Mari dʉseroi wijaare yahuha
3
1 Cohamacʉ yare masare buheina to yare ti noano yoaerachʉ ñʉno tina pinihtare masare buheraina yʉhdoro Cohamacʉ buhiri dahrerohca.
Tíre masina mʉsa,
yʉ coyea.
à jina mʉsa mehne macaina masare buheina payʉ jiena tjiga.
2 Jipihtina payʉ tahari mari ñaare yoaja.
Cʉ̃iro ñaare durucuerariro Cohamacʉ cahmaare noano yoariro jira tiro.
à jiro paye ñaa cʉ̃hʉre yoaerara.
3 Õ sehe jira ahri mari piti dahre buhechʉ:
Cawalo to dʉseroi comaa pjĩ to ñahmanore ña dihohti pjĩne mari cũja,
tirore mari majarerʉcachʉ yoana tana.
à yoana tí pjĩ comaa pjĩ mehne tirore to wahahtoi mari waja majarerʉca dapoja.
Tí pjĩca mahari pjĩca to jipachʉta tí pjĩ mehne tirore wahachʉ yoaja mari.
(Õ seheta mari dʉsero mahanocã to jipachʉta tí dʉsero mehne pjíro ñano yoaja mari.)
4 Dohoria quiti mehne piti dahre yahu namoihtja mʉsare:
Bʉsoca pjiria to jipachʉta tiare wihnono to tuaro wãrocapachʉta oturiro sehe mahari pjĩca mehne tia nohoi to waha duaroi oturocara.
5 Tó seheta jira mari dʉseroi wijaa.
Mari dʉsero mahanocã to jipachʉta tí dʉsero mehne pjíro yoaja mari.
Mahari pichacacã pjíro to jʉ̃ wahcãno seheta mari dʉsero mehne pjíro ñaare yoa masija.
6 Ã jiro mari dʉsero pichaca yoaro sehe jira.
Mari dʉseroi wijaa jipihtia ñaare yoachʉ yoara marine.
Pichaca to jʉ̃ dʉcaro seheta mari dʉseroi wijaa mehne mari noano jiborirore ñabiaro yoaja mari.
Ñaare durucuna watĩno to dutiro seheta mari yoana nija.
7 Jipihtinare nʉcʉ macainare wahiquinare,
minichahcare,
chihchõ wahcãinare,
wahire mari masa sitichʉ yoa masija.
Mari payʉ tina barore masa sitichʉ yoa tuhsʉja.
à jia tina noano tʉho masina.
8 Tinare mari yʉhtichʉ yoapachʉta mari dʉsero sehe ñaare durucuro ne tjuaeraputiara.
à jiro nuina ti niji siariro seheta mari dʉsero sehe ne niji siaeraputiara.
Mari dʉseroi wijaa ñabiaa jira.
à jiro ñima painare to wajãno seheta marine paina cʉ̃hʉre ñabiaro wahachʉ yoara mari dʉseroi wijaa.
9 Mari dʉsero mehne Cohamacʉ mari pʉhtoro mehne mari noano durucuja.
à durucupanahta masa Cohamacʉ yoaro sehe jiinare to bajuamehnerina ti jipachʉta tinare ñabiaro ni durucuja mari.
10 Cʉ̃ dʉseroihta noaa durucua cʉ̃hʉ,
ñaa durucua cʉ̃hʉ wijara.
Yʉ coyea,
ã ni durucueraro cahmana.
11 Máca pohtai mʉ wiori copai noaa co,
ñaa co cʉ̃hʉ ne wijaerara.
12 Yʉ coyea,
higueracʉ olivo pocare dicha tierara.
Tuhsʉ,
secʉ higuera pocare dicha tierara.
à yoa máca pohtai mʉ wiori copai moa tia co to wijaachʉ moa mariea co wijaaerara.
(Tó seheta mari dʉseroi noaa durucua,
ñaa durucua mehne wijaachʉ yoaeraro cahmana.
à ni durucuaeraro cahmana.)
Noano masia waro õ sehe jira
13 Cãina mʉsa mehne macaina noano masiina jira.
Noano masiina mʉsa jia tiare õ sehe yoa ñonahca mʉsa.
“Paina yʉhdoro noano masija sã”,
niena tjiga.
à nienata noaare yoaga mʉsa.
à noaare yoana potocãta noano masiina jira mʉsa.
14 Wiho mejeta pairo paye barore to cjʉachʉ ñʉna tíre tuaro cahmaina jina,
paina mehne suarucuina jina,
painare yʉhdʉrʉca duaina jina,
“Noano masiina jija sã”,
niena tjiga mʉsa.
Mʉsa ã niina jina mahñoina jira mʉsa.
15 Ã yoaina ti tʉhotua ne Cohamacʉ ya tʉhotua jierara.
Ti tʉhotua Cohamacʉre yʉhdʉrʉcaina ti ñano tʉhotua jira.
Tí tʉhotua sehe watĩno ya jira.
16 Masa ti cjʉaare tuaro cahmaina,
painare yʉhdʉrʉca duaina ã cahma sayorucura.
à yoaina jia jipihtia ñaare yoarucura.
17 Paina sehe Cohamacʉ yare noano masiina sehe tina pinihta ã yoamacanocaa nierara.
à yoa tina ne cahma sayoerara.
à jia masa noaina,
painare noano yʉhtiina,
pja ñʉina,
masare yoadohoina,
masare cʉ̃no potori yoaina jira tina.
Tíre yoaa,
mahñono marieno yoara tina.
18 Ã yoana cahmachea marieno jina,
painare “Cahmachena tjiga”,
mari ni yahuna,
noaina wahachʉ yoana nija mari masare.