Melquisede sacerdote to jiriro seheta Jesu sacerdote jira
7
1 Melquisede cjiro sehe Salẽ wama tiri maca macaina bui pʉhtoro jia tiri jire.
Sacerdote jiro Cohamacʉ tuarirore,
mʉano macarirore sini payobasariro jia tiri jire.
à jiro paina pʉhtoare Abrahã cjiro cahma wajã yʉhdʉrʉca tuhsʉ,
to tjua tachʉ waro Melquisede cjiro to ya macai jiriro Abrahã cjirore piti bocaro sʉa tiri jire.
à piti bocaro tirore sini payobasaa tiri jire Cohamacʉre:
“Noano yoaga ahrirore”,
ni sini payobasaa tiri jire Cohamacʉre Abrahã cjirore.
2 To ã piti bocahto pano Abrahã cjiro sehe tirore ñʉ tuhtiinare wajã tuhsʉ to wajãrina cjiri pʉhtoa yare naa tiri jire.
To ã nari cjirire mahanocã waa tiri jire Melquisede cjirore.
Cohamacʉ to dutiriro purocãta mahanocã waa tiri jire Melquisede cjirore.
Melquisede cjiro to wama sehe “Bui pʉhtoro noano yoariro jira”,
nino nina.
Tiro cjiro Salẽ wama tiri maca macaina pʉhtoro to jichʉ to wama õ sehe nino nina:
“Bui pʉhtoro noano jichʉ yoariro”,
nino nina.
“Salẽ” nino,
“Noano jia”,
nino nina.
3 Ne Melquisede cjiro pʉcʉsʉmare,
to pano ji mʉhtainare to coyeare ti yahu joa õri mariahna.
To masa bajuarire,
to yariari cʉ̃hʉre yahu joa õri mariahna.
à jiro ã jirucuriro yoaro sehe jira tiro cjiro.
To ã jiriro jichʉ Cohamacʉ tiro mehne marine piti dahre buhera.
Cohamacʉ to macʉno to sacerdote to jirire marine buhera.
Melquisede cjiro sacerdote ã jirucuriro yoaro sehe jira.
Tiro yoaro seheta Cristo cʉ̃hʉ sacerdote ã jirucuriro jira.
4 Ã jiro Melquisede ne wiho jiriro jiera tiri jire.
Abrahã mari ñʉchʉ cjiro pʉhtoro waro jiparota mahanocã to tjua narire tiro sehere waa tiri jire.
Mahanocã waa tiri jire Melquisedere.
5 Ã jia Cohamacʉ dutia Moise cjirore to cũri dutia jipihtina paina Israe masare tó purota wapa dutira.
à dutiro Leví panamana ji turiainare ti coyea waparire ñaha dutiro,
cũa tiri jire.
Leví panamana sacerdotea wahaa tiri jire.
à jia Israe masa Abrahã panamana ji turiaina jipahta ti sacerdoteare wapaa tiri jire.
6 Melquisede sehe Leví panamino ji turiariro jieraparota wapa naa tiri jire Abrahãre.
Cohamacʉ “Mʉhʉre noano yoaihtja”,
to ni cũriro jiparota Abrahã sehe Melquisedere wapaa tiri jire.
à jiro Melquisede sehe Cohamacʉre Abrahãre sini payobasaro noano yoa dutia tiri jire.
7 Noano yoa dutiriro Melquisede cjiro sehe to noano yoa dutiriro bui Abrahã bui jira.
Tíre mari noano masija.
8 Mari mehne macaina sacerdotea marine mahanocã wapa naina mari yoaro seheta masa jira.
à jia yariahtinata jira tina cʉ̃hʉ.
Ahriro Melquisede sehe Abrahãre mahanocã wapa nariro cjiro ã catirucuriro yoaro sehe jira,
mari piti dahre buhechʉ.
To yariarore yahueraro,
ãta nino nia tiri jire Cohamacʉ yare ti joari pũi.
9 Mipʉ macaina Leví panamana ji turiaina sacerdotea jia,
mahanocã wapa nana.
à jiina ti jipachʉta Abrahã Melquisedere mahanocã waparo jipihtina Leví panamana ji turiaina ya cjihti cʉ̃hʉre wabasaro sehe yoaro nia tiri jire.
à jia tina cʉ̃hʉ Melquisedere mahanocã wapaina yoaro sehe jira.
10 Melquisedere Abrahã to wapari pjare Leví sehe masa bajuerasinia tiri jire.
à masa bajuerasiniparota to ñʉchʉno cjiro Abrahã pjacʉpʉ to jiboriro seheta Leví sehe ji tuhsʉro nia tiri jire.
à jiro Melquisede Abrahãre to piti bocachʉ Leví cʉ̃hʉ to ñʉchʉno cjiro mehne jiro sehe jiro nia tiri jire.
à jia Leví,
to panamana ji turiaina mehne Melquisedere mahanocã wapaina yoaro sehe jia,
tina to docai jia nia tiri jire.
11 To dutiare cũno Cohamacʉ Levíre to coyea cʉ̃hʉre sacerdotea ji dutia tiri jire.
à jia to dutia ti niriro seheta tina sacerdotea wahiquinare wajã jʉ̃ mʉo,
sinibasaa tiri jire Cohamacʉre masa ya cjihtire.
Ti ã yoari mehne mari yʉhdʉna,
pairo sacerdotere soro sehe jiriro sacerdotere cahma namoeraboa mari.
à jina pairo sacerdotere cahmaja mari mipʉre,
Melquisede yoaro sehe jirirore.
Leví ya curua macariro Aarõ cjiro yoaro sehe jiina sacerdoteare mipʉre mari cahmaeraja.
12 Ã jina sacerdotere mari cohtotana,
marine dutia cʉ̃hʉre cohtotaro cahmana marine.
(Sacerdotea ti yoadohoa mehne mari yʉhdʉeraro seheta tí dutia mehne mari yʉhdʉeraja.
à yoana tí dutiare cohtota pahñono cahmana marine.)
13 Aarõ,
Leví cʉ̃hʉ ti ya curua macaina dihtare sacerdotea sãa duti mʉhtaa tiri jimare Cohamacʉ to dutiare cũno.
To ã dutipachʉta mipʉre mari pʉhtoro sacerdote to sõriro pa curua macariro jira.
Tí curua macariro ne sacerdote jierasinire.
14 Tiro Cristo Juda ya curua macariro masa bajuari jire.
Tíre mari noano masija.
Moise cjiro sehe sacerdotea sõno,
Juda ya curua macainare ne cʉ̃iro sacerdote sõera tiri jire.
15 Ahrire masina,
õ sehe mari noano masija:
Mipʉre wahma to sõriro sacerdote Cristo Melquisede yoaro sehe jiriro jira.
16 Panopʉ macaa dutia ti niriro seheta Leví ya curua macaina dihta sacerdotea sãari jire.
Mipʉre to sõriro sacerdote ti yoaro sehe jiriro sacerdote sãaerari jire.
Tiro Cohamacʉ tuaa mehne jipihtia dachoripe jiriro jira.
à jiro tí tuaa mehne sacerdote sãari jire tiro.
17 Õ sehe nina Cohamacʉ yare ti joari pũi:
“Jipihtia dachoripe sacerdote jirucuihca mʉhʉ.
Melquisede sacerdote to jiriro seheta sacerdote jirucuihca mʉhʉ,
nia tiri jire Cohamacʉ to macʉnore”,
ni joaa tiri jire panopʉ.
18 To dutia to cũ mʉhtari dutiare masa ti bihoerachʉ yaba cjihti jierari jire.
à jiro tí dutiare duti namoerari jire Cohamacʉ.
19 Moise cjirore to cũri dutia mehne ne yʉhdʉerara masa.
à jiro mipʉ sehere Cohamacʉ marine to yʉhdʉchʉ yoahtore marine cũre.
To ã yoachʉ mipʉre tiro cahapʉ waha masija mari.
à yoa tiro mehne durucu masija.
20 Ã yoa Cristore sacerdote sõno,
“Yʉ wama mehne potocã nii nija”,
nino tirore sõri jire to Pʉcʉro.
Paina sacerdoteare tirore to yoariro sehe wama payo sõerari jire.
21 Cristo sehe Cohamacʉ tuaro to yahuri mehne sacerdote sãari jire.
Õ sehe nia tiri jire to Pʉcʉro Cristore:
“Yʉhʉ mʉ pʉhtoro yʉ wama mehne mʉhʉre potocã yahuihtja.
Ahrire ne duhu cũno marieno yahuja mʉhʉre.
Jipihtia dachoripe sacerdote jirucuihca mʉhʉ”,
ni cũa tiri jire Cohamacʉ to macʉnore.
22 Ã “Yʉ wama mehne potocã nii nija”,
to nino mehne cũno,
wahma buheare noaa buheare marine cũno,
marine to yʉhdʉchʉ yoahtire cũno nia tiri jire.
Panopʉ macaa dutia yʉhdoro mari noano jihtore cũno nia tiri jire.
à cũno Cohamacʉ “Mʉsare yʉhdʉchʉ yoaihtja”,
to niriro seheta yoaro taro,
Jesure warocari jire marine yʉhdʉchʉ yoahtiro cjihtore.
23 Ji mʉhtaina sacerdotea ti yariachʉ ñʉa paina cohtota sãana tjoa.
à jia tina payʉ sacerdotea wahara.
24 Jesu sehe ã jirucura.
à jia tirore cohtotaina mariahna sacerdotea.
25 Ã jiro tiro ã jirucuro,
Cohamacʉre ã sini payobasarucura to yaina ya cjihtire.
à yoa Cohamacʉ mehne ti ã jirucuhto sehe masare yʉhdʉchʉ yoa masina tiro.
Jipihtina tirore wacũ tuaina Cohamacʉ cahapʉ wahaahca.
à jiro Jesu jira pototi tinare yʉhdʉchʉ yoariro.
26 Ã jiro Jesu jira mari sacerdotea pʉhtoa bui pʉhtoro.
Tiro pinihtare tuaro cahmaja mari.
Ne ñaa buhiri marieriro jira tiro.
Masa yoaro sehe ne ñaare yoaerare.
à jiro Cohamacʉ tirore ñaina cahai jirirore naahno,
mʉanopʉ cũ,
jipihtina paina bui pʉhtoro sõri jire.
27 Paina sacerdotea yoaro sehe jierara tiro.
Tina sehe dachoripe wahiquinare wajã,
jʉ̃ mʉoa,
Cohamacʉre sinia tihre.
Ti basi ti ñaa yoari buhirire sini mʉhtaa tihre.
Baharo paina masa ti ñaa buhiri cʉ̃hʉre sinibasaa tihre tina.
à jia payʉ tahari tina Cohamacʉre sinia tihre.
Jesu sehe sacerdote jiro,
cʉ̃ tahata to yariaa mehne siniri jire Cohamacʉre masa ti ñaa buhirire cohãno taro.
à yariaro to basi to pjacʉre to catia cʉ̃hʉre Cohamacʉre to waboriro seheta yoaro niri jire.
28 Cohamacʉ dutia Moise cjirore to cũri cjiri sacerdotea pʉhtoare sãa dutira.
à sãapahta ñaa marieina jierara ã sacerdotea sãa.
Tí dutia baharo jia buhea mehne Cohamacʉ “Yʉ wama mehne potocã nii nija”,
to nino mehne to yahuri buhea mehne to macʉno sacerdotea pʉhtoro sãari jire.
Tiro sehe ñaa marieriro ã jirucura.