Cohamacʉ yare noaa buheare marine ã tʉhotunocano cahmaerara
2
1 Ã yoa Cohamacʉ macʉno waro marine yahuriro to jichʉ masina to yahuare mari tʉhorire noano wacũno cahmana marine,
“Tíre bori”,
nina.
2 Anjoa masare Cohamacʉ dutia cjirire ti yahu cũ turiariro seheta tí dutiare yʉhdʉrʉca dutierari jire.
à jia masa sehe anjoa ti yahurire ti yʉhdʉrʉcachʉ ñʉno Cohamacʉ tinare quihõno buhiri dahreri jire.
3 Anjoa ti yahurire mari yʉhtiri yʉhdoro Cristo sehere yʉhtiro cahmana.
Tiro mari pʉhtoro marine to yʉhdʉchʉ yoahtore yahu mʉhtari jire.
à jia tirore tʉhorina sehe to yahurire marine yahu turiare marine noano masichʉ yoaa taa.
à jiro tí buheare marine to yʉhdʉchʉ yoahti buheare mari ã tʉhotunocachʉ Cohamacʉ tuaro marine buhiri dahrerohca.
Tíre duhti masieraja mari.
4 Tí buheare tʉho mʉhtaina painare ti buhero watoi Cohamacʉ sehe tí buhea quihõnota ti jichʉ ñono nire.
To tuaa mehne ñono nire.
à yoa payʉ tahari to tuaa mehne yoa ñono,
tí buheare quihõno ti jichʉ ñono nire.
à yoaro to yainare ti yoahtire to cahmano seheta cũri jire to buhea quihõno ti jiare ti masihti.
Espíritu Santo sehe jira marine ã yoa masichʉ yoariro.
Jesucristo mari yoaro seheta pjacʉ tiriro masa bajuaha
5 Pihtiri dacho baharoi jiina Cohamacʉ cahai jiina michapucacã yʉ yahurina cjiri bui pʉhtoa jisi anjoa sehe.
Tina anjoare pʉhtoa sõsi Cohamacʉ.
6 Wiho mejeta cʉ̃iro Cohamacʉre to durucurire õ sehe ni joari jire panopʉ:
“Masa wiho jiina ti jipachʉta tinare wacũna mʉhʉ.
Masare noano yoara mʉhʉ.
7 Mahaa nʉmʉricã anjoa docai masare cũri jire mʉhʉ.
à cũpacʉta mipʉre tinare tuaare wacʉ pʉhtoa sõri jire mʉhʉ.
8 Mʉ ã sõchʉ ahri yahpa macaa bui jipihtia bui jira masa”,
niri jire panopʉ macariro Cohamacʉre.
à cũno ahri yahpa macaina wahiquina jipihtina bui,
jipihtia bui cũri jire Cohamacʉ.
Masare to ã pʉhtoa sõpachʉta jipihtina ahri yahpa macaina,
ahri yahpa macaa bui jierasinica masa.
9 Ã tina bui jierasinipanahta,
Jesu sehere masija mari.
Mahaa nʉmʉricã anjoa docai Cohamacʉ to macʉno cʉ̃hʉre cũri jire,
mari yaro jiborirore yariahtirore.
Cohamacʉ marine cahĩno Jesure mari yariaborirore to yariachʉ cahmari jire.
à jiro to ã yariachʉ ñʉno tirore tuaare waro,
pʉhtoro sõri jire tirore.
10 Cohamacʉ jipihtiare bajuamehneriro jira.
à yoa jipihtia to ya dihta jira.
à jiro Jesure to yaria dutichʉ,
tiro sehe mari ñaa yoari buhirire cohãri jire.
à cohãri jire tiro masa payʉ to yaina jihtinare mʉanopʉ naano taro.
Jesu to ñano yʉhdʉchʉ masare yʉhdʉchʉ yoahtiro Cohamacʉ to waha dutiro seheta yoaro niri jire tirore.
To ã yoachʉ pinihta noa nina.
à jiro Jesu sehe marine yʉhdʉchʉ yoariro waro,
mari pʉhtorota jira.
11 Jipihtina masare ti ñaa yoari buhirire Jesu,
to cosawerina mehne pʉcʉ tira Cohamacʉre.
à jiro mari Pʉcʉ cʉ̃irota jira.
Mari Pʉcʉ to jichʉ Jesu marine to yainare to cosawerinare “Yʉ coyea jira”,
ni pisuro ne bʉo tierara.
To ã ni pisurire mʉsare yahuihtja.
12 Õ sehe nino niri jire tiro:
“Cohamacʉ,
mʉ jia tiare yahuihtja yʉ coyeapʉre.
Jipihtina yʉ yaina panoi mʉhʉre ño payocʉ ‘Tuariro jira’,
ni yahuihtja yʉhʉ tinare”,
niri jire tiro to Pʉcʉrore.
13 Ahri cʉ̃hʉre niri jire tiro:
“Cohamacʉre wacũ tuaihca yʉhʉ”,
niri jire tiro.
Ahri cʉ̃hʉre niri jire tiro:
“ ‘Õi jija yʉhʉ.
Cohamacʉ pohna mehne õi jija.
Yʉhʉre to cũrina yʉ coyea mehne õi jija’,
niri jire tiro to yainare ‘Yʉ coyea’ ”,
ni pisuro.
14 “Cohamacʉ pohna”,
to niina pjacʉ tiina mari jichʉ ñʉno,
Jesu sehe mari ya pjacʉ yoaro sehe jiriro tari jire.
à jiriro tari jire tiro crusapʉ yariaro taro,
watĩnore butichʉ yoaro taro.
Tiro watĩno sehe yariachʉ yoariro jira.
15 Ã yoa watĩnore butichʉ yoaro,
marine yʉhdʉchʉ yoare.
Mari sehe dachoripe mari yariahtore cuimai.
à cuiina jina pichacapʉ wahaborina jimai mari.
à jiina mari jichʉ ñʉno tiro marine yʉhdʉchʉ yoare.
16 Ã yʉhdʉchʉ yoaro anjoa sehere yoadohoro taerari jire tiro.
Abrahã panamanare Cohamacʉ yainare mari sehere yoadohoro tari jire.
17 Ã taro tiro mari coyeiro warota tari jire.
Cʉ̃no potori mari yoaro sehe pjacʉ tiriro tari jire.
à taro mari yʉhdʉhtire mari ñaa yoari buhirire Cohamacʉre cohã dutiro taro niri jire.
à yoaro mari sacerdotea pʉhtoa bui pʉhtoro to yoariro sehe yoaro taro niri jire.
Mari yoaro sehe jiro marine noano pja ñʉna.
à yoa marine noano yoadohora.
à jiro tiro mari sacerdotea pʉhtoa ti bui pʉhtoro jiro nina Cohamacʉre dahra cohtariro jiro.
18 Tiro ñano yʉhdʉri jire.
à jiro watĩno tirore ñano yoa dutimari jire.
Yoaerari jire tiro.
à ñaare yoaerariro jiro,
tiro sehe mari cʉ̃hʉre ñaare yoaerachʉ yoa masina.
Watĩno to ñaare to yoa dutichʉ ñʉno marine ñaare yoaerachʉ yoa masina Jesu.