Wamomaca dʉhteinare õ sehe yoaro cahmana tinare
3
1 Ã yoa dahra cohtainare yʉ dutiriro seheta mʉsa namosãnumiare dutiihtja.
Mʉsa manʉsʉmare yʉhdʉrʉcaena tjiga tina Cohamacʉ ya buheare ti cahmahto sehe.
Cãina tina to ya buheare cahmaeraina jia,
tinare mʉsa yʉhdʉrʉcaerachʉ ñʉa Cohamacʉ ya buheare cahmaboca tina.
Tí buheare mʉsa yahuerapachʉta to yare cahmaboca tina.
2 Ãta cahmaboca tina mʉsa noano yoaare,
mʉsa ño payoa cʉ̃hʉre ñʉa.
3 Mʉsa numia,
carea numia yoaro sehe yoaena tjiga.
à yoa mʉsa pjoarire wʉhawe sapahtaa numia,
uru darire bʉsaa numia,
wapa ti yʉhdʉa suhtire sãa numia jiena tjiga mʉsa,
mʉsare “Goa pjachʉ yoari”,
nina.
4 Ã yoa mʉsa cua pisaro mehne painare niji siaroca mehne yoaa numia jina,
noano sʉhʉdua numia jina,
ahrireta ñʉ ji coachʉ yoaga.
Ahrire mʉsa yoachʉ wiho waro jierara,
Cohamacʉ to ñʉchʉ.
5 Õ seheta yoaa tiri jire panopʉ macaa numia Cohamacʉ ya numia cjiri.
Tí numia Cohamacʉre wacũ tuaa numia jia,
ti manʉsʉmare yʉhdʉrʉcaera tiri jire.
6 Tó seheta Sara cjiro to manʉno Abrahã cjirore noano mehne yʉhtia tiri jire.
à jiro tirore “Pʉhtoro”,
ni pisua tiri jire.
à jina mʉsa noano yoaa numia jina,
cuiro mariea numia jina,
Sara cjiro pohna numia yoaro sehe jira mʉsa cʉ̃hʉ.
7 To noano yoariro seheta mʉsa cʉ̃hʉ mʉa mʉsa namosãnumiare noano yoaga.
Tí numia mari mʉa yoaro sehe tua numia jierara.
à jina ño payoa mehne noano yoaga tí numiare.
Cohamacʉ jipihtia dachoripe tiro mehne mari jihtore marine to wariro seheta tí numia cʉ̃hʉre warohca tiro.
Ti ã jiina jichʉ tí numiare noano yoaga.
Cohamacʉre mʉsa siniare mʉsa dojomehnerahto sehe tí numiare noano yoaga.
Noano ti yoapachʉta paina tinare ti ñano yoaare yahuha Pedro
8 Ahri mehne yahu batoihtja:
Mʉsa jipihtina cʉ̃no mehne noano mehne jiga.
à jina mʉsa mehne macainare noano pja ñʉina jiga.
Mʉsa coyea Jesu yainare pʉ bʉhʉseheri cahma cahĩga.
à jina noano yoaga tinare.
à yoa “Wiho jiina jija”,
ni tʉhotuga.
9 Paina mʉsare ñano ti yoachʉ tinare ñano yoa cahmaena tjiga.
Mʉsare ti tuhtichʉ tinare tuhti cahmaena tjiga.
Mʉsare ti ã yoapachʉta noano yoaga tinare.
à yoana “Noano jiga”,
niga tinare.
Tíre yoahtina cjihtireta to yaina cũre mʉsare Cohamacʉ sehe mʉsare noano yoaro taro.
10 Ãta nina Cohamacʉ yare ti joari pũi:
“Mʉsa noano wahchea mehne ji duana ne ñano ni durucuena tjiga.
Painare mahñoena tjiga.
11 Ñaa yoaare duhunocahga.
Noaa sehere yoaga.
Cahma mʉsa basi ñʉ tuhtiro marieno jiga.
Mʉsa noano jihtore tuaro cahmaga.
12 Cohamacʉ cahmaare yoaina mari pʉhtoro ã ñʉ wihborucuro nina.
Tirore ti siniare ã tʉhorucuro nina.
Ñano yoaina sehere tiro ñʉ tuhtira”,
ni joaa tiri jire.
13 Noare mʉsa tuaro yoachʉ paina sehe mʉsare ñano yʉhdʉchʉ yoa dua bihosi tina.
14 Noano mʉsa yoapachʉta mʉsare ñano yʉhdʉchʉ ti yoachʉ ñʉno Cohamacʉ mʉsare noano yoarohca.
à jina painare cuiena tjiga.
à yoa pjíro tʉhotuena tjiga.
15 Cristore “Sã pʉhtoro jira” ni,
mʉsa tʉhotuna,
ño payoga tirore.
à yoana Cristore mʉsa wacũ tuaare,
Cohamacʉ mehne mʉsa jihtore paina ti sinituhto pano tinare mʉsa yʉhtihtore noano masiyuga.
à yʉhtina niji siaro mehne,
noano ño payoa mehne yahuga tinare.
16 Noaina jiga.
à jina “Ñaare yoaja”,
ni tʉhotusi mʉsa.
à jia Cristo yare noano yoaina mʉsa jichʉ paina mʉsare ñaa quiti dahrea,
bʉoro wahaahca tina.
17 Ñaare mʉsa yoari buhiri mʉsa ñano yʉhdʉchʉ noaerara.
à yoa Cohamacʉ cahmachʉ noaare mʉsa yoapachʉta mʉsa ñano yʉhdʉchʉ noa nina tí pinihta.
18 Õ seheta yʉhdʉre Cristo.
Cʉ̃ tahata jipihtina ti ñaa buhirire yariare tiro.
Noariro jire.
à jiro ñaina mari jichʉ mari yaro jiborirore ñano yʉhdʉre tiro.
Ñano yʉhdʉre tiro marine Cohamacʉ yaina wahachʉ yoaro taro.
To pjacʉ yariaa wahare.
à yariaparota to catia mehne masari jire.
19 Ã masariro jiro tiro ti buhiri dahrehtore cohtaina cjiri presu jiina cjiri yariarina cjirire buheri jire.
20 Tina cohtaina panopʉ Cohamacʉre yʉhtieraina cjiri jia tiri jire.
Tí pjapʉre Noé cjiro to jiri pjapʉre,
pjiria dohoriare dohoro nia tiri jire.
Tiare to dohoro watoi Cohamacʉre yʉhtieraina cjirire ti yʉhtichʉ cahmano yoari pja cohtaa tiri jimare Cohamacʉ.
à yoa mahainacã ochota dia mininore yʉhdʉa tiri jire.
21 Minia ti yʉhdʉriro seheta bautisaa mehne yʉhdʉra masa.
Mari pjacʉre mari wete tju cosaro sehe jierara bautisaa.
Soro sehe jira bautisaa.
“Ñaa buhiri marieina jija”,
mari ni masihto cjihtore Cohamacʉre “Mʉhʉre wacũ tuaja”,
mari ni yahua jira ahri bautisaa.
à yoa Jesucristo to masa mʉjari mehne yʉhdʉja mari.
22 Tiro Jesucristo mʉanopʉ wahari jire Cohamacʉ poto bʉhʉsehei jiro,
tiro mehne dutiro taro.
à jiro tiro anjoa bui,
mʉano macaina pʉhtoa bui,
dutiina bui ti pʉhtoro jira.