Cohamacʉ yare potocã buherainare yahuha Pedro
2
1 Panopʉ mari coyea judio masa mehne macaina “Cohamacʉ yare yahu mʉhtaina jija”,
ni mahñoina jia tiri jire.
Ti yoaro seheta mipʉ cʉ̃hʉre mʉsa mehne macaina ã ni mahñoina jiahca.
Tina potocã ti buheboro seheta mahñoa sehere buheahca.
à buhea Cristo ya sehere dojomehneahca.
à yoa Cristo to yʉhdʉchʉ yoaborina jipahta tirore “Sã pʉhtoro jira”,
ni tʉhotuerara.
Tí jipihtiare ti ã yoari buhiri dóihta Cohamacʉ tinare tuaro buhiri dahrerohca.
2 Ã mahño ti buhechʉ tʉhoa tina ti ñaare goa pjariro seheta payʉ masa tinare ñʉ cũ ñano yoaahca.
Ti ã ñano yoachʉ ñʉa paina masa cʉ̃hʉ noaa buheare ñano quiti dahreahca.
3 Ã jia tina mahñoina niñerure wapa cahmaa,
mahñoa,
ti mʉ sʉro ti yahua buheare buheahca mʉsare.
Ti ã buheri buhiri Cohamacʉ tinare tuaro buhiri dahrerohca yʉhdʉro marieno.
Panopʉta ã yoainare buhiri dahre duti tuhsʉa tiri jire tiro.
4 Tó seheta panopʉta Cohamacʉ ñaina anjoa cʉ̃hʉre to buhiri dahrehtore cũ tuhsʉa tiri jire.
Tinare pichacapʉ nahitianopʉ peresu yoaa tiri jire.
à yoaro pihtiri dacho baharo tinare buhiri dahrerohca.
5 Tó seheta panopʉ macainare Cohamacʉre cahmaerainare tiro buhiri dahrea tiri jire.
à yoaro jipihtiro ahri yahpare miono,
jipihtina masa ñainare mio wajãa tiri jire.
To ã miohto pano Noe cjiro sehe tí pja macaina cjirire noaare yoa dutiro yahua tiri jimare.
To ã yoaro watoi Cohamacʉ ahri yahpare miono,
Noéne tiro mehne macaina cʉ̃hʉre yʉhdʉchʉ yoaa tiri jire.
Tina jipihtina to yʉhdʉchʉ yoarina ocho masa jia tiri jire.
6 Tó seheta Sodoma wama tiri maca macaina cjirire Gomorra wama tiri maca macaina cjiri cʉ̃hʉre Cohamacʉ buhiri dahrea tiri jire.
Tí macarine pichaca mehne noano jʉ̃ pahñonocaa tiri jire.
à yoaro baharopʉ jihtinare tirore cahmaerainare ñono nia tiri jire.
Ñainare to buhiri dahrehtore ñono nia tiri jire tinare.
7 Ã yoaro Lote wama tiriro cjiro sehere yʉhdʉchʉ yoaa tiri jire.
Lote sehe noariro jia tiri jire.
à jiriro jiro Sodoma macaina Cohamacʉ dutiare yʉhdʉrʉcaina ñabiaro ti yoachʉ ñʉno pomea waha,
ñano tʉhotua tiri jire.
8 Tiro noariro ñaina watoi jiro,
dachoripe ñabiaro ti yoachʉ ñʉno,
ñano ti durucuchʉ tʉhoro ñano yajeripohna tia tiri jire.
9 Tirore to yʉhdʉchʉ yoachʉ ñʉna ahri yʉ yahuhtire masija mari.
Cohamacʉ mari pʉhtoro tirore cahmainare ti ñano yʉhdʉchʉ ñʉno tinare yoadohorohca.
à jiro ñaina sehere peresu yoaro tinare cjʉara pihtiri dacho jichʉ to buhiri dahrehto sehe.
10 Ñaare tuaro goa pjainare Cohamacʉre yʉhdʉrʉcainare tina pinihtare ñano buhiri dahrerohca tiro.
Ahrina mʉsa mehne macaina mahño buheina ñaare yoaa,
ne cuierara.
à yoa bʉo tierara tina.
“Painare masi yʉhdʉrʉcaja”,
ni tʉhotuina jira tina.
à jiina jia mʉano macaina tuainare ne ño payoeraa,
cuiro marieno ñano ni bʉjʉpera tinare.
11 Anjoa sehe ne ti yoaro sehe yoaerara.
Tina sehe mahño buheina yʉhdoro tuaina jira.
à jipahta tina ne bʉjʉpea mehne mʉano macaina tuainare ñano yahusãerara Cohamacʉre,
“Painare yʉhdʉrʉcaja”,
nieraina jia.
12 Wiho mejeta ahrina mahño buheina sehe nʉcʉ macaina wahiquina yoaro sehe tʉho masieraina jira.
Nʉcʉpʉ boca sʉa ti wajãhtina yoaro sehe jira tina.
Ti cahmano seheta yoara tina.
à jia ti masierainare bʉjʉpe,
ñano ni durucu cohtara.
à yoaina jia wahiquina yariahtina ti jiro seheta tina cʉ̃hʉ to buhiri dahrehtina jirucuahca.
13 Tinare ti ñano yoari buhiri buhiri dahrerohca Cohamacʉ.
Tina ñaare goa pja yʉhdʉara.
à yoaa dachopʉ masa ti ñʉrocaroi to jipachʉta ñano yoarucura.
Mʉsa mehne bose nʉmʉ yoaa,
tí bose nʉmʉi ñaare yoa yʉhdʉara.
à jia mʉsa bose nʉmʉre ti wete dahrero seheta tinare mʉsa ñʉ cũchʉ tí ñaa pihara mʉsare.
14 Ã yoaa numiare ñʉa,
ñaha duara tina.
Tuhsʉ,
ñaare ã yoarucu duara.
Cohamacʉre wacũ tuaera cureinare ñaare yoa dutia,
tó sehe jiinare tinare ñʉ cũchʉ yoara.
à yoa ti sahsero paye barore,
niñeru cʉ̃hʉre mahño ma mihniina jira.
Tina Cohamacʉ to buhiri dahrehtina jira.
15 Tina Cohamacʉ yare buheraa,
soro jia buhea sehere buhera.
à yoaa Balãa yoaro sehe yoaa nina.
Balãa,
Beor macʉno jia tiri jire.
Tiro sehe panopʉ to ñaa yoari mehne niñerure wapata duaa tiri jimare.
16 To ã yoachʉ ñʉno Cohamacʉ tuhtia tiri jire tirore.
To burro durucueraricoro jiparota masʉno yoaro sehe to pʉrore durucu tuhtia tiri jire.
To ã tuhtichʉ tʉhoro Balãa tuaro to ñaare yoa duamarire duhunocaa tiri jire.
Tʉho masierariro to yoa duamarire duhunocaa tiri jire.
17 Ahrina mahñoina mári pohtaripʉ co marieno yoaro sehe jira.
Co mariea mári pohtari ti yaba cjihti jieraro seheta tina mahñoina ne yaba cjihti jierara.
à yoa me curuari mʉano macaa core waboa curuarire wihnono to wãrocachʉ ti curuari yaba cjihti jierara.
à ti yaba cjihti jieraro seheta,
tina mahñoina cʉ̃hʉ masare yoadohoera,
ne yaba cjihti jierara.
à jiro nahitiano warore yoa tuhsʉa tiri jire Cohamacʉ tópʉ tinare buhiri dahrero taro.
18 Tina mahñoina ti durucua yaba cjihti jierara.
Masiina yoaro sehe masare ã buhemacanocahna.
Õ sehe ni buhera tina:
“Mari cahmano seheta mari yoachʉ noa nina”,
ni buhemana tina.
Ti ã ni buhechʉ masa tʉhoa ñaare goa pjaa,
ti ya buheare cahmana.
Paina masa Cohamacʉre potocãta wahma cahma dʉcaina mahanocãta wahara ti ñaare ti duhuri baharo,
quihõno yoaeraina mehne macaina ti jiri baharo.
Tinare mahñoina ti buhechʉ tʉhoa ñaare cahmana tjoa Cohamacʉ yaina jiborina jipahta.
19 Tinare õ sehe ni buhera mahñoina:
“Mari cahmano seheta mari yoachʉ noa nina”,
ni buhemana tina.
Ti ã ni buhepachʉta ti niriro sehe wahaerara tinare.
Ñaare duhu duaeraa,
tíre duhu masieraputiara.
Ti ã duhu masierachʉ,
tí ñaa ti pʉhtoro yoaro sehe jira.
20 Mari pʉhtoro Jesucristore marine yʉhdʉchʉ yoarirore wahma cahma dʉcaina sehe ahri yahpa macaa ñaare duhunocamare.
Ti ã duhuri baharo pari turi ñaare yoaa tjoa,
ñabiaro waro tjuara tina.
Cristore ti masihto pano ti ji mʉhtariro yʉhdoro ñabiaro tjuara jʉna,
pari turi ñaare yoaa tjoa.
21 Ã ñabiaro tjuaa,
Cohamacʉ tinare to dutiare yʉhdʉrʉcaa,
noaa buhea sehere ti ne masi mʉhtaerachʉ noabiaboa tinare.
22 Ã jia pari turi ñaare yoaa,
masape ti ni durucurucuriro seheta yoaa nina tina.
Õ sehe ni durucura masa:
“Diero toa tuhsʉ pari turi to toa cũri cjirire chʉra.
à yoa yesere ti cosari baharo pari turi tiro ñari sahbai cuhsʉra tjoa.
(Tó seheta yoara noaa buheare cahmamarina cʉ̃hʉ pari turi ñaare cahmaa tjoa)”,
ni durucura masa.