Mahñoare ti buhechʉ, Cohamacʉ yare ti buhechʉ cʉ̃hʉre noano ñʉ masi dutiha
4
1 Yʉ cahĩina,
paina “Cohamacʉ yairo Espíriture cjʉaja”,
niina ti jipachʉta ti buhea mahñoa jira.
Paina sehe Espíritu Santo warore cjʉaina ne mahñono marieno buhera tina.
Payʉ “Cohamacʉ yare yahu mʉhtaina jija”,
nipahta mahñoina jira mipʉre.
Jipihtiropʉ jira tina.
à jina paina mʉsare ti buhea sehe mahñoa buhea jichʉ ñʉ masiga mʉsa.
Cohamacʉ ya ti jichʉ cʉ̃hʉre ñʉ masiga mʉsa.
2 Cohamacʉ yairo Espíritu Santore cjʉainare mʉsa ñʉ masi duana,
õ sehe masinahca:
“Jesucristo ahri yahpapʉ mari yoaro sehe pjacʉ tiriro bajuari jire” ni,
buheina Cohamacʉ yairo Espíritu Santore cjʉaina jira tina.
à jina ã ni buheinare ñʉ masinahca mʉsa.
3 Paina sehe “Jesu ahri yahpapʉ mari yoaro sehe pjacʉ tiriro bajuerari jire” ni,
buheina Cohamacʉ yairo Espíritu Santore cjʉaeraina jira.
Ti ya tʉhotua Cristore ñʉ tuhtiriro to tʉhoturo seheta jira.
“Cristore ñʉ tuhtiriro tarohca”,
ti nirire tʉho tuhsʉre mʉsa.
à yoa to ya buhea ahri yahpapʉre wihi tuhsʉre.
4 Mʉsa sehe yʉ pohna,
Cohamacʉ yaina jira mʉsa.
à jina “Cohamacʉ yare yahu mʉhtaina jija sã” ni,
mahñoinare yʉhdʉrʉca tuhsʉre mʉsa.
Mʉsa mehne jiriro Espíritu Santo sehe tua yʉhdʉrʉcara.
à jiro ahri yahpa macaina yairo watĩno yʉhdoro tuara.
à jina mahñoinare yʉhdʉrʉcare mʉsa.
à jina ti buheare cahmaerare mʉsa.
5 Mahñoina sehe ahri yahpa macaina ñaina jira.
à jia tina ahri yahpa macaa ñaare ti buhechʉ ahri yahpa macaina ñaina sehe tinare noano tʉhora.
6 Mari sehe Cohamacʉ yaina jija.
à jia Cohamacʉre masiina marine noano tʉhora.
Paina sehe Cohamacʉ yaina jieraa,
marine ne tʉho duaerara.
Ti ã tʉho duaerachʉ ñʉna ti ya buhea Cohamacʉ ya buhea ti jierachʉ masinahca mari.
Paina sehe marine ti tʉhochʉ ti ya buhea noaa buhea ti jichʉ cʉ̃hʉre masija mari.
Cohamacʉ painare tuaro cahĩrucuriro jira
7 Yʉ cahĩina,
Cohamacʉ marine painare cahĩchʉ yoariro jira.
To ã yoariro jichʉ ñʉna mari mehne macainare cahĩjihna mari.
Masare noano cahĩina sehe Cohamacʉ pohna jira.
à jia tina Cohamacʉre noano masina.
8 Cohamacʉ jipihtinare tuaro cahĩrucuriro jira.
To ã cahĩrucuriro to jichʉ masare cahĩeraina sehe Cohamacʉre masierara.
9 Cohamacʉ marine to cahĩare mari masi duana,
õ sehe masinahca:
Cohamacʉ sehe to macʉnore cʉ̃irota jirirore marine yʉhdʉchʉ yoahtiro cjihtore ahri yahpapʉre warocari jire.
à warocaro marine to cahĩare marine masichʉ yoaro niri jire.
10 Cahĩa waro õ sehe jira:
Cohamacʉre mari cahĩri cjiri sehe potocã cahĩa waro jierara.
Marine Cohamacʉ to cahĩa sehe potocãta cahĩa waro jira.
à yoa to macʉnore mari ñaa buhirire cohãhtiro cjihtore warocaro marine tuaro cahĩna tiro.
11 Yʉ cahĩina,
Cohamacʉ ã tuaro marine to cahĩchʉ ñʉna mari cʉ̃hʉ mari mehne macainare cahĩjihna.
12 Masa sehe ne Cohamacʉre ñʉerare.
Tirore ñʉeraina mari jipachʉta mari mehne macainare mari cahĩchʉ,
Cohamacʉ sehe mari mehne ã jirucuro nina.
à jiro potocãta marine cahĩ namorucuchʉ yoara tiro.
13 Cohamacʉ sehe marine to yairo Espíritu Santore ware.
à jina Espíritu Santore cjʉana,
Cohamacʉ mehne mari noano jia tiare,
tiro sehe mari mehne to noano jia tia cʉ̃hʉre masija mari.
14 Ã yoa Cohamacʉ mari Pʉcʉ to macʉnore ahri yahpa macainare yʉhdʉchʉ yoahtiro cjihtore to warocarire sã ñʉi.
Tíre ñʉna painapʉre tíre yahuja sã.
15 Cohamacʉ mehne macariro õ sehe niriro jira:
“Jesu Cohamacʉ macʉno jira”,
niriro tiro pini Cohamacʉ mehne macariro jiro nina.
à yoa Cohamacʉ cʉ̃hʉ tiro mehne macariro jiro nina.
16 Ã yoa marine Cohamacʉ to cahĩare masija mari.
Cohamacʉ jipihtinare tuaro cahĩrucuriro jira.
à jiro cʉ̃iro masare cahĩrucuriro jiro,
Cohamacʉ mehne macariro jira.
à jiro Cohamacʉ cʉ̃hʉ tiro mehne macariro jira.
17 Ã jina mari noano cahĩ namorucuja Cohamacʉre,
paina cʉ̃hʉre,
buhiri dahreri dacho jichʉ mari cuiro marieno mari jihto cjihtore.
à jina cuisi mari ahri yahpai Cristo yoaro sehe jina.
18 Painare cahĩa mehne ne cuiro mariahna.
Cohamacʉ marine to cahĩare masina mari ñano wahahtore ne cuieraja.
Masa cuia tinare buhiri dahrehtore cuiina jira.
à jiro cuiriro sehe Cohamacʉ cahĩare masierariro jira.
19 Marine Cohamacʉ cahĩ mʉhtari jire.
à jina mari cʉ̃hʉ tirore cahĩja.
20 Cʉ̃iro “Cohamacʉre cahĩja”,
niriro jiparota pairore ñʉ tuhtiriro jiro,
mahñoriro jira tiro.
Tiro to ñʉrirore cahĩeraro,
Cohamacʉre cahĩ masierara tiro,
tirore ñʉeraro.
21 Ã jiro õi jira marine Cristo to dutia:
Cohamacʉre cahĩriro jicʉ mʉ cahai jiriro cʉ̃hʉre cahĩga.