Jesu yaina ti yoahti cjihtire yahuha Paulo
3
1 Õ sehe ni yahuga tó macaina Jesu yainare:
Ti pʉhtoare paina tinare dutiina cʉ̃hʉre noano yʉhtiina jijaro.
Jipihtia noaare yoahtina jijaro.
2 Ã yoa painare ne ñano quiti dahrea tjijaro.
à jia masa noaina,
jipihtinare ño payoina jijaro.
3 Panopʉre mari cʉ̃hʉ tʉho masieraina,
yʉhdʉrʉcaina,
mahñoare tʉho nʉnʉina,
ñaare yoa ji coaina,
tíre goa pja duhu masieraina,
dachoripe ñaare yoarucuina,
paina ti cjʉaare cjoina jia timai mari cʉ̃hʉ.
à yoa marine paina ñʉ tuhtire.
Mari cʉ̃hʉ tinare ñʉ tuhtimai.
4,5 Ã jirina cjiri mari jipachʉta Cohamacʉ marine pichacapʉ wahaborinare yʉhdʉchʉ yoare.
à yʉhdʉchʉ yoaro to noariro jiare,
masare to cahĩa cʉ̃hʉre marine ñono nire tiro.
Noano mari yoari mehne yʉhdʉchʉ yoaerare marine.
Marine pja ñʉno mari ñaa yoari buhirire cosaro,
Espíritu Santo mehne marine yʉhdʉchʉ yoare.
à yoaro marine to pohna wahachʉ yoare.
à to yoachʉ Espíritu Santo sehe noaina mari jihtina cjihtire cohtotachʉ yoare marine.
6 Jesucristo marine yʉhdʉchʉ yoariro to yaria masa mʉjaa mehne Cohamacʉ to yairo Espíritu Santore ware marine pjíro to tuaa mehne marine yʉhdʉchʉ yoahtiro cjihto.
7 Marine cahĩno,
marine noano yoa duare.
à yoa duaro tiro to yairo Espíritu Santore marine ware ñaa buhiri marieina mari jihto cjihtore,
mʉanopʉ mari ã jirucuhto cjihtore.
Mari ã jirucuhtore masina,
tíre cohtana nija.
8 Tí yʉ niri potocãta jira.
à jicʉ tíre yʉ ni joariro seheta masare buhecʉ tí dutiare yoa pahño dutiga mʉhʉ.
à jicʉ Cohamacʉre wacũ tuainare tíre buhega noaare ti noano yoahto cjihtore.
Ahri yʉ ni buheri noaa buhea jira.
à jia jipihtina masa ahri buheare ti tʉho nʉnʉchʉ wiho waro jierara.
9 Paina ti durucua sehe yaba cjihti jierara.
à jia masierapahta ti ni yʉhdʉrʉcaare mʉ tʉho nʉnʉchʉ yaba cjihti jierara.
à jia ti coyea panopʉ macaina ti jia tiare ti ni yʉhdʉrʉcaare,
Cohamacʉ Moise cjirore to dutirire ti ni yʉhdʉrʉcaare tí jipihtiare noano mʉ tʉho nʉnʉchʉ yaba cjihti jierara.
à jicʉ tíre tʉho nʉnʉi tjiga.
10 Mʉsa mehne macariro ã ni yʉhdʉrʉcariro mʉsare cahma tju wachʉ to yoachʉ ñʉcʉ “Yoai tjiga”,
niga tirore.
Pʉa taha tíre tirore mʉ yoa dutierari baharo to yʉhtierachʉ ñʉcʉ tirore piti tiecʉ tjiga.
11 Tó sehe yoariro ñaa dihtare goa pjarucuriro jira.
To ã jichʉ ñʉna to ñariro to jichʉ masija mari.
Paulo duti batoaha
12 Nicopolipʉ puhiro puro jii tai nija.
à jicʉ Artemare o Tíquicore mʉ cahapʉ yʉ waroca mʉhtachʉ yʉ warocahtiro tópʉre to sʉchʉ,
Nicopolipʉ yʉhʉre piti bocaga mʉhʉ tiro mehne.
13 Ã yoa dutiare noano mihnirirore Zena wama tirirore,
Apolo cʉ̃hʉre noano yoadohoga ti wahahto cjihtore.
à yoacʉ ti cahmaare jipihtiro tinare waga “Paye baro dʉhsari”,
nicʉ.
14 Ã jia Jesu yaina mari mehne macaina noaare yoapojaro paye barore dʉhsainare ti yoadohohto sehe noaare yoarucuina ti jihto sehe.
Paulo noa dutirocaha Jesu yainare
15 Jipihtina yʉhʉ mehne macaina mʉhʉre noa dutira.
Tói jiina Jesu yaina sãre cahĩina noajaro.
Cohamacʉ to cahĩa mehne mʉsare jipihtinare noano yoajaro.