Santiago
Santiago Israe masare macari waharinare joarocaha
1
1 Yʉhʉ,
Santiago ahri pũi mʉsare noa duti joarocai nija.
Cohamacʉre,
mari pʉhtoro Jesucristo cʉ̃hʉre dahra cohtariro tjija yʉhʉ.
à jicʉ Israe masa ya curuari macainare doce curuari macainare Jesu yainare macari waharinare yʉ coyea mʉsare joarocai nija.
Cohamacʉ sehe noano masichʉ yoara
2 Yʉ coyea,
payʉ jiahca mʉsa ñano yʉhdʉhti.
à ñano yʉhdʉna noano wahchea mehne tʉhotuga.
3 Ã ñano yʉhdʉna,
potocãta Jesure mʉsa wacũ tuaare ñona ninahca mʉsa.
à jina ñano yʉhdʉpanahta Jesure mʉsa noano wacũ tuaina jina,
tirore wacũ tua namoina wahanahca.
à wahana mʉsa ñano yʉhdʉare cʉ̃no pjanahca.
4 Ã yoana duhuro marieno ã cʉ̃no pjarucuina jiga mʉsa,
tʉho masiina,
Cohamacʉ cahmaare noano masiina mʉsa jihto sehe.
à jina dʉhsaro marieno to yare yoarucuina jinahca mʉsa.
5 Cohamacʉ dʉhsaro marieno jipihtinare wara.
à waro tirore siniinare soro nino marieno wara tiro.
To ã jiriro jichʉ masina,
mʉsa masihti dʉhsachʉ tʉhotuna,
tirore siniga.
Mʉsa ã sinichʉ mʉsare masi namochʉ yoarohca tiro.
6 Ã sinina Cohamacʉre noano wacũ tuatjiãhna siniga mʉsa.
“Sã sinichʉ Cohamacʉ waeraboca sãre”,
ni tʉhotuena tjiga.
Tó sehe ni tʉhotuina pjiri ma macaa pahcõri yoaro sehe jira.
Pahcõri ti sʉroca cohtotaro seheta tina cʉ̃hʉ ti wacũapʉre sʉroca cohtotara.
Cʉ̃no potori yoaerara tina.
à jia Cohamacʉre wacũ tuaerara.
7 Tó sehe ni tʉhotuinare ti sinipachʉta ne mahanocã ti siniare tinare wasi mari pʉhtoro Cohamacʉ.
8 Michare ahrire cahmariro jiparota ñamichacapʉre soro tʉhotura tjoa.
à yoarirore tó wahaerara.
9 Jesu yainare wiho jiinare Cohamacʉ sehe pʉhtoa sõnohca.
To ã yoahtina jia wahchejaro tina.
10 Ã jia Jesu yaina pache pʉa jia ti ya pache pihtihtore masia wahchejaro.
Tí pache wiho warota jira,
Cohamacʉ to ñʉchʉ.
Cohori ti dói baa boraa waharo seheta tí pache pihtia wahaahca.
à jia tina cʉ̃hʉ wahchejaro.
11 Sʉ̃ mʉja taro to tuaro sichʉ tja sehe ñaia wahara.
à yoa cohori cʉ̃hʉ ñai boraa waha,
noaa cohori ti jia cjiri pihtia wahara.
Ãta waharohca pache pʉare ti pachere ti na cahmachuno watoi.
Tina ti pache mehneta butia wahaahca.
Ñano yoa dutiare yoaerariro wahcheriro jira
12 Ñano yʉhdʉriro cʉ̃no pjaro,
ñano yoa dutiare yoaeraro wahcheriro jirohca.
To ã cʉ̃no pjachʉ,
to ñaare yoaerachʉ jipihtia dachoripe mʉano macaa catiare tirore warohca Cohamacʉ.
“Tí catiare waihca”,
ni cũa tiri jire Cohamacʉ jipihtina tirore cahĩinare.
13 Mʉsare ti ñano yoa dutichʉ “Cohamacʉ yʉhʉre ñano yoa dutiro nina”,
ni tʉhotuena tjiga.
Ñano yoaare tʉhotuerariro jira Cohamacʉ.
à jiro tiro sehe masare ñano yoa dutiriro jierara.
14 Masa tuaro ñaare ti goa pjaata títa tinare ñano yoachʉ yoara.
15 Ã jia ñaare goa pjara masa.
à goa pjaa,
tí sehere tʉhotura.
à tʉhotua,
tí ñaare yoarucura tina.
Ti ã yoarucuri buhiri Cohamacʉ tinare pichacapʉ cohãnohca.
16 Ã jina yʉ coyea yʉ cahĩina,
“Cohamacʉ yʉhʉre to dutichʉ ñano yoahi”,
ni tʉhotuena tjiga.
Potocã jierara tí.
17 Cohamacʉ mʉano macariro marine noaa dihtare wara.
Tiro pinihta sʉ̃ dacho macarirore,
ñami macarirore,
ñahpichoha poca cʉ̃hʉre bajuamehneriro jiro,
tiro sehe to jiriro seheta ã jirucunocahna.
Ne cohtotaerara.
18 To cahmariro seheta tiro noaa buhea mehne marine to pohna wahachʉ yoare.
à yoare tiro to pohna ji mʉhtaina mari jihto sehe.
Potocãta Cohamacʉre ño payoa õ sehe jira
19 Yʉ cahĩina,
yʉ coyea ahrire noano tʉhoga mʉsa.
Cohamacʉ yare noano tʉhoga mʉsa.
à tʉhona,
noano tʉhoturo marieno durucuena tjiga.
à yoa suaena tjiga.
20 Cʉ̃iro suariro jiro,
Cohamacʉ to cahmano seheta quihõno yoariro jierara.
21 Ã jina jipihtia mʉsa ñaa yoarire,
mʉsa ñaare goa pjarire duhuga mʉsa.
à jina Cohamacʉre noano yʉhtiina jina to buheare tuaro cahmaga mʉsa.
To ya buheare mʉsa tuaro cahmachʉ Cohamacʉ sehe mʉsare pichacapʉ wahaborinare yʉhdʉchʉ yoarohca.
22 To yare tʉhopanahta to nino sehe yoaerana mahñoare tʉhotuna nica mʉsa.
“To nino sehe yʉ yoaerachʉ noanohca”,
ni tʉhotuna mahñoare tʉhotuna nica mʉsa.
à jina to yare tʉhona tí sehere yoaga.
23 Cohamacʉ yare tʉhopanahta,
to nino sehe yoaerana,
to wʉhdʉare ñóno mehne ñʉriro yoaro seheta jira mʉsa.
24 Tiro to wʉhdʉare to ñʉri baharo waha,
to ñʉrire boa wahara.
25 Pairo sehe to ñʉrire to boerariro seheta Cristo to dutirire tʉhoro tíre yoaro,
wahcheriro jirohca.
Tí dutia Cristo to cahĩa mehne masare to yʉhdʉchʉ yoahti buhea jira.
Tí buheare ne cohãerariro wahcheriro jirohca.
Tiro pinihta to tʉhorire yoariro jira.
à yoarirore noano yoarohca Cohamacʉ.
26 Cʉ̃iro to ã durucumacanocarire duhu masieraro,
potocãta Cohamacʉre ño payoerara.
“Cohamacʉre noano ño payoja”,
ni tʉhoturiro jiparota mahñoare tʉhotura tiro.
“Cohamacʉre ño payoja”,
niriro to jipachʉta to ño payoa ne yaba cjihti jierara.
27 Potocãta Cohamacʉre mari Pʉcʉre mari ño payona,
to cahmano seheta ño payona,
õ sehe yoaja mari:
Pʉcʉsʉma marieinare,
wapewahya numia cʉ̃hʉre ñano ti yʉhdʉchʉ ñʉna,
tinare yoadohoja mari.
à jina ahri yahpa macaina ñaare ti yoaa barore ne yoa duaeraja mari.
à yoana potocãta Cohamacʉre ño payoina jija mari.