Jesure ã wacũrucujihna mari
12
1 Ã jina ahrina yʉ yahurinare payʉ Cohamacʉre wacũ tuainare masina,
jipihtia ñaa yoaare duhunocajihna mari cʉ̃hʉ.
Õ sehe jira mari piti dahre buhechʉ:
Mʉrocaperirore tirore mʉroca tuachʉ dojomehnea jira paye.
To dahpo suhti nʉcʉa suhti tirore mʉroca tuaerachʉ yoaboca.
Tí yoaro seheta Cohamacʉ cahmaare mari yoa duachʉ dojomehnea cʉ̃hʉ jira.
Ahri cʉ̃hʉre duhujihna mari.
à yoana mʉrocapeina soro marieno ti mʉrocaro seheta mari cʉ̃hʉ Cohamacʉ to cahmano seheta soro marieno yoajihna.
2 Ã jina Jesure ã wacũrucujihna mari.
Tirota jira marine wacũ tua dʉcachʉ yoariro.
à yoa marine wacũ tua namochʉ cʉ̃hʉre yoara tiro.
Crusapʉ yariaro cʉ̃no pjari jire.
Baharo to wahchehtore masino crusapʉ yariari jire.
à yariaro bʉo tiboriro jiparota bʉo tierari jire tiro.
à yoaro mipʉre Cohamacʉ to pʉhtoro dujiro poto bʉhʉsehei dujitjiãhno tiro dutiriro jira.
3 Ñaina masa tirore ti ñabiaro yoapachʉta cʉ̃no pjari jire tiro.
Tíre wacũga mʉsa,
mʉsa cʉ̃hʉ ñano yʉhdʉna,
“Cʉ̃no pjaerari”,
nina.
Tíre wacũga mʉsa “Tirore wacũ tua duhuri”,
nina.
4 Jesu to ñano yʉhdʉriro sehe ñaare yoaerapanahta ñabiaro waro yʉhdʉerasinica mʉsa.
Ñaina mʉsare wajãerasinica.
5 ¿Cohamacʉ mʉsare to pohnare to yahurire bonocajari mʉsa?
Mʉsa ñano yʉhdʉhtire to yahurire wacũga mʉsa.
Õ sehe nia tiri jire tiro:
“Yʉ macʉ,
mʉhʉre yʉ yahuchʉ yʉhʉre ã ñʉnocai tjiga ñano yʉhdʉpaihta.
Mʉhʉre yʉ tuhtichʉ tʉhocʉ cahyai tjiga.
6 Jipihtina yʉ cahĩinare yahuja.
à yoa jipihtina ‘Yʉ pohna jira mʉsa’,
yʉ ni ñʉinare yʉhdʉrʉca dutieraja.
à jicʉ ti yʉhdʉrʉcachʉ ñʉcʉ tinare buhiri dahreja”,
nia tiri jire Cohamacʉ.
7 Ñano yʉhdʉna Cohamacʉ yare duhuena tjiga.
Cohamacʉ mʉsare to pohnare buhero nina.
Ti pʉcʉsʉma ti pohnare ã yahurucura.
à yoa tinare buherucura.
Tó seheta yoara Cohamacʉ cʉ̃hʉ marine to pohnare.
8 Cohamacʉ jipihtina to pohnare ã yahurucura.
à jina mʉsare to yahuerachʉ to pohna waro jierara mʉsa.
Pʉcʉsʉma marieina yoaro sehe jira mʉsa to yahueraina.
à jina “Sã Pʉcʉ waro jira”,
ni masierara mʉsa Cohamacʉre,
mʉsare to yahuerachʉ.
9 Mari pʉcʉsʉma marine ti yahuchʉ tʉhona tinare ño payoja mari.
Mari pʉcʉsʉmare mari ño payoriro yʉhdoro ño payoro cahmana mari Pʉcʉre Cohamacʉre to yahuchʉ.
à jina tirore yʉhtiro cahmana marine.
à yʉhtiina jina jipihtia dachoripe tiro mehne jinahca.
10 Mahaa nʉmʉricã ahri yahpai mari jisinichʉ mari pʉcʉsʉma marine yahua,
buhiri dahrera.
Ti mʉ sʉro ti masino purocãta marine yahua,
buhiri dahrera.
Cohamacʉ sehe marine noano yahura.
à jiro to masia mehne marine buhiri dahrera marine noaina bʉcʉa dutiro.
Ãta yoara tiro marine tiro yoaro sehe noaina mari jihto sehe.
11 Marine to buhiri dahrechʉ wahcheraja mari.
Wiho mari cahyaja.
à cahyapanahta to ã buhiri dahreri baharo noaina bʉcʉanahca mari.
à jina soro yoaro marieno noano jinahca.
Cohamacʉ marine to dutiare mari yʉhtierachʉ cua nina marine
12 Ã jina wacũ tuaera cureina jipanahta Cohamacʉre wacũ tuaina jiga.
Tirore duhuena tjiga.
13 Noano potori mahare mʉsa wahaboro seheta noano potocã yoaga mʉsa.
Mʉsa ã yoachʉ ñʉ cũa,
paina Jesu yaina soro jiare yoasi.
Mʉsa noano yoachʉ ñʉ cũa,
noano wacũ tuaera cureina cʉ̃hʉ wacũ tuaina wahaahca.
14 Jipihtina masa mehne noano jiga,
cahmacheno marieno.
à yoa ñano yoarucuena tjiga.
Ñaa buhiri marieina dihta mari pʉhtoro Cristore ñʉahca.
15 Noano yoaga mʉsa.
Cohamacʉ mʉsare to yoadohochʉ tirore noano yʉhtiga.
Ñaa diaa ti toaare ti dojomehneno seheta mʉsa cʉ̃hʉ Cristo yare duhuena tjiga,
“Painare dojomehneri”,
nina.
16 Ne numia mehne ñano yoaina jiena tjiga.
à yoa Cohamacʉ yare cahmaeraina jiena tjiga.
Cohamacʉre cahmaerariro jia tiri jire Esaú cjiro.
Tiro masa wahmino jia tiri jimare.
à jiro to pʉcʉro to yariari baharo to pʉcʉro yare cjʉahtiro jisinia tiri jimare.
Cohamacʉ to pʉcʉrore to ni cũri cʉ̃hʉre cjʉahtiro jisinia tiri jimare.
à jiriro jiro cʉ̃ dacho cʉ̃ wapaihta chʉare cahmano,
tí wapa mehne to bahʉro sehere to wahmino yoaro taro cohtotaa tiri jire.
17 To ã yoari baharo to dohse waharire masina mʉsa.
To pʉcʉro tirore to wahtire tuaro cahmaa tiri jimare Esaú.
To ã cahmapachʉta to bahʉrore to wahmino to yoari buhiri,
baharo to cjʉaborire waera tiri jire to pʉcʉro Esaúre.
Tíre yahco mehne to sinipachʉta tirore waera tiri jire to pʉcʉro.
18 Cohamacʉ to dutiare Moise cjirore to cũchʉ mari coyea Israe masa cjiri Cohamacʉ mehne jia tiri jire.
Tina tiro mehne ti jiriro seheta mʉsa sehe jierare.
Õ sehe yoaa tiri jire tina sehe.
Tʉ̃cʉpʉ Cohamacʉ mehne jia taa,
sʉa tiri jire.
Tʉ sehe Sinaí wama tidʉ jira.
Tʉpʉ ti sʉchʉ tuaro pichaca jʉ̃a tiri jire.
à jiro nahitiano,
buiri,
tuaro wihnono cʉ̃hʉ jia tiri jire tʉ tʉ̃cʉi.
19 Tópʉ ti sʉchʉ corneta bisiro coa taa tiri jire.
à yoa durucua bisiro coa taa tiri jire.
To ã durucua bisiro coa tachʉ tʉhoa,
masa cʉ̃no pjaeraa,
“Ã durucu namoeno tjijaro”,
tuaro ni sinia tiri jire.
20 Cohamacʉ cuaro mehne õ sehe ni,
dutia tiri jire tinare:
“Jipihtina ahdʉ tʉ̃cʉre pihainare tãa mehne doca wajãga tinare.
Ahdʉre pihariro wahiquiro waro to jipachʉta tiro cʉ̃hʉre tãa mehne doca wajãga tirore.
O ñosadʉ mehne ñosa wajãga tirore”,
nia tiri jire Cohamacʉ.
To ã nichʉ tʉhoa to ã ni dutiare cʉ̃no pjaera tiri jire tina.
21 Jipihtia tʉ tʉ̃cʉi jiro to ñʉrire ñʉ cuiro,
õ sehe nia tiri jire Moise cjiro:
“Cuicʉ teterei nija”,
nia tiri jire tiro.
22 Tó seheta Cohamacʉ mehne ti ji dʉcariro seheta jierara mʉsa sehe.
Cohamacʉ mehne jina wahana,
Siõ wama tidʉpʉ mʉano macadʉpʉ mʉsa sʉboro seheta potota Cohamacʉ mehne durucure mʉsa.
Cohamacʉ catiriro to ya macapʉ mʉsa sʉboro seheta potota tiro mehne durucure mʉsa.
Tí maca pa maca wahma maca Jerusalẽ mʉano macari maca jira.
Tópʉre payʉ anjoa peri jira.
23 Tina Cohamacʉ mehne wahchea taa cahmachuina jira.
à jina mʉsa sehe to ya maca macaina jina,
tópʉ Cohamacʉ pohna ji mʉhtaina mehne mʉsa cahmachuboriro seheta jira.
Tina to pohna wamare to joa õri pũi mʉanopʉ ti wamare to joa õina jira.
Tiro Cohamacʉ sehe jipihtinare besehtiro jira.
Tiro mehne macaina jira mʉsa sehe.
à jina paina noaina Cohamacʉ yaina mehne cahmachuina seheta jira mʉsa cʉ̃hʉ.
Tinareta ñaa marieina jichʉ yoa tuhsʉri jire Cohamacʉ.
24 Ã jina Jesu mehne macaina jira mʉsa sehe.
Wahmanopʉ Moise cjirore to duti cũri cjirire cohtotaro “Mʉsare yʉhdʉchʉ yoaihtja yʉhʉ”,
ni cũa tiri jire Cohamacʉ marine.
To ã ni cũriro seheta yoariro jira Jesu.
To dire cohã to yariaro mehne ã marine yʉhdʉchʉ yoara.
Abe cjiro to di cohãchʉ ñʉno Cohamacʉ Abere wajãrirore buhiri dahrea tiri jire.
Jesu sehe to dire cohã to yariariro mehne noano yʉhdʉja mari.
à jiro Abe to di cohãri wiho warota jia tiri jire.
Cristo sehe to di cohãri baharo noa yʉhdʉaro yoari jire Cohamacʉ marine.
à jia to di cohãri wiho warota jierara.
25 Ã jina noano yoaga mʉsa.
Cohamacʉ yare mʉsare yahurirore noano yʉhtiina jiga.
Panopʉ ahri yahpai jiriro Moise cjiro Cohamacʉ yare to yahuchʉ tʉhoa,
payʉ tíre tʉho duaera tiri jire.
à ti tʉhoerari buhirire buhiri dahrea tiri jire Cohamacʉ tinare.
Cristo sehe mʉanopʉ jiriro Cohamacʉ yare yahuriro jira.
à jiro panopʉ macainare to buhiri dahreriro yʉhdoro buhiri dahrerohca Cohamacʉ Cristore cahmaerainare.
Cristo sehe mʉanopʉ jiriro Cohamacʉ yare yahuriro jira.
26 Tí pjare Moise cjirore to dutiare to cũri pjare Cohamacʉ to durucuro mehne yahpa ñuhmichʉ yoaa tiri jire.
Mipʉ sehere õ sehe ni yahuri jire tiro:
“Ahri yahpa to ñuhmichʉ cʉ̃ taha yoa namoihtja.
Ahri yahpa dihtare ñuhmichʉ yoasi yʉhʉ.
Mʉanopʉ cʉ̃hʉre ñuhmichʉ yoaihtja”,
ni yahuri jire tiro.
27 “Ahri yahpa to ñuhmichʉ cʉ̃ taha yoa namoihtja”,
nino jipihtiare to bajuamehnerire to cohãhtore masichʉ yoaro niri jire.
Pʉhtoro Cohamacʉ to sʉho jiropʉre cohãhto basioerara.
à jiro to bajuamehneri cjirire to cohãchʉ pʉhtoro to sʉho jiro dihta tjuarohca.
28 Pʉhtoro to sʉho jiropʉ wahanahca mari.
à jina pʉhtoro to sʉho jiropʉre to cohãerachʉ ñʉna,
Cohamacʉre “Noana”,
nijihna mari.
à jina tirore ño payoa mehne,
cua pisaro mehne to yare yoajihna mari tirore wahchechʉ yoana tana.
29 Pichaca jʉ̃no to cuaro to jiro seheta Cohamacʉ cuaro choro buhiri dahreriro jira.