6
1,2 Ã jina Cohamacʉ yare noano masiina,
noano yʉhtiina jijihna.
Cristo yare wahmanore mari buhe dʉcana õ sehe masi dʉcai:
Mari mʉ sʉro mari yoaa yaba cjihti jierara.
Mari noano yoaa mehne yʉhdʉsi mari.
Cohamacʉre wacũ tuaro cahmana marine.
Ahrire wahmanopʉre buhe dʉcare marine.
à jia bautisaare,
wamomacarire marine ti duhu payoare,
yariaina ti masa mʉjaare,
ahri dacho to pihtiri baharo Cohamacʉ to buhiri dahrehtore,
to buhiri dahrehtina ti ñano yʉhdʉrucuhto cʉ̃hʉre ahri cʉ̃hʉre wahmanopʉre marine buhe dʉcare.
Õ sehe jia buheare masi tuhsʉ,
paye sehere noano buhe namojihna tjoa.
3 Ã jina Cohamacʉ to cahmachʉ ãta yoanahca mari.
4 Mari ã yoaerana Cohamacʉ yare duhuboca mari.
Cohamacʉ yare masiina jipahta tíre duhuinare ne pari turi pano ti ñaa tʉhotumarire cohtotachʉ yoa masierara.
Tó sehe jiina Cohamacʉ tinare to noano yoahtore masia,
Espíritu Santo to yoaa tiare mahanocã masimare.
5 Ã yoa Cohamacʉ ya durucuare tʉhoa noaa durucua ti jichʉ masimare.
Tuhsʉ,
pihtiri dacho baharopʉ Cohamacʉ to tuaa mehne mari ã jirucuhtore,
masare to buhiri dahrehto cʉ̃hʉre tina masimare.
6 Ã jiinapʉre Cristo yare duhurinare pari turi ti ñaa tʉhotumarire tinare cohtotachʉ yoa masierara.
Tó sehe yoaina Cohamacʉ macʉnore pari turi crusapʉ ti cjã puharo seheta tirore yoaa nina.
Ti ã yoachʉ ñʉa paina masa Cristore bʉjʉpera.
Ti ã yoachʉ tinare ti ñaa tʉhotumarire tinare cohtotachʉ yoa masierara.
7 Õ sehe jira tí mari piti dahre buhechʉ:
Noari yahpare pjíro coro tachʉ tí toaa noano du,
dicha tira.
à jiro tí wese pʉro dichare cjʉara to chʉhtire.
Tí yahpa Cohamacʉ noano to yoari yahpa jira.
(Tó seheta noano yoara tiro to yaina cʉ̃hʉre.)
8 Wiho mejeta agã pota mehne,
tja mehne tí yahpa diaro yaba cjihti jierara.
à jiri yahpa Cohamacʉ to jʉ̃ cohãhti yahpa jira.
à jiro tí yahpare jʉ̃nocanohca.
(Tó seheta yoara tiro tirore duhuinare.)
Cristore ã ño payorucuinare yʉhdʉchʉ yoara Cohamacʉ
9 Yʉ cahĩina,
mʉsare ã ni yahupaihta mʉsa sehere “Cristore duhuina jira”,
nii nieraja.
Mʉsa sehe Cristo to yʉhdʉchʉ yoaina jira.
à jina noaare yoana nica mʉsa.
Tíre masija yʉhʉ.
10 Noano mari yoari wapa quihõno marine noano yoariro jira Cohamacʉ.
à jiro to yare mʉsa tuaro dahrari wapare bosi tiro.
Tirore cahĩna noano yoadohore mʉsa tirore.
Paina Cristo yaina cʉ̃hʉre yoadohore mʉsa.
à yoa tinare yoadohosinina nica mʉsa.
à yoaina mʉsa jichʉ ñʉno bosi tiro.
11 Mʉsa catisinino puro painare mʉsa cahĩrucuchʉ,
mʉsa yoadohorucuchʉ cʉ̃hʉre cahmaja sã,
baharopʉ Cohamacʉ yare mʉsa duhuri nina.
Mʉsa ã noano yoachʉ ñʉno noano yoarohca Cohamacʉ mʉsare.
12 Ã jina mʉsa capa bʉjʉina mʉsa jichʉ cahmaeraja sã.
Paina Cristo yaina ñano yʉhdʉpahta to yare ne duhuerara.
Ti ã yoachʉ ñʉno Cohamacʉ “Mʉsare waihtja”,
to nirire tinare wa pahñonohca.
à jina mʉsa cʉ̃hʉ tina yoaro seheta yoarucuga.
13,14 Panopʉ Cohamacʉ Abrahã cjirore õ sehe ni cũa tiri jire:
“Yʉ wama mehne ahrire potocã nii nija mʉhʉre.
Mʉhʉre noano yoaihtja.
à yoacʉ mʉ panamana ji turiainapʉre payʉ masa jichʉ yoaihtja”,
ni yahu cũa tiri jire Cohamacʉ Abrahã cjirore.
à ni yahu cũno to ya wama mehne ã ni yahuro niri jire.
Pairo tiro bui jiriro ne mariachʉ to ya wama mehne to basita ã ni yahua tiri jire.
15 “Mʉhʉre noano yoaihtja”,
Cohamacʉ to ni cũrire Abrahã cjiro sehere noano to cohtachʉ ñʉno to niriro seheta tirore noano yoaa tiri jire.
16 “Cohamacʉ mehne potocã nina nija”,
masa sehe nia,
tina ti bui jiriro wama mehne ã ni yahua nina.
“Cohamacʉ mehne potocã nii nija”,
cʉ̃iro to nichʉ tʉhoro tiro pairo mehne cahma sayoriro “Potocã tjira”,
ninohca.
à jia cahma sayo duhuahca tina.
17 Cohamacʉ Abrahãre “Mʉhʉre noano yoaihtja”,
ni cũno to ya wama mehne ã ni yahua tiri jire.
To ã ni yahurire tʉhona “Potocã tjira tí.
à yoa to niri ne cohtotasi” ni,
masija mari.
Tíre mari masihto sehe to ni cũri mehne “Yʉ wama mehne potocã nii nija”,
ni yahua tiri jire Cohamacʉ.
18 Ã jiro pʉaro to ni durucuri mehne potocãta to nirire masichʉ yoari jire Cohamacʉ marine:
To ni cũri cʉ̃hʉ “Yʉ wama mehne potocã nii nija”,
to ni yahuri cʉ̃hʉ tí pʉaro mehne to ni durucurire yahua tiri jire tiro.
To ni cũri cʉ̃hʉ,
“Yʉ wama mehne potocã nii nija”,
to ni yahuri cʉ̃hʉ ne cohtotaerara.
Cohamacʉ ne mahñoerara.
To ã jiriro jichʉ masina,
marine to yoadohohtore macana,
tirore noano wacũ tuana,
wahchea mehne marine to yʉhdʉchʉ yoahtore cohtanahca mari.
19,20 Ã to yʉhdʉchʉ yoahtore cohtana,
wacũ tuaina jija mari.
à jina cuieraja.
Sacerdotea pʉhtoa bui pʉhtoro Cohamacʉ to jiri tahtia waropʉ sãano,
dʉcatari suhtirore yʉhdʉ sãahna.
à sãano masa ya cjihtire sini payobasara Cohamacʉre.
To ã yoariro seheta Jesu cʉ̃hʉ baharo mari wahahto seheta mʉanopʉ Cohamacʉ cahapʉ waharo,
mari ya cjihtire sini payobasara Cohamacʉre.
Tópʉ mari wahahto pano tiro sehe wahari jire.
à jiro jipihtia dachoripe sacerdotea pʉhtoa bui pʉhtoro jira tiro.
Melquisede sacerdote to jiriro seheta sacerdotea pʉhtoro jirucura tiro cʉ̃hʉ.