
“Cohamacʉ jira”,
ti nia masʉrine ño payoena tjiga.